جىراقتا جۇرگەن قانداستارىمىز تاعى دا ونەردىڭ ورىنەن كورىندى
1000 نان استام ۇمىتكەردىڭ اراسىنان دارا شىققان اينۇردىڭ بۇل - ەڭ ۇلكەن جەڭىسى.
اينۇر - شىنجاڭنىڭ ءۇرىمجى قالاسىنىڭ تۋماسى. ۇلتتار مادەني مۇراسىن زەرتتەۋدى كاسىپ ەتكەن. شىنجاڭ جازۋشىلار وداعىنىڭ مۇشەسى. قىتاي تىلىندە جازىپ، حانزۋلىقتاردىڭ وزىنەن اسىپ تۇسكەن از قازاقتىڭ ءبىرى. اينۇر ولەڭ مەن پروزالىق شىعارمالار جازۋدى قاتار يگەرگەن. قازاقتىڭ ۇلى عۇلامالارىنىڭ تۋىندىلارىن قىتاي تىلىنە اۋدارادى. قالامگەرلەر اراسىنداعى بايقاۋلاردا ۇزدىك شىعىپ، تالاي ماراپاتتارعا يە بولعان اينۇردىڭ قالامى قارىمدى جازۋشى ەكەنىن كۇللى قىتاي جۇرتى مويىنداپ وتىر. دەگەنمەندە، مەملەكەتتىك سىيلىقتىڭ يەگەرى بولامىن، دەپ ويلاماعان ەكەن.
اينۇر ماۋلەتبەك قىزى، جازۋشى، قىتاي مەملەكەتتىك سىيلىعىنىڭ يەگەرى:
جۇرەكتەن شىققان جىر جۇرەككە جەتەدى، دەپ ايتامىز. بۇل مەنىڭ جۇرەگىمنىڭ تۇبىنەن شىققان تۋىندى بولعاندىقتان، كوپشىلىك تە ونى جاقسى قابىلداعان بولار. ەشكىمگە بىلدىرمەي، شىعارمامدى حات ارقىلى ۇسىندىم. ءبىراق، ناتيجەسى وتە جاقسى بولدى. شىنىمدى ايتسام، ءالى كۇنگە دەيىن ءوڭىم بە، ءتۇسىم بە، دەپ، ءوز- وزىمە سەنە الماي ءجۇرمىن.
اينۇر - وتباسىنداعى بالالاردىڭ ەڭ ۇلكەنى. سوندىقتان، اتا- سالت بويىنشا قاريالاردىڭ قولىندا وسكەن. اينۇردىڭ العىر بولىپ ادەبيەتكە يكەمدەلىپ وسۋىنە اجەسى قاماريانىڭ سىڭىرگەن ەڭبەگى مول. اجەسىنىڭ ءتالىم- تاربيەسى ارقىلى قازاقتىڭ اڭىز- ەرتەگىلەرى مەن ولەڭ- جىرلارىنا جاس كەزىنەن سۋسىنداپ ءوستى. اينۇردىڭ اتىن ۇشپاققا شىعارعان «اپا» رومانى وسى قاماريا قارتقا ارنالعان.
بۇل شىعارمادا قارشاداي قىزدىڭ اق سامايلى اپاسىنا دەگەن ماحابباتى، ەسەيگەن كەزدەگى بالالىق شاققا، اجەسىنە دەگەن ساعىنىشى سيپاتتالادى. ومىردەن الىنىپ، ونەرلى قىزدىڭ ءوز قالامىمەن ورنەكتەگەن تۋىندىسى 56 ۇلت وكىلى تالاسقان بايگەنى يەلەنۋى - عاجاپ جەتىستىك، كەرەمەت تابىس.
اينۇردىڭ اجەسىنە دەگەن ساعىنىشى ءبىر ساتكە دە سايابىرسىعان ەمەس. اپاسىن ويلاعان ساتتەردە ونىڭ شابىتى شالقيدى. سونداي تەبىرەنگەن ساتتەردە قولىنا قالام الىپ، جازۋشى قىز قالىڭ قاۋىم مويىنداعان بىرنەشە شىعارمالاردى دۇنيەگە اكەلدى. الدا ءالى دە تالاي- تالاي شىعارمالار جازسام، دەگەن ويى بار.
داۋرەن باۋىرجان ۇلى
