سەمىز دەپ العان سوعىمىمىز «القاش» بولىپ شىقتى

استانا.قازاقپارات - الدا قىس مەزگىلىنىڭ دە كوزدى اشىپ جۇمعانشا جەتىپ كەلەرى انىق، سوعان وراي سوعىم سويۋ، سوعىمباسىعا شاقىرۋدىڭ دا قىزاتىن شاعى.

قىس ايىنىڭ قىزىعى دا سول ەمەس پە؟ قوراسىنداعى مالىن سەمىرتىپ سويىپ سوعىم الىپ، الىس جاقىنداعى اعايىن تۋىستى شاقىرىپ ءبىر جىرعاپ قالاتىن ءۇردىستىڭ ۇزىلمەگەنىنە شۇكىر دەيمىز كەيدە.

اۋىلداعى اعايىنعا وڭايىراق قولىنداعى مالىن باپتاپ، باعىمىن كەلىستىرسە، سوعىمى دا سوعان ساي بولادى. ال قالاداعى اعايىن سول اۋىلدىقتارعا تەلمىرۋلى. اۋىل- ايماقتاردان جەتكىزىلگەن سوعىمعا قول جەتكىزسە قۋانادى. ال سوعىم دەپ العانى سورلاتىپ وتىرسا شە؟ بۇل باسقا ماسەلە.

كەزىندە اۋىلدىقتاردىڭ ءبىرازى بورداقى «بيزنەسىمەن» اينالىسىپ، ءبىراز قوڭ جيناپ العانى بار. بۇگىندە ءدالى وسى بيزنەس ءتۇرى بانكروتقا ۇشىراپ تۇر. ويتكەنى مال ازىعىنىڭ قىمباتتاۋى وسى بيزنەستىڭ اياعىن تۇساۋلاپ وتىر. بيىل قۇرعاقشىلىق بولىپ جەم- ءشوپتى دۇرىستاپ جيناپ الا المادى. ونىڭ ۇستىنە قولعا قاراعان مالعا بەرەتىن جەمنىڭ دە باعاسى اسپانعا ۇشىپ كەتكەن. ءبىر «پرەس» ءشوبىڭىز 400 تەڭگەدەن اسىپ جىعىلادى. ءبىر قاپ بيداي ساتىپ الۋ ءۇشىن بىلتىرعىدان ەكى ەسەگە شىعىندانۋعا تۋرا كەلەدى. سول سەبەپتەن سوعىمنىڭ كۇيىن كۇيىتتەگەندەر ءتۇرلى قۋلىقتارعا بارۋدا. اراق شاراپ زاۋىتىنىڭ قالدىعىنا قۇدا تۇسۋشىلەر كوپ. ياعني بيدايدىڭ قالعان سىعىندىسىن ارزانعا الىپ، مالىن جەمدەپ جۇرگەندەر جەتەرلىك. ول «وتحودتى» جەگەن مال ءوز- وزىنەن ماڭگىپ، «ماس» بوپ جۇرەدى. ءارى تەز قوڭ جينايتىن كورىنەدى. ءبىراق مايى شىلقىعان ەتىڭىزدىڭ ەشقانداي ماڭىزى دا ءدامى دە بولمايدى. مۇنداي ەتتى كوپشىلىك ايىرا المايدى. كادىمگى ءشوپ پەن تازا جەمگە بورداقىلانعان مالدىكى سياقتى ءدامدى دە ءنارلى بولمايدى. وسىنداي سوعىمعا ۇرىنىپ سان سوعىپ قالىپ جاتقاندار كوپ.

مۇنداي ادىسپەن بورداقىلانعان مالدىڭ تاعى ءبىر مينۋسى بار. اۋىلداعى ءبىر اعايىن بازاردان جىلقى ساتىپ العان ەكەن. ۇيگە اكەلگەن سوڭ الگىسى ءشوپتى اۋزىنا المايدى دەيدى. اقىرى اشتان ولۋگە بارعان سوڭ اۋزىن اشىپ قاراسا ءبىر ءتىسى جوق ەكەن. ماسەلەنىڭ مانىسىنە تەرەڭىرەك ءۇڭىلىپ، «زەرتتەپ» كورگەن كوكەمىز تاڭ قالىپ جاعاسىن ۇستاماسقا شاراسى قالماپتى. سويتسە الگى جىلقىنى تەك اراق زاۋىتىنان قالعان بىلامىقپەن باققان ەكەن. ونى تەك جالاپ جەيتىن بولعاننان كەيىن جىلقىنىڭ اۋزىنداعى ءتىسىنىڭ ءبىرى قالماي ءتۇسىپ قالىپتى. ال ءشوپ جەۋ اتتىڭ تىسىنە «فيززاريادكا» بولادى ەكەن. ءيا وسىنداي قىزىقتار كوپ. سونىمەن قاتار جاعا ۇستاتار جاعداياتتارى دا جەتەرلىك. سەمىز مالىن سوعىمعا وتكىزۋ ءۇشىن قانداي قۋلىققا بارۋدان دا تارتىنباق ەمەس بۇگىنگىلەر.

 تاعى دا ءبىر اۋىلداعى اعايىن قاراقۇرت جەگەن مال تەز سەمىرەدى دەگەندى ەسىتىپ الگىنى ازەر تاۋىپتى. سىرىڭكەنىڭ قورابىنا سالىپ ۇيىنە اكەلگەن سوڭ مالىنا بەرۋدى ۇمىت قالدىرسا كەرەك. اقىرىندا الگى قاراقۇرتى ءوزىن شاعىپ الىپ اجال اۋزىنان قالىپ ەدى.. . وڭتۇستىكتەگى تولە بي اۋدانىنا قاراستى قارابۇلاق اۋىلىنداعى مال بازارىنا بارساڭىز مال سەمىرتۋدىڭ نەشەاتاسىن ەستيسىز. وسىنداعى مال بازارىندا قىتاي ەلىنەن كوشىپ كەلگەن اعايىندار تاعى ءبىر بيزنەستىڭ كوزىن اشىپتى. مال سەمىرتۋدىڭ ءتيىمدى ءتاسىلىن بىلەتىن كورىنەدى. شپريتسكە قۇيىلعان سۇيىقتىق ساتا باستاعان. ونى بەلگىلى ءبىر ۋاقىتىندا مالعا سالسا ءبىر اپتانىڭ ىشىندە- اق قارنى اينالىپ قوڭ جيناپ شىعا كەلەتىن كورىنەدى. ال تاعى ءبىر اپتا وتكەن سوڭ الگى ءدارىنى تاعى دا سالسا ودان بەتەر ماي باسىپ جۇرە الماي قالاتىن كورىنەدى. قازىردىڭ وزىندە الارماندار از ەمەس ەكەن. ال ول قانداي ءدارى، زيان ەمەس پە؟ ادام اعزاسىنا قانشالىقتى قاۋىپسىز؟ ونى تەرگەپ، تەكسەرىپ جاتقان ەشكىم جوق. سەمىز سوعىم جەيمىن وسىندايلارعا ۇرىنىپ قالماساق دەڭىز.. .

 

اۆتور: جاينا جۇماش

«الاش ايناسى»