كەلەسى جىلى استانانىڭ ەرەكشە كارتاسى پايدا بولادى
بۇل تۋرالى بۇگىن VII استانا ەكونوميكالىق فورۋمى اياسىندا ASTAINABLE جوباسىن بىرلەسىپ ىسكە اسىرۋ بويىنشا استانا اكىمدىگى مەن فرانتسيالىق EIFFAGE- EGIS- GDFSUEZ كونسورتسيۋمى اراسىندا مەموراندۋمعا قول قويىلدى.
مەموراندۋمعا استانا اكىمى يمانعالي تاسماعامبەتوۆ پەن قازاقستانداعى فرانسيا ەلشىسى فرانسيس ەتەن قول قويدى.
كەلىسىمنىڭ باستى ماقساتى استانا قالاسىندا 3D كارتانى جاساۋ بولىپ تابىلادى.
ساۋدا بەلگىسى قازاقستان ەلورداسى «Astana» مەن «sustainable»- «تۇراقتى» ءسوزىنىڭ بىرىكتىرىلۋىنەن شىقتى.
«جوبا قالا نىساندارىن جانە كوممۋنيكاتسيالارىن ءبىرىڭعاي 3D كارتاعا قوساتىن بولادى. بۇل قالاداعى ءتۇرلى وقيعالاردى الدىن الا باعالاۋ، قوسىمشا كوممۋنيكاتسيالاردى سالۋ جۇمىستارىن جەڭىلدەتەدى. سونىمەن قاتار قالا تۇرعىندارىنىڭ اشىق رەسۋرستى قولدانۋىنا مۇمكىندىك تۋادى، ەلوردا تۋرالى، ونىڭ ينفراقۇرىلىمى جايلى بىلۋگە بولادى»، - دەيدى «AstanaInnovations» ا ق- نىڭ باسقارما ءتوراعاسى تالعات ءاشىم.
ونىڭ ايتۋىنشا، فرانتسۋزدىق كومپانيا جوباعا 3 ميلليون ەۋرو ينۆەستيتسيا سالۋعا دايىن. اكىمدىك جوبانىڭ ىسكە اسىرىلۋىن قاداعالايدى. بيۋدجەتتىك قاراجاتتار شىعىن بولمايدى. كارتا ءبىر جىلدان كەيىن ەنگىزىلەدى دەپ جوسپارلانۋدا.
اۆتور: جاسۇلان جولدىبايەۆ
