دارىگەرلەر قاعازباستىلىقتان ارىلادى

استانا. قازاقپارات - بۇگىندە مەديتسينادا «اۋرۋدىڭ الدىن الۋ، يننوۆاتسيالىق ادىستەرى قولدانۋ» نەگىزگى ماسەلەگە اينالدى.

ودان شىعاتىن قورىتىندى - حالىقتىڭ دەنساۋلىعىن ساقتاپ قالۋ.

وسى كۇندەرى الماتى قالاسىندا ماۋسىمنىڭ 3 مەن 6 ارالىعىندا ءوتىپ جاتقان تەراپيەۆتەردىڭ I ەۋرازيالىق سەزى مەن قازاقستان رەسپۋبليكاسى كارديولوگتارىنىڭ VI كونگرەسىنە جينالعانداردىڭ كوزدەگەنى وسى.

فورۋمعا كورشى ەلدەر مەن شەتەلدەردەن مىڭنان ارتىق ادام جينالعان. ونىڭ ىشىندە يتاليا، جاپونيا، اۆستريا، رۋمىنيا، پولشا، ۋكراينا جانە ت م د ەلدەرىنەن جەتەكشى عالىمدار، ەلىمىزدىڭ بارلىق وڭىرلەرىنىڭ دەنساۋلىق ساقتاۋ باسشىلارى، كارديولوگتار، تەراپيەۆتەر ات تەرلەتىپ جەتتى.

ءبارىنىڭ دە ماقساتى - مەديتسينانى دامىتا وتىرىپ، حالىققا ساپالى ەم كورسەتۋ. مۇندا جينالعان ماماندار العاشقى كۇنىنەن-اق ىشكى مەديتسينا جانە ينتەرۆەنتسيالىق كارديولوگيا سالاسى بويىنشا شەبەرلىك-سىنىپتارىن وتكىزدى.

4 كۇن ىشىندە تەراپيەۆتىك جانە كارديولوگيالىق قىزمەتتى ۇيىمداستىرۋ، تەراپيەۆتىك نەگىزگى جۇرەك-قان تامىر اۋرۋلارىن دياگنوستيكالاۋ، ەمدەۋ جانە الدىن الۋداعى جاڭا مەديتسينالىق تەحنولوگيالار، مساك (مەديتسينالىق-سانيتارلىق العاشقى كومەك) دەڭگەيىندە ەمدىك-دياگنوستيكالىق كومەك كورسەتۋ، نەگىزگى كارديولوگيالىق جانە تەراپيەۆتىك اۋرۋلاردى وڭالتۋ مەن الدىن الۋ ماسەلەلەرى، زەرتحانالىق جانە فۋنكتسيونالدىق دياگنوستيكاداعى يننوۆاتسيالاردىڭ ماسەلەلەرى تالقىلانۋدا.

ماسەلەن، دۇنيەجۇزىلىك تەراپيەۆتەر قوعامىنىڭ پرەزيدەنتى رودولفو بادونىڭ ايتۋىنشا، بۇگىندە قازاقستان مەديتسيناسىنداعى پروبلەمالار باسقا دا ەلدەردە كەزدەسەدى. سونداي-اق شەشىمىن بىرگە ىزدەۋ قاجەت دەگەن ورتاق جۇمىستار دا بار.

ال اتالمىش كونگرەسس ءار قيىردان جينالعان مامانداردىڭ تانىسىپ-بىلىسۋىنە، يننوۆاتسيالىق ادىستەرىمەن بولىسۋىنە مۇمكىندىك بەرەدى. «بالالار جۇرەگى» قاۋىمداستىعىنىڭ پرەزيدەنتى روبەرتو فەرراري قازاقستاننىڭ جاقىندا ەۋروپالىق كارديولوگتار قاۋىمداستىعىنا مۇشە بولعانىن جانە الداعى ۋاقىتتا ەلىمىزدىڭ قاۋىمداستىقتىڭ بارلىق شارالارىنا قاتىسا الاتىنىن ايتىپ ءوتتى.

- ەۋرازيالىق قۇرىلىمعا قازىر 10 ەل كىرىپ وتىر. ارينە، «بىرىگىپ كوتەرگەن جۇك جەڭىل عوي» ، ياعني ەڭ باستىسى، ءبىز كۇش بىرىكتىرە وتىرىپ، ورتاق پروبلەمالارىمىزدى شەشە الامىز.

قازىرگى تاڭداعى ەڭ ماڭىزدى نارسە - پروفيلاكتيكا. ياعني بىرىگە وتىرىپ، اۋرۋدىڭ الدىن الۋ تەتىكتەرىن ىزدەپ، بىرگە جۇمىس ىستەيتىن بولامىز. ويتكەنى بىزدەگى ماقسات - پروفيلاكتيكا، ەمدەلۋدى وڭتايلاندىرۋ، ءولىم-ءجىتىمدى ازايتۋ، ءومىر ءسۇرۋ جاسىن ۇلعايتۋ دەگەن پروبلەمالارعا قاتىستى سۇراقتاردىڭ شەشىمىن تابۋ، - دەيدى روبەرتو فەرراري.

مۇنداعى ماماندار حالىق ءوز دەنساۋلىعىنا جاۋاپكەرشىلىكپەن قاراسا ەكەن دەگەن نيەتتە. ق ر د س م مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى اجار تولەعاليەۆا ءدارى-دارمەكتى ساۋاتتى پايدالانۋ وتە ماڭىزدى ەكەنىن العا تارتتى.

«دارىلىك پرەپاراتتاردى دۇرىس قولدانباۋدىڭ ءوزى كوپتەگەن اۋرۋدىڭ پايدا بولۋىنا سەبەپشى. كەز كەلگەن ءدارىنى دارىگەردىڭ كەڭەسىن الماي ىشۋگە بولمايدى. سول ءۇشىن د س م بۇگىندە ەلىمىزدىڭ بارلىق ايماعىندا دارىلىك اقپاراتتىق ورتالىقتار اشىپ وتىر. ول جەرلەردە دارىگە قاتىستى تەگىن اقپارات بەرەدى.

ودان باسقا، الەۋمەتتىك از قامتىلعان جاندارعا تەگىن ءدارى-دارمەك بەرىلەدى. مىسالى، قازىر «ينفەكتسيالى ەمەس سوزىلمالى اۋرۋلاردى قولعا الۋ» باعدارلاماسى جۇزەگە اسپاقشى. سونىڭ اياسىندا جۇرەك فۋنكتسياسىنىڭ سوزىلمالى جەتكىلىكسىزدىگى، ارتەريالدىق گيپەرتونيا جانە قانت ديابەتى اۋرۋلارىنا كوڭىل بولىنبەك.

بۇل كەزەكتە دە جۇرەك قان-تامىرلارى اۋرۋلارىنىڭ زاردابىن شەگىپ جۇرگەندەر تەگىن دارىلەرمەن قامتاماسىز ەتىلەدى» دەيدى ول. سونداي-اق تاعى ءبىر سوزىندە قاعاز تولتىرۋدان بوساي الماي قالىپ جاتاتىن دارىگەرلەر 2015 - جىلعا قاراي قاعازباستىلىقتان ارىلاتىندىعىن دا اتاپ ءوتتى. دەمەك، بارلىعى ەلەكتروندى تۇردە جۇرگىزىلەتىن بولادى، ءاربىر ادامنىڭ ەلەكتروندى پاسپورتى جاسالماق. سول ءۇشىن دەنساۋلىق ساقتاۋ مينيسترلىگى تاراپىنان دەنساۋلىق ساقتاۋدىڭ ءبىرىڭعاي اقپاراتتىق جۇيەسى دە قۇرىلىپ جاتىر ەكەن.

مىرزاحمەتوۆا نۇرسۇلۋ

«ايقىن»