ەسىرتكىدەن ەمدەۋدىڭ ەڭ ءتيىمدى ءادىسى

استانا. قازاقپارات - ەسىرتكىدەن ەمدەۋدىڭ ەڭ ءتيىمدى ءادىسى -  ەڭبەك تەراپياسى.

قوستاناي وبلىسىنداعى مەديتسينالىق-الەۋمەتتىك وڭالتۋ ورتالىعىنىڭ ماماندارى وسىلاي دەپ وتىر. بۇل مەكەمەدە ناشاقورلار تۇراقتى ەم قابىلداپ قانا قويمايدى، ارنايى نىساندا ءۇي جانۋارلارىن اسىراپ، باۋ-باقشا سالۋمەن شۇعىلدانادى.

ناتيجەسىندە ولاردىڭ ومىرگە دەگەن قۇشتارلىعى ويانعان.

التىنسارين اۋداندىق اۋرۋحاناسىنىڭ ءبىر قاناتى كەزىندە بوساپ قالعان ەدى. 2005 - جىلى ونىڭ جوعارى ەكى قاباتى وڭالتۋ ورتالىعىنا بەرىلدى. نىسان 30 ورىنعا شاقتالعان.

سول وتىزدىڭ ءبىرى - ءوزىن الەنا دەپ تانىستىرعان بويجەتكەن. بەت-ءجۇزىن كورسەتپەۋدى ءوتىندى. مۇندا كەلگەنىنە ءبىر ايدان اسقان. ول 19 جاسىنان ەسىرتكى پايدالانعان ەكەن. وسى 25 جاسار قىزدىڭ ەندىگى ويى - قاتەلىگىن تۇزەپ، جاڭاشا ءومىر باستاۋ.

الەنا، ەمدەلۋشى:

- مەنىڭ دوستارىمنىڭ ءبارى - ناشاقورلار. سولاردىڭ ءبىرى وڭالتۋ ورتالىعىنا تۇسكەن ەدى. قۇربىمنىڭ بۇگىندە دەنساۋلىعى جاقسارعان، سونى كورگەن سوڭ، وسىندا كەلۋگە شەشىم قابىلدادىم. ويتكەنى، بۇل -  ماعان ەمدەلۋگە بەرىلىپ وتىرعان ۇلكەن مۇمكىندىك.

ورتالىق زاماناۋي جابدىقتارمەن جۇمىس ىستەيدى. ەمدەلۋشىلەر مۇندا ماگنيت پەن لازەر، ەلەكتر تەراپەيالارىن قابىلدايدى. سپورتپەن، شىعارماشىلىقپەن شۇعىلدانادى. ءبىر دانىككەن ادامنىڭ ناشاقورلىقتان تۇبەگەيلى قول ءۇزۋى وتە قيىن.

دەگەنمەن، ءارتۇرلى ءادىس قولدانىپ، ەسىرتكىدەن الاستاتۋعا بولادى. تاجىريبەلى پسيحولوگتار سوعان كۇش سالادى.

گۇلسىم بيسيمبايەۆا، پسيحولوگ:

- تاڭەرتەڭ 7:00 دە تۇرىپ، تاماق ءىشىپ بولعان سوڭ، جۇمىسقا كىرىسەدى. پسيحوتەراپيا، سوسىن باسقا جۇمىستار بار. ولاردىڭ بوس ۋاقىتى بولمايدى. ءبىز ولارمەن توپتىق نەمەسە جەكە جۇمىستار جۇرگىزەمىز. ال اۋرۋحانانىڭ بۇرىنعى قازاندىق عيماراتى - قازىر ءۇي جانۋارلارىن ۇستايتىن نىسان. ەمدەلۋشىلەر قويان، تاۋىق، ۇيرەك، قاز اسىرايدى. جەم-ءشوبىن دە وزدەرى سالادى. ولار العاشىندا قارا جۇمىستى قيىنسىنعانىمەن، قازىر ءبىرشاما بەيىمدەلگەن.

اندرەي، ەمدەلۋشى: - مەن 32  جىل ءومىرىمنىڭ ەكى جىلىندا عانا جۇمىس ىستەپپىن. قالادا تۋدىم، جالقاۋ بولدىم. قازىر اۋىل ومىرىنە جاقىنداپ كەلەمىن. كوجەكتەردى ماپەلەپ باعۋ قىزىقتى. ەڭبەك ادامدى جاۋاپكەرشىلىككە، تارتىپكە باۋليدى، قايتا تاربيەلەنىپ كەلە جاتقانىمدى بايقايمىن. جانۋارلاردان بولەك، ولار 2 گەكتاردان استام جەرگە كوكونىس، جەمىس-جيدەك ەگەدى. جالپى مەكەمە اشىلعان 9  جىلدا مۇندا 586 ادام وڭالتۋ شارالارىن قابىلداعان. بۇگىندە سولاردىڭ 20-پايىزى ەسىرتكىنى ۇمىتىپ، قوعامعا بەيىمدەلىپ كەتكەن.

 

اۆتورلار: ابىلاي ماۋدانوۆ، ەرمەك مۇحامەدياروۆ

24.kz