قازاقشا بىلمەيتىن ءمينيستردىڭ ەرتەڭى قانداي بولادى؟

استانا. قازاقپارات -ۇكىمەت باسشىسى كارىم ماسىموۆكە ريزا بولدىق.

شىنى كەرەك، جاعىمپازدىق پەن جامپوزدىقتان اۋلاقپىز.

دەگەنمەن، ونىڭ استاناداعى تاۋ-كەن مەتاللۋرگيا كونگرەسسىندە ءوزىنىڭ قۇتتىقتاۋ ءسوزىن تازا قازاق تىلىندە وقىپ بەرگەنىن ەرەكشە اتاپ وتكىمىز كەلەدى.

ۇكىمەت باسشىسىنىڭ بۇل ارەكەتى تىلگە شورقاق باسقا مينيسترلەرگە ۇلگى بولسا قانەكي... "الاش ايناسىن" وسى ماسەلە تولعاندىرادى.

ارينە، قازىر كەيبىر مينيسترلەردىڭ قازاق تىلىندە سويلەۋگە تىرىسىپ جاتقانى بايقالادى.

ولار سۇراق-جاۋاپ كەزىندە بارىن سالىپ، تۇشىمدى اقپارات بەرۋگە تالپىنادى. الايدا سولاردىڭ ىشىندە مەملەكەتتىك تىلگە ات ءۇستى قارايتىندار دا از ەمەس. اۋىزەكى تىلدە سويلەگەننەن بۇرىن جازىلعان نارسەنى وقي الماي جاتادى. ال داۋىستارىندا تىلگە دەگەن قۇرمەت ەشبىر سەزىلمەيدى. وندايدا نە كۇلەرىڭدى، نە جىلارىڭدى بىلمەيسىن.

الىسقا بارماي-اق قويايىق، «24. KZ» تەلەارناسى تىكەلەي ەفير ارقىلى كۇن سايىن باسپا ءسوز ءماسليحاتتارى كورسەتىلىپ وتىرادى. مىنە، سودان بىزدەگى باسشىلاردىڭ مەملەكەتتىك ءتىل تۇرعىسىنان قانشالىقتى ساۋاتتى ەكەنىن انىق بايقاۋعا بولادى.

ماسەلەن، جاقىندا وتكەن باسپا ءسوز ءماسليحاتتارىنىڭ بىرىندە ءبىر «كوكەمىز» ءوز بايانداماسىنىڭ قازاق تىلىندەگى ءۇش مينۋتتىق كىرىسپەسىن دە دۇرىس وقي المادى. سول كەزدە ءبىز ونداعان قاتەلەردى سانامالاپ شىقتىق.

اتاپ ايتقاندا، "سۋلى" دەگەن ءسوزدى "سۇلۋ"، "باعدارلامانى" - "باعرلاما"، "اكىمدىكتەردى" - "اكىمدىگدەر"، "جاڭعىرتۋدى" - "جاڭعارتۋ"، "كورسەتىلەتىندى" - "كورسىلەتىن"، "كەشەندى" - "كوشەن"، "وڭدەۋدى" - "ەڭدەۋ"، "قاعيداتتى" - "قاعيعات"، "مەرزىمدى" - "ءمىرزىم" دەپ ەجىكتەپ وقىپ، باياندامادان ءمان دە مازمۇن دا كەتىرگەنى ەستە.

سونىڭ سالدارىنان ونىڭ قازاق تىلىندە جاساعان كىرىسپە ءسوزى جارتىلاي تۇسىنىكسىز بولىپ قالدى. سوندا مەملەكەتتىك قىزمەتتە جۇرگەن وسى ازاماتتار وزدەرىن تىكەلەي ەفير ارقىلى بۇكىل قازاق حالقىنىڭ كورىپ وتىرعانىن بىلمەي مە؟ جوق، الدە، تۇسىنبەي مە؟

باس كەزىندە مەملەكەتتىك قىزمەتكەرلەر ءۇشىن قازاق ءتىلىن ءبىلۋ مىندەتىنىڭ ەنگىزىلگەنىن جاقسى بىلەمىز. دەگەنمەن، ول تالاپتىڭ ناتيجەسى كوڭىل كونشىتەرلىك ەمەس. ءتىلدى ءبىلۋ ول ءبىر باسقا، ال ونى مەڭگەرىپ، ساۋاتتى تۇردە سويلەي ءبىلۋ مۇلدەم باسقا ماسەلە ەكەن. سودان بولار، مەملەكەتتىك قىزمەتكەرلەردىڭ قازاق ءتىلىن مەڭگەرۋ ءتىلدى دامىتۋدىڭ ەكىنشى كەزەڭى اياسىندا ماڭىزدى مىندەتتەردىڭ ءبىرى رەتىندە قاراستىرىلىپ وتىر.

بۇل ماسەلە جاقىندا ۇكىمەت وتىرىسىندا قارالىپ، ول جايىندا مادەنيەت ءمينيسترى ارىستانبەك مۇحامەدي ۇلى بايانداعان. «2011-2020 - جىلدارعا ارنالعان مەملەكەتتىك ءتىلدى دامىتۋ باعدارلاماسى ۇلت بىرلىگىن نىعايتۋدىڭ اسا ماڭىزدى فاكتورى بولىپ سانالادى. وسى مەملەكەتتىك باعدارلامانى ورىنداۋدىڭ ءۇش كەزەڭى بار. قازىر 39 ءىس-شارادان تۇراتىن 2011-2013 - جىلدارعا ارنالعان ءبىرىنشى كەزەڭ اياقتالدى.

سوڭعى ءۇش جىلدىڭ ىشىندە مەملەكەتتىك ءتىلدى وقىتۋ بويىنشا ءبىرقاتار جۇمىستار اتقارىلدى. «قازتەست» جۇيەسىن جەتىلدىرۋ جۇمىسى اياقتالدى. قازاق ءتىلىن وقىتۋعا ارنالعان بەس دەڭگەيلى ادىستەمەلىك كەشەن ازىرلەندى. قازىرگى كەزدە اتالعان كەشەن بارلىق وقىتۋ ورتالىقتارىنا تاراتىلدى. ەندىگى كەزەكتە، مەملەكەتتىك قىزمەتكەرلەرگە قازاق ءتىلىن مەڭگەرۋدى مىندەتتەگەن دۇرىس. ءبىز ونى 2015 - جىلدان باستاپ ورتالىق جانە جەرگىلىكتى اتقارۋشى ورگاندارىنىڭ ستراتەگيالىق جوسپارلارىنا "قازتەست" جۇيەسىن ەنگىزۋ ارقىلى بىرتە-بىرتە شەشەتىن بولامىز»، - دەيدى مينيستر...

اۆتور: ارمان اسقار