بەلارۋس قازاق اتاۋىمەن ءسۇت ونىمدەرىن شىعارا باستادى
بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە وڭىرلىك دامۋ مينيسترلىگىنىڭ كاسىپكەرلىكتى دامىتۋ كوميتەتى ءتوراعاسىنىڭ ورىنباسارى باقىتجان ساركەيەۆ وسىلاي دەدى.
«كەيدە دۇكەنگە كىرگەن كەزىمدە قورابىنىڭ سىرتىندا «اتامەكەن» دەگەن جازۋى بار سۇتكە كەزدەسىپ قالاتىنىم بار. ال قاپتالىنداعى جازۋىن قاراساڭ بۇل ءونىم بەلارۋستا شىعارىلعان»، - دەدى ول.
دەگەنمەن ب. ساركەيەۆ قازاقستاندىق وندىرۋشىلەردىڭ كەدەن وداعى اياسىنداعى سەرىكتەستەرى رەسەي مەن بەلارۋس وندىرۋشىلەرىمەن باسەكەگە قابىلەتتىگىنە سەنىمدى ەكەندىگىن اتاپ ءوتتى. ونىڭ سوزىنە قاراعاندا، الداعى ۋاقىتتا وتاندىق وندىرۋشىلەر ىشكى نارىقتى تولىعىمەن قامتاماسىز ەتۋمەن قاتار ءوز ونىمدەرىن ەكسپورتقا دا شىعارۋعا قاۋقارلى بولا الادى.
«شىندىعىنا كەلگەندە، 2010-جىلدان باستاپ ءبىزدىڭ ەلىمىز ەۋرازيالىق ەكونوميكالىق وداق اياسىندا ءومىر سۇرۋدە. قاراپ وتىرساڭىزدار، ءبىز بۇگىنگى كۇنى ءبىرىڭعاي كەدەندىك كەڭىستىك قۇردىق. ءۇش ەل ورتاسىندا ەشبىر كەدەندىك قوسىن جوق، ورتاق كەدەندىك كودەكس بويىنشا جۇمىس ىستەۋدەمىز. بەلارۋس پەن رەسەي كاسىپكەرلەرى بىزدە جۇمىس ىستەپ جاتىر، بىزدىڭ كاسىپكەرلەر رەسەي مەن بەلارۋستا ەڭبەك ەتۋدە. سوندىقتان ەۋرازيالىق ەكونوميكالىق وداققا ناقتى ىقپالداستىقتى ءتيىمدى ەتۋدىڭ ءبىر قۇرالى رەتىندە قاراۋىمىز كەرەك»، - دەدى كوميتەت ءتوراعاسىنىڭ ورىنباسارى.
اۆتور: مارلان جيەمباي
