ورالماندار مۇڭى

استانا. قازاقپارات - قىزىلوردالىق قانداستارىمىز ءوز كاسىپتەرىن اشقىلارى كەلەدى.

تۋعان جەرىنە ورالعان اعايىندارىمىز قازاقستان ازاماتتارىمەن بىردەي ۇكىمەت تاراپىنان بەرىلەتىن نەسيەنى العىلارى كەلەتىندەرىن ايتادى.

الايدا ەلىمىزدىڭ شاعىن جانە ورتا بيزنەسىنە ۇلەستەرىن قوسىلارى كەلەتىن وتانداستارىمىزدىڭ مۇڭ-مۇقتاجىنا قۇلاق اسار جان جوق.

ءۇرلاي نازاروۆا 2002 - جىلى رەسەيدەن اتا قونىسى  قىزىلورداعا كوشىپ كەلگەن.

اكۋشەر ماماندىعى بويىنشا ەكاتەرينبۋرگ قالاسىنداعى اۋرۋحاناسىندا 17 جىل جۇمىس ىستەگەن.

ەلگە كەلگەننەن كەيىن 1 جىلدان سوڭ عانا ازاماتتىق العان ونى ەشقانداي جەر جۇمىسقا قابىلدامايدى. جاس كەلىنشەك كۇنكورىس قامى ءۇشىن بازاردا ازىق-تۇلىك ساتادى. قاتتى ايازدا ءجۇرىپ، 1-توپتاعى مۇگەدەك اتاندى.

وتاعاسى دا جۇمىسسىز. نەسيەنى سۇراپ اشپاعان ەسىگىم جوق، ەگەر سول مۇمكىندىككە قولىم جەتسە ۇيىمنەن ماسساج جاسايتىن بولمە اشىپ قويار ەدىم دەيدى، - جانى جابىققان قانداس.

ورالمانداردىڭ بەيىمدەلۋ ورتالىعىندا 7-8 ادام تۇرامىز. ءۇيدىڭ ءىشى دە، سىرتى دا قۇلاپ جاتىر. ءۇيدىڭ كەزەگىندە تۇرعانىما 9 جىل بولىپ بارا جاتىر. ماماندىعىم مەدسەسترا ۇيدەن ماسساج جاسايتىن بولمە اشىپ كەلگەن ادامدارعا 100 تەڭگەدەن بولسا دا ماسساج جاساسام، بالاما تاماق بولسا دەگەن تىلەگىم بار.

ءۇرلاي اپانىڭ كورشىسى نۇرگۇل الجانبايەۆانىڭ دا تۇرمىسى اۋىر. بۇل وتباسى 1998 - جىلى تۇركىمەنستاننان كوشىپ كەلگەن. ونىڭ دا جولداسى ءجونى ءتۇزۋ جۇمىس تاپپاعان سوڭ جەكە كاسىپ اشىپ، جيحاز جاساۋعا كىرىسكەن ەكەن. ءبىراق ول دا قاراجاتتىڭ جوقتىعىنان كوپ ۇزاماي توقتاپ قالعان. نۇرگۇل قازىر 6 بىردەي بالاسىنا كيەرگە كيىم، ىشەرگە اس تابۋدىڭ قيىنعا ءتۇسىپ وتىرعانىن ايتادى.

قولىنان ءىس كەلەتىن ادامدارعا نەسيە بەرىلىپ جاتىر دەگەندى ەستىپ جاتىرمىز. وسىندا شاعىن بولسا دا كومەك بەرىلسە جيحاز جاساۋدى ءارى قاراي جالعاستىرىپ، ءوز ونەرىمىزدى كورسەتكىمىز كەلەدى. بالا-شاعامىزدى اسىراپ جەتكىزسەك دەيمىز.

قولدان كەلەتىن كاسىپتى اشىپ، تىم بولماعاندا بالالارىنىڭ كيىمىن بۇتىندەۋدى ارماندايتىن اعايىننىڭ تابىس كوزى بولماعان سوڭ، بانكتەگى نەسيەنى دە الا المايدى. ال كومەك سۇراپ بارعان قالالىق باسشىلىقتىڭ «ەكى قولعا ءبىر كۇرەك» دەپ ۇسىنعان جۇمىس ورىندارى جوعارى ءبىلىمدى مامانداردىڭ كوڭىلىنەن شىقپاپتى.

رۋسلان رۇستەموۆ، قىزىلوردا قالاسى اكىمىنىڭ ورىنباسارى:

 بىرنەشە جۇمىس تۇرلەرىن ۇسىندىق. قالاداعى كوممۋنالدىق مەكەمەلەردەن، قالانىڭ مەملەكەتتىك مەكەمەلەرىنەن جانە قوعامدىق جۇمىس تۇرلەرىن ۇسىندىق. ول كىسى ۇسىنىلعان جۇمىس تۇرلەرىنەن باس تارتتى.

ءۇرلاي نازاروۆا:

 سوبەزگە جىبەردى. سوبەزگە شاقىرادى. ول جاقتا ەلەكتريك، سۆارشيك سونداي ماماندىقتار. مەنىڭ ماماندىعىم مەدسەسترا. كۇيەۋىم كۋلتۋرانى بىتىرگەن. مادەني ءىس-شارا جۇرگىزۋشىسى. ال وعان ماشينا ايدايتىن جۇرگىزۋشىنىڭ جۇمىسىن بەرىپتى.

وبلىسقا 1998 - جىلدان باستاپ قونىس اۋدارعان ەتنيكالىق قازاقتاردىڭ بۇگىنگى جاي-كۇيى وسىنداي. ال، ولارمەن تىكەلەي جۇمىس ىستەپ وتىرعان جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ماماندارى بۇگىنگە دەيىن 100 ورالمان وتباسى تۇرعىن ۇيمەن قامتىلعانىن جانە 101 نىڭ كەزەكتە تۇرعاندىعىن ايتتى. دەگەنمەن ساناۋلى قانداسىمىزدىڭ ەڭ بولماسا ءبىتىرىپ كەلگەن ءبىلىم دەڭگەيىندەگى جۇمىسپەن قامتىلماۋى قىنجىلتادى.

 

«31-ارنا»