قازاقستان مەن قىتاي توتەنشە جاعدايلارمەن بىرلەسە كۇرەسپەك

 استانا. قازاقپارات - بۇگىن ەلوردادا قازاقستان مەن قىتاي ۇكىمەتتەرى اراسىندا توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمگە قول قويىلدى.

اتالعان قۇجاتتى ق ر توتەنشە جاعدايلار ءمينيسترى ۆلاديمير بوجكو مەن ق ح ر-دىڭ ازاماتتىق اكىمشىلىك ۆيتسە-ءمينيسترى لي جيان راسىمدەدى.

اتالعان كەلىسىم قاۋىپتى تەحنيكالىق ۇردىستەر مەن تابيعي قۇبىلىستار مونيتورينگىن، توتەنشە جاعدايلار قاۋپى تونگەن نەمەسە ورىن العان كەزدە الەۋەتتى قاۋىپتى نىساندار مەن قورشاعان ورتانىڭ جاي-كۇيى تۋرالى ءوزارا حاباردار ەتۋ، توتەنشە جاعدايلاردى بولجاۋ تۋرالى اقپارات الماسۋ سالاسىنداعى ىنتىماقتاستىقتى كوزدەيدى.

حالىقتىق توتەنشە جاعدايلار كەزىندەگى ءىس- ارەكەتتەرگە دايىندىق ۇيىمداستىرۋ، ونەركاسىپتىك اپاتتار مەن دۇلەي ءزىلزالالار سالدارىنان ىقتيمال لاستانۋعا بايلانىستى قورشاعان ورتا مەن حالىققا تونەتىن قاۋىپ-قاتەرلەردى باعالاۋ بويىنشا تاجىريبە الماسۋ قاراستىرىلادى.

بۇدان وزگە كەلىسىمدە كومەك كورسەتۋ جونىندەگى توپتاردىڭ مەملەكەتتىك شەكارا ارقىلى ءوتۋ شارتى مەن ولاردىڭ سۇراۋشى تاراپتاردىڭ مەملەكەتتىڭ اۋماعىنا كەلۋى رەجىمىندە، سونىمەن قاتار توتەنشە جاعدايلاردى جويۋ كەزىندە كومەك كورسەتۋ ءۇشىن جاراقتاۋ مەن قامتاماسىز ەتۋ ماتەريالدارىن ەنگىزۋ ءارى شىعارۋ شارتتارى انىق كورسەتىلگەن.

 

اۆتور: مارلان جيەمباي