ۆلاديمير پۋتيننىڭ ءومىر جولى
لەنينگراد قورشاۋدان بوساپ، ارادا سەگىز جىل وتكەن سوڭ 1952 - جىلى تۋعان جاس پۋتيننىڭ اناسى ماريا مەن اكەسى ۆلاديمير بلوكادادان ءتىرى قالعان. پۋتيننىڭ اكەسى سوعىستىڭ العاشقى جىلدارىندا مايدانعا قاتىسىپ، ۇرىستا اۋىر جارالانعان.
تەلەديدار، داچا جانە تەلەفون
ۆلاديمير پۋتين بيلىككە بارىنشا كوزگە تۇسپەيتىن جولمەن جەتتى دەپ جازادى Newsweek باسىلىمى. جاستىق شاعى شەتەلدە جانە قۇپيا كەڭسەلەردىڭ ىشىندە وتكەندىكتىن، ول وزىنە قاتىستى كەز- كەلگەن اقپاراتتى باقىلاۋدا ۇستاي الدى. سول سەبەپتى پۋتين ءوزىنىڭ بوزبالا كەزىنە قاتىستى اڭىز- اڭگىمەلەردى ءوزى ويدان دا شىعارۋى مۇمكىن.
ماقالا اۆتورى پۋتيندەر وتباسىنىڭ قانداي ەسكى ۇيدە، تار پاتەردە سىعىلىسىپ تۇرعانى، جۇمىستارىنىڭ ماردىمسىز بولعانى تۋرالى جازا كەلىپ، ەڭ قىزىعى سول كەزدىڭ وزىندە ولاردىڭ وتباسىندا تەلەديدار، تەلەفون جانە داچا بولعان دەپ تاڭ قالادى. سوعىستان سوڭعى كەدەيشىلىك كەزەڭدە بۇل ناعىز بايلىق بوپ سانالاتىن.
ءبىلىمدى ەمەس، بىلەكتى بولۋعا قۇلشىنىس 
اۆتوردىڭ جازۋىنشا مەكتەپ شاعىندا پۋتين بىلىمگە سونداي قۇمارتپاعان. بىرگە وسكەن دوستارىنىڭ سيپاتتاۋىنشا پۋتين ول توبەلەسكە بەيىم بولعان. اۆتور ماقالاسىندا ونىڭ سىنىپتاستارى ايتىپ بەرگەن جاس پۋتيننىڭ بۇزاقىلارمەن بولعان ەكى ءتۇرلى « ەرلىگىن» ايعاق رەتىندە كەلتىرەدى.
« بۇزاقى» پۋتين 10 جاستان اسقاندا توبەلەس ۇيرەتەتىن ۇيىرمە ىزدەپ، اقىرىندا سامبوعا توقتاعان. بالا پۋتين سول كەزدىڭ وزىندە ك گ ب- گە توبەلەس ءتاسىلىن بىلەتىندەردى سۇرىپتاپ الاتىنىن ەستىگەن بولۋى كەرەك دەپ پايىمدايدى ساراپشى.
عارىشكەر بولعىسى كەلمەگەن بالا 
باسىلىم بۇكىل س س س ر جاستارى « عارىشكەر بولعىم كەلەدى» دەپ ارمانداپ جۇرگەندە 12 جاسار پۋتيننىڭ ك گ ب قىزمەتكەرى بولعىسى كەلگەنىنە تاڭدانىس بىلدىرەدى. شاماسى سول كەزدە ەلدىڭ ءبارى قىزىعىپ وقىعان « قالقان مەن قىلىش» رومانى مەن سونىڭ جەلىسىمەن تۇسىرىلگەن تىڭشى تۋرالى كوركەم فيلم ونىڭ اڭسارىن باسقا جاققا اۋدارعان سياقتى. ءبىراق پۋتيننىڭ ءوزى: « مەن توعىزىنشى سىنىپ وقىپ جۇرگەندە وقىعان كىتاپتار مەن كورگەن كينولار ماعان قاتتى اسەر ەتتى» دەپ سۇقبات بەرسە دە، باسىلىم ونىڭ وسى سوزىنە سەنىڭكىرەمەيدى.
جەكە كولىگى بار ستۋدەنت
ماقالا اۆتورى پۋتيننىڭ اكەسىنىڭ ەكىنشى دۇنيەجۇزىلىك سوعىس كەزىندە ن ك ۆ د- مەن ىستەس بولعانى تۋرالى دا مالىمەت كەلتىرەدى. ءبىراق ونىڭ سوعىسقا دەيىن، نە كەيىن ن ك ۆ د قىزمەتىندە بولعانى تۋرالى انىق ايتىلمايدى. ءبىراق سوندا دا ول قۇپيا قاۋىپسىزدىك قىزمەتىنىڭ شتاتىندا جالاقى الىپ وتىرعانعا ۇقسايدى.
بولاشاق رەسەي پرەزيدەنتى دە لەنينگرادتا وقىپ جۇرگەندە جەڭىل كولىكپەن جۇرەتىن ساناۋلى ستۋدەنتتىڭ ءبىرى بولعان. 1970 - جىلدارى س س س ر- دە اۆتوموبيل ءمىنۋ سيرەك كەزدەسەتىن. بۇدان ارى ماقالا اۆتورى پۋتيننىڭ وقۋىن بىتىرگەن سوڭ قاۋىپسىزدىك سالاسى بويىنشا جاساعان كارەاراسى مەن وتباسىلىق ومىرىنە شولۋ جاساپ، ءارى ءتۇرلى مالىمەتتەر كەلتىرگەن. پۋتين قىزمەتكە كىرىسكەندە ك گ ب نەگىزىنەن سوۆەت رەجيمىنە قارسى شىققان ديسسيدەنتتەرمەن ارپالىسىپ جاتقان. پۋتين ءبىر سۇقباتىندا: « مەن ونداي ادامداردى قۋدالاۋعا قاتىسقان ەمەسپىن» دەسە دە سول كەزدەگى جۇيەمەن ابدەن تانىس ەكەنىن ءبىلدىرىپ الدى دەپ جازادى باسىلىم.
درەزدەننەن - پەتەربۋرگقا
ۆلاديمير پۋتين گ د ر (گەرمانيا)- دە جۇرگەندە 1985 - جىلى بيلىككە ميحايل گورباچيەۆ كەلىپ، مەملەكەتتە تۇبەگەيلى وزگەرىس باستالدى. ك گ ب مەن ۇكىمەت اراسى ابدەن اجىراپ، ونىڭ سوڭى 1990 - جىلعى تامىز بۇلىگىنە سوقتىردى. ەلدى الىستان باقىلاپ وتىرعان ك گ ب وفيتسەرى وتكەننىڭ كەلمەسكە كەتكەنىن ءبىلدى. بەرلين قابىرعاسى قۇلاپ، ەكى گەرمانيا قوسىلدى. جۇمىسسىز قالعان پۋتين 20 جىل پايدالانعان شەتەلدىك كىر جۋاتىن ماشينەسىن تيەپ الىپ، ەكى بالاسىمەن لەنينگرادتاعى قارا شاڭىراققا قايتىپ كەلدى دەپ جازادى باسىلىم.
پۋتين قاۋىپسىزدىك قىزمەتى ارقىلى بيلىككە كەلگەن سوڭ 1999 - جىلى شەشەن سودىرلارىن تاس- تالقان قىلامىن دەگەن ۋادەسىمەن اتىن شىعاردى.
«ازاتتىق»
