قالايسىڭ؟ نەمەسە سالەمدەسۋدىڭ جاڭا ءتۇرى

استانا. قازاقپارات - ءوز ارامىزدا كۇن سايىن ارالاسىپ جۇرگەن كەيبىر جاستار اراسىندا ءبىر-بىرىمەن نەمەسە جاسى ۇلكەندەرمەن سالەمدەسۋ ءداستۇرىنىڭ بىرنەشە رەت كۋاسى بولدىم. «قالايسىڭ!» نەمەسە «قالايسىز!» دەپ جاتادى.

«ە-ە، بۇل سالەمدەسۋدىڭ مەن بىلمەيتىن جاڭادان شىققان ءتۇرى بولار» دەپ، قازاق ءتىلى ەنتسيكلوپەدياسى مەن سوزدىكتەرىن قاراپ شىقتىم، تابا المادىم.

كەنەتتەن ەسىمە ساپ ەتە قالماسى بار ما، ول قازاق جاستارىنىڭ اعىلشىن تىلىنە دەگەن كوڭىل قۋانتارلىق قۇشتارلىقتان تۋىنداعان سالەمدەسۋ ءداستۇرى ەكەن. ولاي ايتۋىمنىڭ سەبەبى دە، دالەلى دە بار. اعىلشىن تىلىندە سالەمدەسۋدىڭ كەڭ تاراعان ءتۇرى «How are you!» ەكەنى بەلگىلى، بۇنى قازاقشاعا تارجىمەلەسەك، «قالايسىڭ سەن، قالايسىز ءسىز!» بولىپ شىعا كەلەدى. ءبىراق ءبىزدىڭ جاستار سالەمدەسۋدى «قالايسىڭ!» دەپ قىسقارتۋ ارقىلى اعىلشىنداردى ارتقا تاستاپ، كوش ىلگەرى كەلەدى جانە گيننەسس كىتابىنا لايىق ءسوز تىزبەگى ەكەنى داۋسىز. «ەكسپو-2017 قارساڭىندا، سالەمدەسۋ ءتۇرىن «قالاي!» دەپ ودان ءارى وپتيميزاتسيا جاساۋ جوسپاردا تۇرعانى ءمالىم بولدى.

شارۋالارى باستان اسقان، ۋاقىتتارى وتە تىعىز ادامدارعا «اسسالاۋماعالەيكۇم! ۋاعالەيكۇماسسالام!» دەگەن ۇزىنسونار سالەمدەسۋدەن گورى، «قالايسىڭ!» دەپ وتە شىققان، ارينە، وتە ورىندى.

ءبىراق «اسسالاۋماعالەيكۇم! ۋاعالەيكۇماسسالام!» دەگەن سوزدەردىڭ استارىندا نە جاتقانىن بىلمەيتىن «اسفالتتا» تۋعان جاستاردىڭ شۇبار تىلىنە ەرىپ «اسسالاۋماعالەيكۇمدى» اتىمەن، سىپايى «سالەمەتسىز بە؟» ءسوزىن زاتىمەن جوق قىلىپ الماساق بولعانى دا.

كوپ سوزۋعا ۋاقىت جوق، «قالايسىڭ!»

سوڭعى شىققان جاۋاپ ءتۇرى - «قالاي بولسا، سولايمىن!»

اۆتور: سەرىكباي باسىعارايەۆ

«ايقىن»