الماتى وبلىسىنىڭ اكىمى جىلدىڭ ۇزدىك دارىگەرىنە وتاندىق كولىكتىڭ كىلتىن تابىس ەتتى- فوتو

 تالدىقورعان. قازاقپارات - مەديتسينا قىزمەتكەرلەرى كۇنىندە ءى. جانسۇگىروۆ اتىنداعى مادەنيەت سارايىندا وبلىس اكىمى اڭسار مۇساحانوۆتىڭ قاتىسۋىمەن سالتاناتتى شارا ءوتتى.

 سالتاناتتى ءبولىم باستالعانعا دەيىن دەنساۋلىق ساقتاۋ سالاسىنىڭ شەنەۋنىكتەرى اتقارعان جۇمىستارى تۋرالى ەسەپ بەردى جانە وسى عيماراتتىڭ فويەسىندە وتكەن كورمە بارىسىندا ءوز جەتىستىكتەرىن كورسەتتى.

 ارتىنشا جينالعان قاۋىم دارىگەرلەر مەن مەدبيكەلەردىڭ جاۋاپتى دا كۇردەلى جۇمىسى تۋرالى بەينەروليكتى تاماشالادى.

«سىزدەردى شىن جۇرەگىممەن كاسىبي مەرەكەلەرىڭىزبەن قۇتتىقتاۋعا رۇقسات ەتىڭىزدەر. سىزدەردىڭ ادامدار ءۇشىن اۋاداي قاجەتتى، كۇردەلى جۇمىستارىڭىزعا ساتتىلىك، تابىس تىلەيمىن» ، - دەدى ءوڭىر باسشىسى شارانىڭ اشىلۋ سالتاناتىندا سويلەگەن سوزىندە - «بۇگىندە دەنساۋلىق ساقتاۋ مەملەكەتتىڭ الەۋمەتتىك ساياساتىنىڭ باسىم باعىتتارىنىڭ ءبىرى بولىپ تابىلادى. قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتىڭ «قازاقستان جولى-2050: ءبىر ماقسات، ءبىر مۇددە، ءبىر بولاشاق» اتتى جولداۋىندا حالىق دەنساۋلىعىنا دەگەن قامقورلىققا ەرەكشە ءمان بەرىلىپ، رەسپۋبليكانىڭ دەنساۋلىق ساقتاۋ سالاسىن ودان ءارى جەتىلدىرۋ جايى باسا ايتىلدى. وبلىستا بۇل باعىتتا ماقساتتى جۇمىستار جۇرگىزىلۋدە» ، - دەپ تۇيىندەدى ءسوزىن وبلىس اكىمى.

اڭسار مۇساحانوۆ وبلىستا مەديتسينا قىزمەتىنىڭ ساپاسىن جاقسارتۋ، دارىگەرلەردىڭ بىلىكتىلىگىن ارتتىرۋ ءۇشىن بەلگىلى ءبىر جۇمىستار اتقارىلىپ جاتقانىنا توقتالىپ ءوتتى. مىسالى، دەنساۋلىق ساقتاۋ سالاسىنىڭ بيۋدجەتى وتكەن جىلمەن سالىستىرعاندا، 16 پايىزعا ءوسىپ، 71,2 ميلليارد تەڭگەنى قۇرادى. حالىققا ساپالى قىزمەت كورسەتۋدى قامتاماسىز ەتۋ ءۇشىن اۋىلدىق جەرلەرگە جاس ماماندار تارتىلۋدا. اتاپ ايتقاندا، وبلىس اكىمدىگى، دەنساۋلىق ساقتاۋ مينيسترلىگى، س. اسپاندياروۆ اتىنداعى مەديتسينالىق ۋنيۆەرسيتەت اراسىندا ءۇشجاقتى مەموراندۋم جاسالدى. ءوڭىر باسشىسى «100 مەكتەپ، 100 اۋرۋحانا» باعدارلاماسىنىڭ ىسكە اسىرىلۋ ماسەلەسىن قوزعاپ، وبلىس اۋماعىندا 30 مەديتسينالىق مەكەمە سالىنىپ جاتقانىن، ال 20 عيماراتقا كۇردەلى جوندەۋ جۇرگىزىلەتىنىن ايتتى.

سونداي- اق ا. مۇساحانوۆ وبلىستىڭ جەتەكشى دارىگەرلەرىنە «قۇرمەت گراموتالارى» مەن «العىس حاتتاردى» تاپسىردى. سالتاناتتى جيىننىڭ ەڭ باستى وقيعاسى «جىلدىڭ ۇزدىك دارىگەرى» نوميناتسياسى قورىتىندىسىنىڭ شىعارىلۋى بولدى. بيىلعى جىلى ۇزدىك مامان تالدىقورعانداعى قالالىق ەمحانانىڭ تەراپيەۆت دارىگەرى سايا قابدىراحمان اتاندى. وبلىس اكىمى جەڭىمپازعا وتاندىق ءونىم «شيەۆرولە كرۋز» كولىگىنىڭ كىلتىن تابىستادى. سونداي- اق ءوڭىر باسشىسى دەنساۋلىق ساقتاۋ باسقارماسىنىڭ باسشىسىنا 50 «حيۋنداي» جەدەل جاردەم كولىگىنىڭ كىلتىن تابىستادى.

ءىس- شارا وبلىستىڭ شىعارماشىلىق ۇجىمدارىنىڭ كونسەرتتىك باعدارلاماسىنا ۇلاستى.