ورالمان: ازاماتتىق الۋدى قالاي جەڭىلدەتەمىز؟ - كەسكىن - فوتو
دوڭگەلەك ۇستەلگە ەڭبەك جانە حالىقتى الەۋمەتتىك قورعاۋ مينيسترلىگى، كوشى-قون كوميتەتىنەن، استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسى كوشى-قون بولىمىنەن، قوعامدىق ۇيىم وكىلدەرىنەن جانە ورالماندار مەن ب ا ق وكىلدەرى قاتىستى.
دوڭگەلەك ۇستەلدە اڭگىمە بولعان نەگىزگى ماسەلە، ورالمانداردىڭ ازاماتتىق الۋ پروبلەمالارى، تۇراقتى تىركەۋ جانە قازىر ەڭبەك جانە حالىقتى الەۋمەتتىك قورعاۋ مينيسترلىگى دايىنداپ، ارنايى قۇرىلعان جۇمىس توبى مەن پارلامەنت دەپۋتاتتارى تالقىسىنا ءتۇسىپ جاتقان ورالماندارعا ازاماتتىق بەرۋ، تۇراقتى تىركەۋ ەرەجەلەرىن قالىپتاستىرۋ ماسەلەلەرى تالقىعا سالىندى.
دوڭگەلەك ۇستەلدى ورالمانداردىڭ «اسار» قوعامدىق بىرلەستىگىنىڭ ءتوراعاسى قايرات بوداۋحان جۇرگىزىپ وتىردى. ول قازىر تالقىلانىپ جاتقان زاڭ جوباسىنىڭ كوپتەگەن كەمشىلىكتەرىنىڭ بار ەكەنىن ايتا وتىرىپ، اتالعان زاڭ قابىلدانعانعا دەيىن ورالمانداردىڭ ءجۇرىپ-تۇرۋىنىڭ قيىنعا اينالعاندىعىن ءسوز ەتتى.
ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ەتنيكالىق كوشى-قوندى رەتتەۋ باسقارماسىنىڭ باسشىسى مارات توقسامبايەۆ قازىر ۇكىمەتتە دايىندالىپ جاتقان جاڭا زاڭ جوباسىنداعى ەرەكشەلىكتەرمەن تانىستىرا وتىرىپ، جينالعان كوپشىلىكتىڭ ۇسىنىستارىن قابىلداۋعا ءازىر ەكەندىكتەرىن ايتتى. ونىڭ ايتۋىنشا، جاڭا دايىندالىپ جاتقان زاڭ جوباسى بويىنشا، ورالمانداردىڭ ازاماتتىق الۋىن ءبىرشاما جەڭىلدەتۋ كوزدەلگەن.
- الايدا وندا ءالى دە كوپشىلىك تالقىسىنا ۇسىنىلۋى ءتيىس كۇماندى تۇستارى بارشىلىق. ماسەلەن، ورالمان مارتەبەسىنە قول جەتكىزگەننەن كەيىن، بىردەن ق ر ازاماتتىعىن الۋعا ءوتىنىش بەرە المايدى. اۋەلى، ىقتيار حات، ياعني ەل اۋماعىندا تۇراقتى تۇرۋدى راسىمدەيدى، سودان كەيىن عانا ازاماتتىق الۋعا ءوتىنىش بەرەدى. بۇل دۇرىس ەمەس،- دەيدى ول.
استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسى كوشى-قون ءبولىمىنىڭ باسشىسى ۇسىپبەك بەيىمبەت ورالمانداردىڭ قازاق ەكەندىگىن دالەلدەۋدىڭ دە ءبىرشاما ماسەلە تۋدىراتىندىعىن ءسوز ەتتى.
«اسار» قوعامدىق بىرلەستىگىنىڭ جەتەكشىسى قايرات بوداۋحان بۇگىن پارلامەنتتە تالقىلاۋعا تۇسكەن زاڭ جوباسىنىڭ جانىنان قۇرىلعان جۇمىس توبىمەن قوسا، كوورديناتسيالىق كەڭەس قۇرىلۋى ءتيىس دەپ ەسەپتەيدى.
سونىمەن بىرگە، دوڭگەلەك ۇستەلگە ورالماندار وكىلدەرى قاتىسىپ، ءوز باستارىنان كەشكەن وتكەلەكتەرىن ءسوز ەتتى. بۇل جايىندا «تۇركىستان» گازەتىنىڭ كەلەسى سانىندا تولىعىمەن اڭگىمەلەيتىن بولامىز.
