ۇيالى تەلەفون ۇياتسىز بولىپ بارادى
ۇيالى تەلەفونىڭىز بولماسا ۇيالىپ قالاتىن دارەجەگە جەتتىك.
بىلدىرلاعان بالادان ەڭكەيگەن قارياعا دەيىن وسى كەرەمەتتىڭ «قۇدىرەتىنە» جۇگىنەدى.
ونىڭ تەك حابار العىزىپ قانا قويماي يەسىنە باسقا دا قىزمەت تۇرلەرىن ۇسىناتىن ارتىقشىلىعىن تاعى قوسىڭىز.
قاجەتتىلىگىمىزدى قاناعاتتاندىرىپ جۇرگەن وسى ارتىقشىلىقتار تىم كەرى اسەرىن تيگىزىپ جاتقانداي. ماسەلەن، ۇيالى تەلەفونداعى ۇياتسىزدىق دەندەپ بارادى.
«سوتكاداعى» سوراقىلىقتاردى «الاش ايناسىنىڭ» ءتىلشىسى جىپكە ءتىزىپ شىقتى. وندا نە جوق دەيسىز؟ تەلەفوننىڭ جادىنا جازىلعان جانىڭدى تۇرشىكتىرەر نەبىر سۇمدىقتار ءورىپ ءجۇر.
قازىرگى جاستاردىڭ ۇيالى تەلەفونىنا ۇڭىلمەس بۇرىن پسيحولوگيالىق دايىندىقتان ءوتىپ الۋ قاجەت. ايتپەسە تۇنىمەن تۇسىڭىزگە نەبىر ۆامپيرلەر مەن مانياكتار كىرىپ مازالاۋى مۇمكىن. سوندا دا باتىلىمىزدى جيىپ ءبىر ەكەۋىن ايتا كەتسەك.
ماسكەۋدىڭ مورگىندە تۇسىرىلگەن مىنا ءبىر كورىنىستى جۇرەك جۇتقان بىرەۋ بولماسا اناۋ-مىناۋ ادام باسىنان اياعىنا دەيىن جۇرەگى شىداپ كورۋى مۇمكىن ەمەس. كاۆكازدىق جۇندەس حالىقتىڭ وكىلى اۋزىندا تەمەكى الدىندا جاتقان ادامنىڭ ىشەك-قارنىن اقتارىپ جاتىر.
تاپ ءبىر ەشكى سويىپ جاتقانداي جايباراقات. قاسىنداعىسىنا بىردەڭەنى بىلدىرلاپ قارق-قارق كۇلىپ قويادى...
ەندى بىرەۋىندە توپتاسىپ توبەلەسكىشتەردىڭ سوراقى تىرلىكتەرى. ءوزىن «كرۋتوي» سانايتىن مەكتەپ وقۋشىلارى ەكى بالانى ورتاعا الىپ تەپكىلەپ ءجۇر. تاپ ءبىر دوپ تەپكەندەي. الگى كوپكە قارسى تۇرا الماعان ەكەۋدىڭ بەت-اۋزىن تانۋ مۇمكىن ەمەس.
توبەلەسكىش تەنتەكتەر وسىنشاما قاتىگەزدىكتى قايدان ۇيرەنگەن دەپ قايران قالاسىڭ. «اتا-اناڭا ايتاسىڭ با، ارىز جازاسىڭ با؟» دەپ ايقايلاپ تەپكىلەگەن سايىن ەكى بالانىڭ بەبەۋلەگەن داۋىسى قۇراققا جەتكەندەي. وسىنداي ءبىر «تۋىندىنى» كورەمىن دەپ تۇنىمەن ۇيىقتاماي شىققانىمىز بار. ودان كەيىن مۇندايدى كورۋدەن جۇرەگىمىز شايلىعىپ قالدى. وسىنداي قاتىگەزدىكتى كورگەن بالا ەرتەڭ كورگەنىن جۇزەگە اسىرعىسى كەلمەيدى دەپ كىم ايتا الادى. مۇنىڭ ارينە بالانىڭ پسيحولوگياسىنا كەرى اسەر ەتەتىنى ءسوزسىز.
جاستارعا قىزىق كەرەك، ەندى بىرىندە حالىق ءارتىسى دەگەن اتاعى ءبىر ءانشىنىڭ ماس كەزىن ءتۇسىرىپ الىپتى. قوناق ۇيدە ماساڭ قالىپتا اۋزىنا تۇسكەنىن ايتىپ «ونەر» كورسەتكەن اپامىزدىڭ بۇل «كليپىن» كەز-كەلگەن جاستىڭ تەلەفونىنان تاۋىپ الۋعا بولار.
ودان بولەك «ونەرتانۋشىلار» شىعىپتى. مۇڭدى ولەڭدەرىمەن ميلليونداردىڭ جۇرەگىن جاۋلاپ العان اقىننىڭ كوپكە بەيمالىم، توسەك توڭىرەگىن اشىق سۋرەتتەگەن انايى ولەڭدەرىن «جارىققا شىعارىپتى» . ول اقىن ءوز-وزىنە ادۆوكات بولا المايدى عوي. مۇنى ەستىگەن جاستاردىڭ قازاق ونەرىنە، مادەنيەتىنە كوزقاراسى قانداي بولۋى مۇمكىن.
ال، انا ءسۇتى اۋزىنان كەتپەگەن جاسوسكىندەر بۇدان قانداي ساباق الادى؟ ءتىپتى بەينەبايان تۇسىرەتىن اۋەسقوي «رەجيسسەرلار» شىعىپ جاتىر. ەكى عاشىقتىڭ ماحاببات حيكاياسىن مازاق قىلىپ تەلەفون ارقىلى تاراتىپ جىبەرۋ كىمگە ابىروي اپەرسىن؟ ودان بولەك پورنوگرافيالىق، ەروتيكالىق بەينەونىمدەر ءورىپ ءجۇر. مەكتەپ جاسىنداعى جاسوسكىندەردىڭ وسىنداي-وسىندايلاردان كەيىن تاربيەسى قانداي بولماق؟ اشىق قوعام ورناتامىز دەپ القىنىپ جۇرگەندەر بۇعان قۋانار. الايدا بۇل ءبىزدىڭ مەنتاليتەتىمىزبەن قابىسپايتىنىن كىم ويلار؟ تۇبىنە وي جۇگىرتىپ كورەلىكشى، وسىندايلاردى كورىپ ەرتە ەسەيگەن جاستار كورگەنىن ىستەيدى ەمەس پە؟ جاستار اراسىنداعى قىلمىس، زورلىق-زومبىلىقتىڭ باستاۋ الۋىنا وسى «سوتكاداعى» دۇنيەلەردىڭ سىڭىرگەن ەڭبەگى جوق دەي الاسىز با؟
ۇيالى تەلەفوننىڭ ۇلتتىق تاربيەمىزگە قاتەر ءتوندىرىپ، تەگىمىزگە تەرىس اسەرىن تيگىزىپ جاتقانىن جانىمىزعا باتادى-اق. الايدا امال كەم. سوتكاداعى سۇمدىقتاردىڭ تارالۋىنا تيىم سالاتىن تەتىك جوق. ۇلى تەلەفون ارقىلى نەبىر سۇمدىقتار تاراپ جاتىر، تاراپ جاتىر. ونىڭ ۇرپاق تاربيەسىنە تەرىس اسەرىن تيگىزىپ جاتقاندىعى ەشكىمدى دە ويلاندىرمايتىن سىقىلدى...
اۆتور: گۇلجان كوشەروۆا
