بۋرابايدا كوكجال ءجۇر

قازىرگى تاڭدا ءتۇز تاعىسى ءبىراز اۋىلداردىڭ قۇتىن قاشىرىپ وتىر. كوكشەنىڭ كوكجالى اتانعان «تاس قاپقىر» زەرەندى اۋدانىنىڭ مولودەجنىي اۋىلى مەن بۋراباي اۋدانىنا قاراستى قىزىلاعاش سەلولىق وكرۋگىنىڭ جىلقىسىنا شاۋىپ، مازا بەرەر ەمەس دەگەن الىپقاشپا اڭگىمەلەر اۋدان تۇرعىندارى اراسىندا ءجيى تاراي باستادى.
بۇل تۋرالى اۋداندىق، وبلىستىق گازەتتەر دە جارىسا جازا باستادى. اۆتورى اۋداندىق گازەتتىڭ ءتىلشىسى جەڭىس كارىپ دەپ كورسەتىلگەن.
وندا: «بۇل ۋاقىتتا ءتۇز تاعىسى مۇنداي قورقاۋلىققا بارماۋ- شى ەدى.. . ءسىرا، وشىككەن قاسقىر بولۋى كەرەك. سەبەبى، ادامنان جاسقانۋدى بىلمەيدى. جىلقىشىنىڭ كوزى تايسا بولدى، بيەلەردىڭ جاڭادان تۋىلعان قۇلىندارىن جاۋكەمدەپ، اقىرىن جىلىستاي جونەلەدى. ءتىپتى، قىزىلاعاشتىقتار تاڭەرتەڭگىلىك مەزگىل اۋدان ورتالىعىنا بارا جاتقاندا بۇركىتتى تاۋىنىڭ ەتەگىنەن بۇلكىلدەپ شىعىپ، بۋرابايدى بەتكە الىپ بارا جاتقان جالى كۇدىرەيگەن كوكجالدى بىرنەشە رەت كورىپتى- مىس.
ال جىلقىشىلاردىڭ ايتۋىنا قاراعاندا، ابىلاي حان اۋىلىنىڭ جاڭا تۋعان قۇلىندارىنا بىرنەشە رەت اۋىز سالعان. كورشىلەس مولودەجنىي اۋىلىنىڭ وننان اسا جىلقىسىن مەرت ەتكەن. ءسىرا، ول بۇلاي تايراڭداي بەرەتىن بولسا، قامبار اتامىزدىڭ ءزاۋ- زاتىنا ءھام جىلقى مالىنا ودان سايىن اۋىزدى سالا بەرمەك. كوكجالدىڭ باسىنا بايگە دە تىگىلگەن. ەگەر كىمدە- كىم ونى اتىپ نەمەسە سوعىپ السا، ءسۇيىنشىسى دايىن.
بۇل «تاس قاپقىردىڭ» نەگە وسىنشاما قورقاۋلىققا بارىپ تۇرعانى بەلگىسىز. اركىم ءار ءتۇرلى بولجايدى. وسىدان ەكى جىل بۇرىن ءۇيىرلى قاسقىردى اڭشىلار اتقان كورىنەدى. وقتان سىتىلعان قاسقىردىڭ ءبىرى وسى كوكجال بولۋى كەرەك.
ەندى، مىنە، ءوش الماي قويمايتىن ءتۇرى بار. قىرداعى اعايىننىڭ جىلقىسىن جاۋكەمدەپ جاتىر. اڭشىلار دا ءبىراز الەككە تۇسۋدە.
بۇل كوكجال جورتۋىلىن جالعاستىرا بەرەتىن بولسا، قاندى اۋىزىن ءالى دە مايلاي تۇسپەك. تۇزدەگى جىلقىنى بىلاي قويىپ، اۋىل قوتانىنا كىرىپ، تال تۇستە مالدى دا، ءتىپتى كەرەك بولسا، جاندى دا جايراتۋى ابدەن مۇمكىن. ءتورت تۇلىكتىڭ تورەسىنىڭ توبەسىنە شۇيلىگىپ تۇرعان ونىڭ كوزى قۇرىماسا، كوكجالدىڭ باسى قۇلىندى بيە ەمەس، تەمىر تۇلپارعا باعالانۋى مۇمكىن» ، - دەپ جازىلعان «ارقا اجارى» گازەتىندە.
PS: وسى ورايدا، بىزدە بۋراباي اۋداندىق ىشكى ىستەر بولىمىنە (ساقشىعا) حابارلاسقان بولاتىنبىز. ونداعىلار بۋراباي اۋدانىندا قاسقىردىڭ تايراڭداپ جۇرگەنىن بىزدەن ەستىپ، اڭ- تاڭ بولىپ، «بار» نە «جوق» دەپ ماردىمدى جاۋاپ قايىرا المادى.
اۆتور: اسلان وسپانوۆ