جۇلدىزدار راسىندا جۇلدىز بولىپ اسپانعا ۇشىپ كەتكەندەي

استانا. قازاقپارات - ونەر جۇلدىزدارىنىڭ ءومىرىن، شىعارماشىلىعىن ناسيحاتتاپ جۇرگەن تىلشىلەر جۇلدىزدار مەن بۇقارا اراسىندا التىن كوپىر ىسپەتتەس.

الايدا وسىنى كەيبىر جۇلدىز اۋرۋىنا ۇشىراعان، تىم اسپانداپ كەتكەن انشىلەرىمىز تۇسىنبەيتىن (تۇسىنگىسى دە كەلمەيتىن) سىقىلدى.

سۇحبات الۋعا نيەت ەتسەڭ بۇلدانىپ الەك.

اسىرەسە ءبىز سياقتى ونەر مەن مادەنيەتتىڭ ورتالىعى سانالاتىن ءىرى قالالاردان شالعايدا پروۆينسيادا تۇراتىندارعا تىپتەن قيىن. جۇلدىزداردىڭ گاسترولدىك ساپارلارىندا سۇحبات الۋ اناۋ-مىناۋعا بۇيىرا بەرمەيتىن «باق» .

كوبىسى «وتكاز» بەرمەيدى، «ۇيالى تەلەفونىمدى جازىپ الىڭىز، حابارلاسامىز» دەيدى دە «لاقتىرىپ» كەتەدى. جۇلدىزداردىڭ ۋادەسىنەن شارشاعان «الاش ايناسى» ءتىلشىسى وسى جايىندا وي قوزعايدى

كوپتەن كۇتكەن «باقىتقا» قول جەتكىزگەندەي بولىپ الگى نومىرگە قوڭىراۋ شالاسىڭ. كوبىنە «ابونەنت بايلانىس اياسىنان تىس» جەردە بولىپ شىعادى. بولماسا «ول ابونەنتپەن تىلدەسۋ ازىرگە مۇمكىن ەمەس» دەپ جاۋاپ قاتادى. «كۇتە تۇرىڭىز» دەيدى. سودان كووو-ءو-ءوپ كۇتۋگە تۋرا كەلەدى.

تىلشىمەن تىلدەسۋگە قۇلىقتىلاردىڭ قاتارى كوپ دەي الماسپىز. كوپشىلىكتىڭ كوزايىمىنا اينالعان مەيرامبەكتىڭ «جۇرەكتەن شىعاتىن ءۇنىن» ەستۋدىڭ ءوزى ابىروي.

ول ءان سالعاندا ولەڭشى كوپ دارىلداقتىڭ كوپشىگىن قىسىپ ايدالادا قالاتىنى انىق ەندى. ءبىراق... ۇيالى تەلەفونىنىڭ ءنومىرىن ءجيى اۋىستىراتىن جۇلدىزدى «ۇستاۋ» مۇمكىن ەمەس. ەل ارالاۋعا شىققاندا كونسەرت پەن كونسەرتتىڭ اراسىندا تىلدەسىپ قالماساڭ بىلايشا بەيمارال وتىرىپ سۇحباتتاسۋدىڭ ءساتى تۇسە بەرمەيدى.

ماقپال اپايىمىز دا «جانىم-اۋ، ۋاقىتىم جوق»-پەن قۇتىلادى. قاراپايىم ادامداردىڭ ءوزى مۇرنىنا سۋ جەتپەي سۇرلىگىپ جۇرگەن زاماندا، ۋاقىتتىڭ قادىرى قاشقان زاماندا جۇلدىزداردىڭ جاعدايىن تۇسىنۋگە تىرىسارمىز ەندى.

«شانشار» تەاترىنىڭ ءارتىسى ءجۇسىپ اقشورايەۆتى «قولعا ءتۇسىرۋ» قيىننىڭ قيىنى دەسە دە بولار. ايتەۋىر ۇيىندە وتىرعان كەزىندە تەلەفونمەن تىلدەسۋ باقىتى بۇيىرا قالسا «مەن جۇلدىز ەمەسپىن عوي، ۋاكەڭنەن الساڭدارشى» دەيدى. ايتەۋىر ازەر كوندىرەسىڭ سۇحباتتاسۋعا. ول كىسىنىڭ قاراپايىمدىلىعىنان بولار، گازەت-جۋرنال بەتتەرىنە كوپ شىقپايتىندىعىن وسىمەن عانا تۇسىندىرۋگە بولاتىن سياقتى.

«اسپانعا ۇشىپ» كەتكەن جۇلدىزدارىمىز دا جەتەرلىك. و-و، ولارمەن سويلەسۋدىڭ ءوزى قاسقالداقتىڭ قانىن قولعا تۇسىرگەنمەن بىردەي. ۇيالى تەلەفونى ۇنەمى ءوشىرۋلى بولادى. بولماسا وسىنداي دا وسىنداي دەپ SMS جازىپ جىبەرۋ كەرەك. وندا دا حابارلاسا قويسا جاقسى. اراعا ادام سالۋعا تۋرا كەلەتىن كەزدەر دە بولادى. سوندا ويلايسىڭ عوي، «باستا داۋرەن تۇرا بەرمەسى انىق، ەرتەڭ زامانى وتكەن سوڭ سۇحبات الايىن دەپ ەدىككە» دە زار بوپ قالماس پا ەكەن دەپ. «جاياۋ اقىل» بەرۋدەن اۋلاقپىز. تەك «التىن كوپىر» يەلەرىنە سىپايىراق بولسا دەگەندىك قوي بىزدىكى...

تىلشىلەردى كورسە توبە شاشى تىك تۇراتىنداردى دا جوق دەي المايسىز. ولاردىڭ اقبەرەن ءۋاجى: «ۋاقىتىم جوق». كەي جۇلدىزدارىمىزدىڭ ەكى ءسوزدىڭ باسىن قوسا المايتىن «ونەرلەرى» دە بار. سۇراققا ءبىر-ەكى اۋىز سوزبەن جاۋاپ بەرەدى. كەيدە اۋزىنا ءسوز سالىپ بەرۋگە تۋرا كەلەدى. ودان سۇحباتتى وڭدەپ، جوندەيسىڭ. ءتىلىن تۇزەپ، كۇزەۋگە تۋرا كەلەتىنى تاعى بار. ال قازاقتىڭ قارا ءسوزىن ءتورت اياعىن تەڭ باسقان تۇلپارداي تايپالتاتىن جۇلدىزدارىمىز دا جەتەرلىك. ءوزىنىڭ ايتۋىنشا ايتىسكەر اقىن بولعان مايعازىنىڭ نەمەرەسى ساكەن قاراپايىمدىلىعىمەن قوسا، قاي سۇراقتىڭ استىنا الساڭ دا، قىسپاقتان قىسىلماي شىعىپ كەتەدى. قارا ءسوزدىڭ جىلىگىن شاعىپ، مايىن ىشكەن دەسەڭ دە بولادى. ودان كەيىن روزا ءالقوجا اقىنجاندىلىعىمەن قوسا نەگىزگى كاسىبى جۋرناليست بولعان سوڭ با، تىلشىلەردىڭ جاي كۇيىن وزىڭنەن ارتىق بىلەدى.

ايتقان ءسوزىن وڭدەمەي، جوندەمەي-اق سول كۇيى باستىرا بەرسەڭ بولادى. دايىن سۇحبات دەۋگە دە بولار. ال دوسحان جولجاقسىنوۆتىڭ قارا سوزگە شەشەندىگى ءوز الدىنا بولەك اڭگىمە. ول كىسىنى نەگە جازۋشى بولمادى ەكەن دەپ ويعا قالاسىڭ. ايتپەسە ءبىراز جازۋشى قالام ۇستاۋعا دا ۇيالار ما ەدى دەگەن وي كەلەدى. ونىڭ ۇستىنە قازاقتىڭ كونە سوزدەرىن ءتىرىلتۋشى دەسە دە بولار. ماقالداپ، ماقامداپ سويلەيتىن دوسەكەڭنىڭ اۋزىنان «جانىمنىڭ ءۇلپاراسى» دەگەن ءسوزدى ەستىگەندە تاڭ كورىنگەنى راس...

سوسىنعىسىن «پاپاسىنىڭ بوتاقانى» مەن «ماماسىنىڭ قوشاقاندارى» دا بار. بىردە ۇلىقپان جولداسوۆتىڭ ۇلى بولاتتان سۇحبات الۋ كەرەك بولدى. ۇلىەكەڭە قوڭىراۋ شالدىق بالاسىن سۇراپ.

«ونىڭ ۋاقىتى جوق» دەدى بىردەن، بالاسى ءۇشىن جاۋاپ بەرىپ. جاس بالا ەمەس، كامەلەتتىك جاستان اسقان جىگىت ءۇشىن اكەسى جاۋاپ بەردى وسىلاي. جالىنىپ، جالپايىپ ءجۇرىپ ايتەۋىر بولاتتىڭ داۋسىن ازەر ەستىدىك. سويتسەك قاسىندا وتىر ەكەن... بۇگىندە كوپشىلىكتىڭ سۇيىسپەنشىلىگىنە بولەنىپ ۇلگەرگەن قايرات نۇرتاسپەن تىلدەسۋ كەي تىلشىلەر ءۇشىن «ارمان».

ۇيالى تەلەفونىنىڭ ءنومىرىن قولعا ءتۇسىرۋ قيىننىڭ قيىنى. سۇحبات الۋ ءۇشىن الدىمەن ماماسىنان رۇقسات سۇراۋ كەرەك... كەيدە قايراتتىڭ ورنىنا ماماسى سۇحبات بەرە سالادى...

ءيا، جۇلدىزدارىمىز راسىندا جۇلدىز بولىپ اسپانعا ۇشىپ كەتكەندەي، ۇستاتپايدى. كىشىپەيىلدىلىك پەن قاراپايىمدىلىقتى ۇستانسا ۇتپاسا ۇتىلماس ەدى- اۋ. الايدا...

 

اۆتور: باقجان شايدۋللا