نۇر وتان پارتياسىنىڭ ابىرويى مۇنتازداي بولۋى ءتيىس - ن. نازاربايەۆ

بۇل تۋرالى اقوردانىڭ باسپا ءسوز قىزمەتىنەن حابارلايدى.
ب. بايبەك كەزدەسۋ بارىسىندا مەملەكەت باسشىسى - پارتيا ءتوراعاسى نۇرسۇلتان نازاربايەۆقا 2014 - جىلدىڭ ءبىرىنشى جارتى جىلدىعىنداعى جۇمىستىڭ جانە 2050 ستراتەگياسىن ءتۇسىندىرۋ مەن جۇزەگە اسىرۋ جۇمىستارىنىڭ ناتيجەلەرى تۋرالى باياندادى.
مەملەكەت باسشىسى «نۇر وتان» پارتياسى ەلىمىزدەگى نەگىزگى قوعامدىق كۇش ەكەنىنە، ونىڭ جۇمىسىنىڭ ءبىر باعىتى مەملەكەتتىك ساياساتتى ءتۇسىندىرۋ بولىپ سانالاتىنىنا توقتالدى.
«وڭىرلەردە جۇمىس ىستەيتىن پارتيالىقتار جۇرگىزىلىپ جاتقان جۇمىستى حالىققا جەتكىزۋ، سونداي-اق جەرگىلىكتى اتقارۋشى ورگانداردىڭ مەملەكەتتىك باعدارلامالاردى جۇزەگە اسىرۋ بارىسىن باقىلاۋى ءتيىس. پارتيا بەدەلى وتە جوعارى دەڭگەيدە ساقتالىپ، ابىرويى مۇنتازداي بولۋى ءتيىس»، - دەدى قازاقستان پرەزيدەنتى.
نۇرسۇلتان نازاربايەۆ مەملەكەتتىك باعدارلامالاردىڭ، اسىرەسە يندۋستريالىق-يننوۆاتسيالىق دامۋ باعدارلاماسىن ءتيىمدى جۇزەگە اسىرۋدىڭ ماڭىزدىلىعىن اتاپ ءوتتى.
«شەتەلدىك ينۆەستورلار كەڭەسىنىڭ وتكەن وتىرىسى كاسىپكەرلىكتىڭ مۇددەلىلىگى جوعارى ەكەنىن كورسەتتى. مەن ەلدەگى بيزنەستىك احۋالدى جەتىلدىرۋ جونىندەگى جاڭا مىندەتتەردى جاريالادىم.
بارلىق جەردە شاعىن جانە ورتا بيزنەستى قولداپ، تۇرعىنداردىڭ بيزنەس-جوبالار ازىرلەۋىنە، نەسيەلەۋ كوزدەرىن تاۋىپ، سالىقتىق جانە باسقا دا پرەفەرەنتسيالار تۋرالى بىلۋىنە كومەكتەسۋ كەرەك. شاعىن جانە ورتا كاسىپورىنداردى دامىتۋ كوپتەگەن جۇمىس ورىندارىمەن قامتاماسىز ەتەدى، پارتيانىڭ وسى ماسەلەنى ءوز قولىنا العانى ءجون»، - دەدى مەملەكەت باسشىسى.
«نۇر وتان» پارتياسىنىڭ ءبىرىنشى ورىنباسارى ءوز كەزەگىندە تۇرعىندارمەن كەرى بايلانىستى قامتاماسىز ەتۋ جۇمىستارى جولعا قويىلعانى تۋرالى ءمالىم ەتتى.
«وتكەن جىلدىڭ قورىتىندىسى بويىنشا پارتيانىڭ قوعامدىق قابىلداۋىنا 800 مىڭ ادام كەلدى. 39 مىڭ ارىز مەملەكەتتىك ورگانداردىڭ قاراۋىنا جولداندى. پارتيالىق باقىلاۋ مەن ورتالىق جانە جەرگىلىكتى اتقارۋشى ورگاندارمەن ءىس-قيمىلدى كۇشەيتۋ جۇمىستارى جۇرگىزىلدى. سونىمەن بىرگە ءسىزدىڭ تاپسىرماڭىزعا سايكەس، مۇمكىندىگى شەكتەۋلى ازاماتتارمەن جۇمىس جۇرگىزىلۋدە. سوڭعى التى ايدا وسى ساناتتاعى 4000 ادام جۇمىسقا ورنالاستىرىلدى»، - دەدى ب. بايبەك.
بۇدان بولەك، «نۇر وتان» پارتياسى ءتوراعاسىنىڭ ءبىرىنشى ورىنباسارى ۇكىمەت قىزمەتىنىڭ ناتيجەلەرىن ءتۇسىندىرۋ، «قازاقستان-2050» ستراتەگياسىن، سونداي-اق ەۋرازيالىق ەكونوميكالىق ينتەگراتسيانى جۇزەگە اسىرۋ اياسىنداعى جۇمىستار جونىندە حابارلادى.
كەزدەسۋ قورىتىندىسى بويىنشا مەملەكەت باسشىسى پارتيا كوشباسشىسىنا «قازاقستان-2050» ستراتەگياسىن جۇزەگە اسىرۋ، حالىقپەن تىكەلەي ءوزارا ءىس-قيمىل اياسىن كەڭەيتۋ، پارتيانىڭ ءوزىن-ءوزى جان-جاقتى قامتاماسىز ەتۋى جانە ونىڭ الدىنا قويىلعان وزگە دە مىندەتتەردى ورىنداۋى جونىندەگى جۇمىستى ودان ءارى كۇشەيتۋگە قاتىستى ءبىرقاتار ناقتى تاپسىرمالار بەردى.