بەرليندە وتكەن كىشى قۇرىلتايدا ەۋروپا قازاقتارى باس قوستى

استانا. قازاقپارات - 7-8 - ماۋسىم كۇندەرى گ ف ر- داعى ق ر ەلشىلىگىنىڭ جانە ەۋروپا قازاقتارى ەۋروپالىق قوعامداستىعىنىڭ قولداۋىمەن بەرليندە ۇلى بريتانيا، فرانسيا، گەرمانيا، ۆەنگريا، اۆستريا، شۆەيتساريا، شۆەتسيا، دانيا، نورۆەگيا، نيدەرلانديا، تۇركيا سىندى ون ەلدەگى ەتنيكالىق دياسپورانىڭ ءۇش جۇزگە جۋىق وكىلدەرىنىڭ باسىن قوسقان ەۋروپا قازاقتارىنىڭ كەزەكتى كىشى قۇرىلتايى ءوتتى.

بۇل تۋرالى ق ر س ءى م رەسمي سايتىندا حابارلانعان.

قازاقستاندىق دەلەگاتسيانى بۇكىل الەمدىك قازاقتار قوعامداستىعى پرەزيديۋمى ءتوراعاسىنىڭ ءبىرىنشى ورىنباسارى تالعات ماماشيەۆ باسقارىپ كەلدى. ول قۇرىلتايدىڭ سالتاناتتى اشىلۋىنداعى قۇتتىقتاۋ سوزىندە جينالعانداردى مەملەكەت باسشىسىنىڭ «قازاقستان جولى - 2050: ءبىر ماقسات، ءبىر مۇددە، ءبىر بولاشاق» اتتى قازاقستان حالقىنا جولداۋى اياسىنداعى ەلىمىزدىڭ زاماناۋي وزەكتى دامۋىمەن تانىستىردى.

قازاقستاننىڭ گەرمانياداعى ەلشىسى نۇرلان ونجانوۆ ءوز كەزەگىندە انا ءتىلىن ساقتاۋ جانە دامىتۋ، مادەنيەت جانە ۇلتتىق سالت- ءداستۇردى، تاريحي وتانىمەن بايلانىسىن نىعايتۋ سياقتى ماسەلەلەرىندەگى گ ف ر- داعى قازاق دياسپوراسىنىڭ بەلسەندى ءرولىن اتاپ ءوتتى. وسى رەتتە قازاقستاندىق ديپلومات بەرليندە قازاق ادەبيەتىنىڭ كلاسسيكتەرى مەن زامانداستارىمىزدىڭ شىعارمالارى قويىلعان كىتاپحاناسى بار قازاق مادەني ورتالىعىنىڭ اشىلعانىن جەتكىزدى.

 ونىڭ ايتۋىنشا، وندا وتانداستارىمىزعا تاريحي وتانىندا بولىپ جاتقان بارلىق وقيعالاردان حاباردار بولىپ وتىرۋ ءۇشىن قازاقستاندىق جۋرنالدار مەن گازەتتەر، وقۋلىقتار، سوزدىكتەر، مەملەكەتتىك ءتىلدى وقىتۋعا ارنالعان وقۋ- ادىستەمەلىك قۇرالدار، سونىمەن قاتار باسپا ءسوز جانە ەلىمىز تۋرالى تانىمال ەلەكتروندىق ونىمدەر ۇسىنىلادى. قازاق مادەنيەتىن گەرمانيادا ناسيحاتتاۋعا قازاق فيلمدەرىنىڭ «التىن جيناعى» دا ءوز ۇلەسىن قوساتىن بولادى. وسى باعىتتاعى تاعى ءبىر ماڭىزدى جوبا - بەرليندەگى گۋمبولد ۋنيۆەرسيتەتى جانىندا اشىلعان «قازاقستان جانە قازاق ءتىلى» اتتى لەكتورات قىزمەتى بولىپ تابىلادى.

ەۋروپالىق قازاقتار قوعامداستىعىنىڭ باسشىسى ابدۋل كايۋم كەسيچي ءوز سوزىندە ەۋروپالىق وتانداستاردىڭ باسقوسۋلارىن وتكىزۋ سوڭعى ون جىلدا جاقسى داستۇرگە اينالىپ وتىرعانىن تىلگە تيەك ەتتى. ونىڭ پىكىرىنشە، باستى ماقسات - ءوز ەلىنىڭ ۇلتتىق مۇراسى مەن مادەنيەتىن جاس بۋىن وكىلدەرىنىڭ ەسىنە سالۋ. مۇنداي كەزدەسۋلەردىڭ تاريحي وتانىنان شالعايدا تۇراتىن قازاقتار ءۇشىن ۇلكەن ماڭىزى بار. ەڭ باستىسى، وسىنداي قۇرىلتايلاردىڭ وتانداستار ءۇشىن اسا وزەكتى ماسەلەلەردى كوتەرىپ، ولاردى شەشۋگە مۇمكىندىك بەرەتىن ورىنعا اينالعاندىعى.

قۇرىلتاي شەڭبەرىندە جاستار اراسىندا قازاق ءتىلىن، تاريحىن جانە مادەنيەتىن بىلەتىندىگىن تەكسەرۋگە باعىتتالعان ءتۇرلى بايقاۋلار، «قازاقشا كۇرەس» ۇلتتىق كۇرەسىنەن جانە فۋتبولدان سايىستار، سۋرەتتەر كورمەسىنىڭ اشىلۋى، سونىمەن قاتار بالالار مەرەكەسى وتكىزىلدى. ەلشى ن. ونجانوۆ وسى جارىستاردىڭ جەڭىمپازدارى مەن لاۋرەاتتارىن باعالى جۇلدەلەرمەن، ەستەلىك سىيلىقتارمەن ماراپاتتادى.

كەلەلى باسقوسۋ سوڭىنداعى «سەرىلەر» مۋزىكا توبىنىڭ ورىنداۋىنداعى ءداستۇرلى جانە زاماناۋي مۋزىكا مادەنيەتىنىڭ ۇزدىك شىعارمالارى اتالعان شاراعا ەرەكشە ۇلتتىق ناقىش بەردى.