قانات يسلامنىڭ ارتىنان قيسانى دا قيىر اسىرامىز با؟

استانا. قازاقپارات - سپورتتىڭ جولدان قوسىلا كەتۋگە كەلمەيتىن ءبىر سالاسى -  كۇرەس. باپ پەن باقتان باسقا، اتانىڭ قانى، انانىڭ ءسۇتى ارقىلى دارىعان اقىل-سانا، ءىرى دەنەلى بولۋدىڭ ماڭىزى جوعارى.

وسى سالادا جاۋىرىنى جەرگە تيمەي جۇرگەن ءبىر بالۋانىمىز -  قيسا قابي ۇلى.

قيسا اتاجۇرتقا كورشى قىتاي ەلىنەن كەلگەن قانداسىمىز. تۋىلعاندا 6,5 كيلوگرام بولىپ ەل-جۇرتتى ەلەڭ ەتكىزگەن.

ول 1988 - جىل بولاتىن. وعان دەيىن اتا-اناسى 13 جىل بويى ءبىر پەرزەنتكە زار بولىپ كەلگەن. ءسويتىپ، جارىق دۇنيەگە كەلە سالىسىمەن نازارعا ىلىككەن قيسانى باپكەرلەر بالا كۇنىندە اتا-اناسىنان قولقالاپ الادى، قىتايدىڭ قيىر شەتىندەگى لانجۋ قالاسىنا وقۋعا جىبەرەدى.

وسىلاي 13 جاسقا تولماستان بەلدەسۋدىڭ قىر-سىرىن مەڭگەرۋگە كىرىسكەن قيسا 2003 - جىلدان بەرى بوز كىلەمنىڭ ۇستىندە. العاشقى جەڭىستىڭ اسقاق سەزىمىن اۋىلدان باستاعان بالۋان 4  جىلدا ءبىر رەت وتەتىن قىتايدىڭ ىشكى بىرىنشىلىگىندە 96 كيلوگرام سالماقتا توپ جاردى.

قىتايدىڭ ۇلتتىق قۇراماسىنىڭ قاتارىندا 3  جىل ونەر كورسەتتى. شينجاڭ وڭىرىندە وعان دەيىن ەشكىم وسى مارەگە جەتپەگەن ەكەن. وسىلاي قارسىلاستارىن قوعاداي جاپىرىپ جۇرگەندە الماتىدا وتكەن كەزەكتى جارىستا قارسىلاسىنىڭ وقىس قيمىلىنان اياعىنىڭ ءسىڭىرى ءۇزىلىپ، توعىز اي بالداققا سۇيەنىپ قالادى. ءسويتىپ، بۇرىندارى ءوزى ويقاستاپ جۇرگەن شارشى الاڭدى سىرتتاي تاماشالاۋعا تۋرا كەلەدى.

اقىرى دەنساۋلىعى قالپىنا كەلگەن سوڭ ەلگە كەلۋدى ويلايدى. قازاقتىڭ گۇرزى جۇدىرىقتى وعلانى قانات يسلامنىڭ شاقىرۋى قامشى بولىپ، اتا-باباسى كۇل توككەن كيەلى مەكەنگە تارتىپ بەرەدى. بۇگىندە الماتى وبلىسى بالۋاندارىنىڭ ساپىندا ەركىن كۇرەس پەن قازاقشا كۇرەستەن ونەر كورسەتىپ جۇرگەن. سالماعى 140 كيلوگرام، بويى 190 سانتيمەتر.

اڭگىمە بارىسىندا قيسا كاسىپكەر اعالارى باۋىرجان وسپانوۆ پەن ارمان وڭعاربەكتىڭ قارجىلىق جاعىنان كومەك قولىن سوزعانىن ايتتى. ەركىن كۇرەستەن باپكەرى مالىك نادىربەك ۇلى، قازاقشا كۇرەستەن ايدىن سماعۇلوۆتان ءتالىم الدى.

مىنە، قىتايدىڭ قىرىق قامالىن ارتقا تاستاپ، بار ءۇمىتىن ارقالاپ كەلگەن ازاماتتىڭ بۇگىندە جولى كەسىلگەندەي بولىپ وتىر. «قازاقستان بارىسىنىڭ» ىرىكتەۋ سىندارىنا قاتىسىپ، قارسىلاستارىن ايقىن باسىمدىلىقپەن جەڭسەدە، جەڭىس تۇعىرىنا كوتەرىلە المادى. مۇمكىن بيوگرافياسى، مۇمكىن گەوگرافياسى كەلمەدى. قالاي دەگەنمەن تۇيە بالۋاننىڭ تۇيمەدەي ءۇمىتى سەلگە كەتكەندەي بولدى.

قازاقتىڭ نامىس نايزاعايىنداي جارق ەتكەن قانات يسلامنىڭ دا قادىرىن ءبىلىپ پە ەدىك. مۇحيت اسىپ، قيىر جايلايتىن ەندىگى كەزەك قيساعا كەلدى مە؟ «الدە الىستان كەلگەن اعايىن ەدى» دەپ «قازاقستان بارىسىنا» قاتىستىرۋدى تاعى ءبىر تارازىعا سالىپ كورەمىز بە؟

ءسىز نە دەيسىز، مارتەبەلى وقىرمان!

اۆتور: ەرلان تولەۋباي

Abai.kz