جۇرگىزۋشى كۋالىگىن بەرۋدى قارۋ بەرۋمەن تەڭەستىرۋ قاجەت

  استانا. قازاقپارات - قازاقستاندا جۇرگىزۋشى كۋالىگىن بەرۋدى قارۋ بەرۋمەن تەڭەستىرۋ قاجەت. پارلامەنت ءماجىلىسىنىڭ دەپۋتاتى ەرسۇلتان بەكتۇرعانوۆ پرەمەر- مينيسترگە جولداعان دەپۋتاتتىق ساۋالىندا وسىنداي ۇسىنىس ايتتى.

 «جۇرگىزۋشى كۋالىگىن الۋ كەزىندەگى ەمتيحانداردىڭ، اسىرەسە جۇرگىزۋشى كۋالىگىنەن ايىرىلۋىنا بايلانىستى كولىك جۇرگىزۋشىلەر قايتا تاپسىراتىن ەمتيحانداردىڭ ساپاسىن باقىلاۋدى كۇشەيتۋ قاجەت.

جۇرگىزۋشى كۋالىگىن بەرۋ قارۋ بەرۋمەن تەڭەستىرىلۋى كەرەك، ويتكەنى ماس كۇيدەگى ادام نەمەسە ديلەتانت باسقارعان اۆتوموبيل قىلمىسكەردىڭ قولىنداعى قارۋمەن بىردەي. سونىمەن قاتار، كولىك جۇرگىزۋدى باعالاۋ ءراسىمىنىڭ اشىقتىعى جانە سىبايلاس جەمقورلىق كورىنىستەرىن بولعىزباۋ ءۇشىن كولىك جۇرگىزۋ بويىنشا ەمتيحاندار قابىلداۋ كەزىندە وقۋ ماشينالارىن بەينەتىركەگىشتەرمەن جاراقتاۋ كەرەك» ، دەيدى دەپۋتات.

 دۇنيەجۇزىلىك بانكتىڭ باعالاۋى بويىنشا قازاقستان جىل سايىن جول اپاتتارى سالدارىنان 600 ميلليارد تەڭگەگە جۋىق قاراجاتتى جوعالتۋدا. 2012-2013 -جىلدارى قازاقستاندا اۆتوموبيلدى ماس كۇيىندە جۇرگىزۋدىڭ  80000 نان استام فاكتىسى تىركەلدى. 2013 - جىلداڭ 37 مىڭعا جۋىق ادام، ال اعىمداعى جىلدىڭ 4 ايىندا عانا  10386 ادام جۇرگىزۋشى كۋالىگىنەن ايىرىلعان.