ەۋرازيالىق ەكونوميكالىق وداقتا مەملەكەتتىك تىلگە ۇلكەن مارتەبە بەرىلەدى - ادىلەت مينيسترلىگى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر ادىلەت مينيسترىنىڭ ورىنباسارى ەلۆيرا ءازىموۆا ءمالىم ەتتى.
«قۇرىلعالى وتىرعان ەۋرازيالىق ەكونوميكالىق وداق شارتىنىڭ جوباسىندا وداققا مۇشە ەلدەردىڭ مەملەكەتتىك ءتىلىن قۇرمەتتەۋ ارقىلى ۇلتتىق مۇددەنى ساقتاۋ بەكىتىلگەن.
وسىلايشا، كوميسسيانىڭ شەشىمدەرى قابىلداۋ كەزەڭى الدىندا وداقتىڭ رەسمي سايتىندا وداقتىڭ رەسمي ءتىلى بولىپ تابىلاتىن تەك ورىس تىلىندە عانا ەمەس، سونىمەن قاتار مۇشە ەلدەردىڭ مەملەكەتتىك تىلدەرىندە دە جاريالانۋى ءتيىس.
ءاربىر ازامات كوميسسيا شەشىمدەرى جوباسىنا قاتىستى پىكىرلەرىن، ۇسىنىس جانە ەسكەرتپەلەرىن مەملەكەتتىك تىلدە دە جىبەرە الادى. كوميسسيا ساۋال جولداعان ادامنىڭ مەملەكەتتىك تىلىندە جاۋاپ قايتارۋى مىندەتتى. سونىمەن قاتار شارتتىڭ ءوزى دە مۇشە ەلدەردىڭ مەملەكەتتىك تىلدەرىندە قول قويىلادى: بەلارۋس، قازاق جانە ورىس تىلدەرىندە»، - دەدى ول.
سونىمەن قاتار ول كەيىنگى كەزدە كوپشىلىكتىڭ اۋزىنان تۇسپەي جۇرگەن كەيبىر كۇدىكتەردىڭ دە باسىن سەيىلتتى. ونىڭ ايتۋىنشا، ەۋرازيالىق ەكونوميكالىق وداقتىڭ قۇرىلۋىمەن قازاقستان ءوزىنىڭ تاۋەلسىزدىگىنەن ايىرىلمايدى.
«وعان ە ا ە و تۋرالى شارتتا ءبىرقاتار باپتار كەپىلدىك بەرەدى. شارتتا ەۋرازيالىق ەكونوميكالىق وداقتىڭ مارتەبەسى، ورگاندارى تۋرالى جانە ناقتى ەكونوميكالىق سالالار بويىنشا مەملەكەتتەردىڭ كەلىسىم شارتتارى قاراستىرىلعان. شارت 120 باپتان تۇرادى. ونىڭ ىشىندە 68 حالىقارالىق كەلىسىمدەردىڭ ەرەجەلەرى كلاسسيفيكاتسيالانعان. ءبىز وزىمىزگە پايداسى جوق نورمالاردى الىپ تاستاپ، وزىمىزگە كەرەك شارتتاردى ەنگىزدىك»، - دەپ اتاپ ءوتتى ە. ءازىموۆا.
سونداي-اق بريفينگتە اتالىپ وتكەنىندەي، شارتتىڭ جوباسىندا وداقتىڭ بارلىق ورگاندارىنىڭ شەشىمدەرى ىمىراعا كەلۋدىڭ نەگىزىندە قابىلدانادى.
«بۇل دەگەنىمىز - ەگەر دە ءبىر مەملەكەت قانداي دا ءبىر شەشىمگە قارسى بولسا، مۇنداي شەشىم قابىلدانبايدى. مىسالى، قازاقستان مەملەكەت مۇددەسىنە سايكەس ەمەس دەپ تاپسا، وندا ول القا شەشىمى بويىنشا كوميسسيا كەڭەسىندە داۋلاسا الادى»، - دەدى ۆيتسە-مينيستر.
اۆتور: جاسۇلان جولدىبايەۆ
