مەملەكەتتىك كوشى-قون جانە قازاق دياسپوراسى اگەنتتىگىن قۇرۋ كەرەك - دەپۋتاتتىق ساۋال
بۇگىن ءماجىلىستىڭ جالپى وتىرىسىندا ۇكىمەت باسشىسى كارىم ءماسىموۆتىڭ اتىنا جولداعان دەپۋتاتتىق ساۋالىندا دەپۋتات نۇرلان جازىلبەكوۆ وسى ماسەلەنى كوتەردى.
ساۋال بارىسىندا دەپۋتات جاقىندا ەل ۇكىمەتى شەتەلدەگى قانداستاردى كوشىرۋدى جەدەلدەتۋ ماقساتىندا قۇقىقتىق جانە اكىمشىلىك تەتىكتەردى وڭتايلاندىرۋعا باعىتتالعان اسا ماڭىزدى ساياسي شەشىم قابىلداعانىن اتاپ ءوتتى.
ونىڭ پايىمىنشا، ۇلتتىق مەملەكەتىمىزدى بەكەمدەۋ جولىنداعى مۇنداي يگى باستامالاردىڭ دۇرىستىعى داۋ تۋدىرمايدى، ءبىراق وسى باعىتتاعى شارالار ءالى دە جەتكىلىكسىز. سەبەبى، دەپۋتاتتىڭ ويىنشا، شەتەلدەردە تۇراتىن قازاق دياسپوراسىنىڭ ۇلتتىق بولمىسىنا تونگەن قاتەر جىل وتكەن سايىن اۋىرلاي تۇسۋدە.
بۇل رەتتە ن. جازىلبەكوۆ ميلليونعا جۋىق قانداستار تۇراتىن كورشى رەسەيدە بىردە-ءبىر قازاق مەكتەبىنىڭ جوقتىعىن، سونداي-اق قىتاي مەن وزبەكستاندا قازاق مەكتەپتەرى جىل سايىن جابىلىپ جاتقانىن العا تارتتى.
سونىمەن قاتار، ءماجىلىس دەپۋتاتى شەتتەگى قانداستارمەن مادەني بايلانىستى كۇشەيتۋگە مىندەتتەلگەن دۇنيە ءجۇزى قازاقتارى قاۋىمداستىعىنىڭ جۇمىسىن دا سىنعا الدى.
«ولار بار بولعانى قوعامدىق ۇيىم عانا. سوندىقتان دا، مەملەكەتتىك كوشى-قون جانە دياسپورا اگەنتتىگىن قۇرۋدىڭ ماڭىزى ەرەكشە. يزرايل، رەسەي، گەرمانيا جانە قىتاي ەلدەرىندە ءوز دياسپورالارىنىڭ قۇقىقتىق مۇددەسىن قورعاۋعا باعىتتالعان ارنايى مەملەكەتتىك قۇرىلىمدار اسا ءونىمدى جۇمىس ىستەپ كەلەدى»، - دەي كەلە دەپۋتات ن. جازىلبەكوۆ ەلىمىزدە بۇگىنگە دەيىن وسىنداي وراسان زور مىندەتتى اتقاراتىن مەملەكەتتىك ورگان جوق ەكەندىگىنە نازار اۋداردى.
«ىشكى ىستەر مينيسترلىگىندەگى كوشى-قون دەپارتامەنتىنىڭ قىزمەتى تەك ۆيزالىق رۇقسات بەرۋمەن شەكتەۋلى. قوعامدىق ۇيىمدار مۇنداي جۇكتى كوتەرە المايتىنى دا انىق. سوندىقتان قۇلاشىن كەڭگە سىلتەيتىن قۇزىرەتى بار كوشى-قون جانە قازاق دياسپوراسى اگەنتتىگىن قۇرۋ كۇتتىرمەس ماسەلە دەپ بىلەمىز. قازاقستان ەۋرازيالىق ەكونوميكالىق وداققا كىرىپ وتىرعان ساتتە، شەتەلدەگى قانداستارىمىزدى اتامەكەنىنە تارتۋ ارقىلى قاناتىمىزدى قاتايتىپ، كەرەگەمىزدى كەڭەيتە ءتۇسۋدىڭ ماڭىزى ۇلكەن»، - دەدى دەپۋتات.
اۆتور: قانات مامەتقازى ۇلى
