شەتەلدىكتەر قىزدارىمىزدى قاشانعى «لاقتىرىپ» كەتە بەرەدى؟
سول كەزدە شەتەلدىك ازاماتتارىنىڭ قاراگوز قىزدارىمىزبەن نەكەگە تۇرىپ، ازاماتتىققا نەمەسە تۇراقتى تىركەۋگە تۇرىپ العان سوڭ، اجىراسىپ كەتەتىنىن ءسوز ەتكەن بولاتىنبىز.
كەشە 31-ارنانىڭ كەشكى جاڭالىقتارىنان ءدال وسىنداي تاعدىرلى انار اتتى قىزدىڭ جايى ءسوز بولدى.
بۇگىن «الاش ايناسى» باسىلىمى سول انار يفتيحاردى تاۋىپ الىپ پىكىرلەسكەن ەدى.
انار پاكىستاندىق كۇيەۋ جىگىتپەن...
اتىراۋلىق انار يفتيحار 2012 - جىلى پاكىستاندىق حۋررام يفتيحار اتتى ازاماتپەن زاڭدى نەكەگە تۇرىپتى. ول ازاماتپەن ءبىر جارىم جىلعا جۋىق ۋاقىت وتاسقان. اناردىڭ ايتۋىنشا، پاكىستاندىق جىگىت ونى سۇيەتىنىن ايتىپ، ارتىنان قالماي ءجۇرىپ ۇيلەنگەن.
ءبىراق، انار حۋررامنىڭ بار ماقساتى تۇراقتى تىركەۋگە تۇرۋ ءھام قازاقتانعا ەمىن-ەركىن كىرۋ قۇجاتىنا يە بولۋ ەكەنىن كەش تۇسىنگەن. ول، ول ما، قازاق قىزىنىڭ تاعدىرىن ازاماتتىق ءۇشىن تالكەككە سالعان شەتەلدىك اناردىڭ اتىنان ءۇش نەسيە الىپ ۇلگەرگەن.
«كۇيەۋگە ءتيىپ، تاعدىردىڭ تاياعىن جەگەنىم ازداي، ەندى ونىڭ ءوسىمدى قارىزىن دا وتەۋگە ءماجبۇر بولىپ وتىرمىن» دەيدى شاراسىز قىزىمىز.
انار يفتيحار، شەتەلدىككە الدانىپ قالعان كەلىنشەك:
- مەنىڭ جان ايقايىما قۇلاق اساتىن ادام تاپپاي وتىرمىن. مەن 2012 - جىلى پاكىستاندىق ازاماتپەن زاڭدى نەكەگە تۇردىم. ول وسى نەكەنىڭ نەگىزىندە تۇراقتى مەكەن-جايعا تىركەلۋ قۇقىنا يە بولدى. تۇراقتى تىركەۋى بار كەز-كەلگەن پاكىستاندىق ازامات 5 جىل بويى قازاقستان مەن پاكىستان اراسىندا ۆيزاسىز ەركىن جۇرە الادى. سوسىن ول مەنى 3 نەسيە راسىمدەۋگە كوندىردى. 2013 - جىلدىڭ 2 - تامىزى كۇنى تۇراقتى تىركەۋگە قول جەتكىزىپ، 2 - قىركۇيەك كۇنى «پاكىستانعا بارىپ كەلەمىن» دەگەن سىلتاۋمەن الماتىعا كەتتى.
سودان بەرى ءىز-ءتۇزسىز جوعالدى. مەن الدىمەن ءى ءى د-نە شاعىمدانىپ، ىزدەۋ سالدىم. قازىر حۋررام اتىراۋدا تايراڭداپ ءجۇر. مەن - جالعىزباستى انامىن. قۇمىسسىز بولسام دا، اتىما الىنعان نەسيەنى تولەپ جاتىرمىن.
حۋررام يفتيحار 1976 - جىلى پاكىستانعا دۇنيەگە كەلگەن ەكەن. انارمەن زاڭدى تۇردە نەكەسىن بۇزىپ ۇلگەرىپتى. ءبىز وسىعان دەيىن «قوس ازاماتتىق: دەپۋتاتتار نەگە ءۇنسىز؟» دەگەن ماقالا جازىپ، سول ماتەريالدا: «زاڭ بويىنشا ق ر ازاماتىمەن كەمىندە ءۇش جىل نەكەدە تۇراتىن شەتەلدىكتەر مەن ازاماتتىعى جوق ادامدار قازاقستان ازاماتتىعىن الا الادى. قازاقستاندىق قىزبەن تۇرمىس قۇرعان كىرمە، ازاماتتىق العاننان كەيىن اجىراسىپ كەتسە، ونىڭ ازاماتتىعى ساقتالىپ قالادى» دەپ بۇل ماسەلەنىڭ دە استارىنا ۇڭىلگەن ەدىك. سونداي-اق، «قازاقستان ازاماتتىعىنان كىمدەردى شىعارىپ تاستاۋ كەرەك؟» دەگەن ماقالا جازعانىمىزدا ق ر پارلامەنت ءماجىلىسىنىڭ دەپۋتاتى الدان سمايىل: «ازاماتتىق» تۋرالى زاڭ تالقىلانعاندا ءۇش جىل ىشىندە قازاقستان ازاماتىمەن وتاسقاندارعا جەڭىلدەتىلگەن جولمەن ازاماتتىق بەرۋ ماسەلەسىنە قارسى بولعان ەدىم.
ءالى دە سول پىكىردەمىن. بۇل قازىر ناۋقانعا اينالىپ بارادى. زاڭنىڭ وسى بابىن پايدالانىپ، قانشاما ازاماتتار ەلىمىزدەگى جەسىر ايەلدەرمەن، قىزدارمەن وتاسىپ جاتىر. مەنىڭشە، بىرىنشىدەن، زاڭنان بۇل بابتى الىپ تاستاۋ كەرەك»، - دەگەن بولاتىن.
قىز ۇزاتۋ...
گۇلزادا قاسانوۆا، اناردىڭ اپكەسى:
- ءسىڭىلىمىزدى پاكىستاندىق ازاماتتىڭ ارام ماقساتتارىنا پايدالانىپ كەتكەنىنە نالا بولىپ وتىرمىز. انار العان نەسيەنى وتەتۋ ماقساتىندا ونى سوتقا دا بەردى. ودان قانداي ناتيجە شىعارى بەلگىسىز. ول بىردە ماعان «سوتتان جەڭىلسەم، وزىمە قول جۇمسايمىن» دەپ ايتتى. مەن سول ءۇشىن دە ءسىڭىلىمنىڭ تاعدىرى ءۇشىن الاڭدايمىن.
قايداعى ءبىر شەتەلدىك قازاقتىڭ قىزىن الداپ، تايراڭداپ ءجۇر. ال، ونىڭ تاعدىرىن كىم ويلايدى. سوتتىڭ ءبىرىنشى وتىرىسىندا س. ا. ەرلاليەۆ اتتى سۋديا سىڭىلىمە ارىزدىڭ دۇرىس جازىلماعانىن، نەسيەگە الىنعان قارجىنىڭ 50 پايىزىن عانا تولەتۋدى سۇراي الاتىنىن ايتىپتى. سوندا الاياق وسىلاي بىلگەنىن ىستەپ جۇرە بەرۋى كەرەك پە؟ مىنا ءىسى ءۇشىن ونى تۇرعىلىقتى مەكەن-جايدان ايىرىپ تاستاۋعا، زاڭ جۇزىندە جازالاۋعا بولماي ما؟
«الاش ايناسىنىڭ» ءتۇيىنى
«اتا-انام سىيعا جىبەردى» دەپ انارعا ساري (ءۇندى ەلىنىڭ ۇلتتىق كيىمى) سىيلاپ، جۇرەگىن ۇسىنعان كۇيەۋجىگىت حۋررام قازىر قازاق جەرىندە الشاڭ باسىپ، بيزنەسىن دوڭگەلەتىپ ءجۇر. قازىر اناردىڭ بالاسىن باۋىرىنا باسىپ، سوعان لايىق اكە بولۋعا سەرت بەرگەنىن، اناردىڭ تۋىستارىنىڭ الدىنان ءوتىپ، ءتوس جەگەنىن ۇمىتتى ما ەكەن، ول؟ ۇمىتقان شىعار، ويتكەنى ءبىزدىڭ سولقىلداق زاڭدارىمىز حۋررامدارعا بار مۇمكىندىكتى جاساپ قويعان. ءبىز مۇنى ءبىر عانا اناردىڭ ەمەس، مىڭداعان انارلاردىڭ كوز جاسى دەپ بىلەمىز. ءسىز نە دەيسىز؟
اۆتور: قانات بىرلىك ۇلى
