سپورتشىلار مەملەكەتتىك ءان ۇراندى بىلۋگە مىندەتتەلەدى - زاڭ جوباسى
بۇل تۋرالى ءماجىلىستىڭ جالپى وتىرىسىندا ءمالىم بولدى.
ق ر سپورت جانە دەنە شىنىقتىرۋ اگەنتتىگىنىڭ ءتوراعاسى تاستانبەك ەسەنتايەۆتىڭ ايتۋىنشا، دەنە شىنىقتىرۋ جانە سپورت تۋرالى زاڭنامانى جاڭا رەداكتسيادا دايىنداۋعا نەگىزىنەن قازىرگى زامانعى ۇردىستەردى، سپورت سالاسىنا قويىلاتىن تالاپتاردى ەسكەرە وتىرىپ، جەتىلدىرۋ ماقساتىنان تۋىنداعان.
بۇل رەتتە اگەنتتىك الەمدىك تاجىريبەنى زەردەلەپ، اسىرەسە بۇقارالىق سپورتتى دامىتۋ ماسەلەلەرىن رەتتەۋدىڭ باستى قاعيداتتارىنا نازار اۋدارعان. وسىعان وراي، زاڭ جوباسىنىڭ نەگىزگى ماقساتى دەنە شىنىقتىرۋ مەن سپورتتىڭ تۇراقتى جۇيەسىن جانە وسى سالادا ءتيىمدى مەملەكەتتىك باسقارۋدى قۇرۋدى قاراستىرادى.
بۇدان بولەك، مەملەكەتتىك جانە قوعامدىق ينستيتۋتتاردىڭ ءوزارا بىرلەسكەن ءىس-قيمىلدارىن، دوپينگتىك قۇرالداردى پايدالانۋعا قارسى ارەكەت جانە دەنە شىنىقتىرۋ مەن سپورتتىق ءىس-شارالاردى ۇيىمداستىرۋ جانە وتكىزۋ ءتارتىبىن جۇيەلەندىرۋ بويىنشا قۇقىقتىق تەتىكتەردى بەلگىلەۋ قاراستىرىلادى.
سونىمەن قاتار، زاڭ جوباسىندا دەنە شىنىقتىرۋ مەن سپورت سالاسىنداعى ۋاكىلەتتى ورگاننىڭ قۇزىرەتى ناقتىلانادى. سپورت فەدەراتسيالارىن اككرەديتتەيتىن ينستيتۋت ەنگىزىلىپ، ماتەريالدىق كومەكتى الۋ قۇقىعى بار ادامداردىڭ - پاراليمپيادالىق جانە سۋردليمپيادالىق ويىنداردىڭ چەمپيونى اتانعان مۇگەدەك سپورتشىلاردىڭ ءتىزىمى كەڭەيتىلدى.
بۇدان بولەك، زاڭ جوباسى سپورتشىلارعا ق ر مەملەكەتتىك ءان ۇرانىن بىلۋدى مىندەتتەيدى. «قازاقستان قۇراما كوماندالارىن ءىرى سپورتتىق شارالارعا دايىنداۋ ماسەلەلەرى بويىنشا ۇيىمداستىرۋ كوميتەتىن قۇرۋعا قاتىستى ۇكىمەتتىڭ وكىلەتتىگى كەڭەيىپ وتىر»، - دەيدى ت. ەسەنتايەۆ.
ەسكە سالا كەتەيىك، جاڭا رەداكتسياداعى زاڭ جوباسى بۇگىنگى پالاتانىڭ جالپى وتىرىسىندا ءبىرىنشى وقىلىمدا ماقۇلداندى.
اۆتور: قانات مامەتقازى ۇلى
