يۋلدۋز دەسە... جۇلدىز
اتلەس كويلەگى بويىندا، ءۇنتاياعى قولىندا، ساۋساقتارى مايىسا، بۇرالا بيلەپ بۇكىل زالدى قوسا بيلەتتى.
ءانشى دە ءوزى، ءبيشى دە ءوزى، جۇرگىزۋشى دە ءوزى. تۇلا بويى تۇنىپ تۇرعان تالانت. سۇلۋ. سىمباتتى. قىلىقتى...
تىڭدارمانىن ءاپ- ساتتە-اق ەلىكتىرىپ اكەتتى. كورەرمەنمەن جۇمىس ىستەۋى قامشى سالدىرمايدى.
ءتىپتى قوس قاسىنىڭ ورتاسى قوسىلىپ كەتكەن اپالارعا دەيىن ورىندارىندا وتىرىپ بيلەپ كەتتى. كونتسەرتتىڭ ءار دەتالىنە دەيىن ويلاستىرىلعان. بۇل كورەرمەنگە دەگەن قۇرمەت، كورەرمەندى سىيلاي ءبىلۋدىڭ وزىق ۇلگىسى بولسا كەرەك.
ساحنالىق كيىمدەرىنىڭ ءوزى قانداي اسەم. بۇلاي تامسانۋىمىزدىڭ دا سەبەبى جوق ەمەس. شىمكەنتكە كەلگەن ءبىر بەلگىلى ءانشىمىز كەزىندە كوشەگە كيەتىن كويلەگىمەن دە ءان سالىپ كەتكەن. اۋىل دەپ مەنسىنىڭكىرەمەسە كەرەك. ال يۋلدۋزدىڭ ءجونى بولەك. يۋلدۋز دەسە جۇلدىز.
جانىپ تۇر. اسىرەسە اناۋ مىناۋ ءانشىنىڭ باتىلى بارا بەرمەيتىن ءتىرى داۋىستا ءان سالعانىن ايتساڭىزشى. قالاي ءتانتى بولمايسىڭ. اراسىندا جەرگىلىكتى جۇلدىزدار دا ءان ايتتى. فونوگراممامەن... ءبىزدىڭ انشىلەر ءاندى قاتىرعانىمەن بيگە كەلگەندە شىدەرلەۋلى اتتاي كىبىرتىكتەيتىنى وتىرىك ەمەس قوي. ءارى جاندى داۋىستا ءان سالىپ، ءارى بيلەپ كونسەرتتىڭ كورىگىن قىزدىردى.
كورەرمەننىڭ كوزايىمىنا اينالعان، سۇلۋلىقتىڭ سيمۆولى، شىعىس ءبيىن ءتۇبىن تۇسىرە بيلەيتىن يۋلدۋز ۋرويموحۋن قىزىنىڭ ەكى جاسى كەم ەلۋگە تولاتىنىن كوپشىلىك بىلە بەرمەۋى دە مۇمكىن. ساۋساقتارى مايىسا، ناشىنە كەلتىرىپ بيلەيتىن ءانشىنىڭ ساحناداعى قيمىلىنا قاراپ وتىرىپ، ەلۋ جاستى قيمايتىنىمىز انىق. وزبەكستاننىڭ اتاقتى «وفورين» ءبي ءانسامبىلىن ارنايى الدىرتىپتى. كورەرمەن الاقايلاپ الاقانىن اياماي قول سوقتى. قازاقتىڭ «اقبايان» ءانىن قازاقتىڭ وزىنەن ارتىق ورىنداعاندا ورنىنان تۇرىپ قۇرمەت كورسەتكەندەر كوپ بولدى. ال «دەدىم-اي-اۋ» ءانىن ناشىنە كەلتىرە شىرقادى.
تىڭدارمانىنىڭ ءتىلىن تابۋدى بىلەتىن يۋلدۋزحون «مەنەن كوبىنە جاس كورىنۋىڭىزدىڭ سىرى نەدە دەپ سۇراپ جاتادى. جاستىق دەگەن نە، ول ولىمنەن قورىقپاۋ، تاۋەكەلدەن قورىقپاۋ. اللانىڭ مەيىرىمى شەكسىز، ءاربىر كۇنىمىزگە تاۋبە دەۋىمىز كەرەك. اللا ءبىزدىڭ دەنساۋلىعىمىز ءۇشىن دە، باقىتتى عۇمىر كەشۋىمىزگە دە جاعداي جاساپ وتىر. ءبىراق ءبىز ءبارىن قولدان قۇرتامىز. ءاربىر اتقان تاڭىمىزعا تاۋبە دەۋىمىز كەرەك. بولاشاعىمىزعا دەگەن ۇلكەن سەنىم كەرەك. سەنىم ءبارىن دە جەڭىپ شىعادى. مىنە جاستىقتىڭ ەليكسيرى وسى...» دەدى. تاعى ءبىر ءان اراسىندا «ءيت ەكەش ءيت تە ءوز وتانىن ساعىنادى. مەن ءوز وتانىمدى، ءوز وزبەكستانىمدى شەكسىز سۇيەمىن. سىزدەر قازاقستاندى سۇيىڭىزدەر، مەن وزبەكستانىم تۋرالى ءان ايتىپ بەرەيىن» دەپ اعىنان جارىلدى...
كورەرمەن مادەنيەتى جونىندە بىرەر ءسوز...
انشىمەن بىرگە سۋرەتكە ءتۇسۋدى جانى سۇيەتىن بىلايعى جۇرت سىرت-سىرت ەتىپ سۋرەتكە باسىپ الىپ جاتتى. بۇل «الامانعا» ءتىرى جۇلدىزدى جاڭا كورگەندەي ءتارتىپ ساقشىلارى دا قوسىلدى...
كونسەرتكە كوڭىل كوتەرىپ، دەمالۋ ءۇشىن ەمەس، بالالارىن ويناتۋ ءۇشىن كەلەتىندەر دە بار ەكەن. مايدا شاقالار مۇز سارايىن الاشاپقىن بايگە الاڭىنا اينالدىردى. «توي توي ەمەس، بالا شاعا جەپ كەتتىنىڭ» كەرىن كەلتىردى. «شانشارلىقتار» ايتپاقشى يۋلدۋزدىڭ ءانىن ەسىتپەسە و بالالار ۇيىقتاي المايدى ەكەن...
كوپشىلىكتىڭ نازى...
«پروكلياتىي پوپۋليارنوست» دەپ ءبىر اعەكەم ايتپاقشى اسا تانىمالدىلىقتىڭ دا قيىن بولاتىنىن تۇسىنەمىز. دەگەنمەن انىنە، ونەرىنە ءتانتى اعايىن قۇشاق-قۇشاق گۇل اكەلگەن. يۋلدۋزعا ارناپ. كونسەرت اياقتالعان سوڭ قۇرمەت كورسەتىپ، قولتاڭبا الارمىز دەپ ۇمىتتەنىپ كەلگەندەردىڭ ءۇمىتى اقتالمادى. كونسەرت اياقتالعانشا نەگىزگى ساحنا مەن مۇز ۇستىندەگى ساحنانىڭ ەكى ورتاسىندا جۇگىرىپ جۇرگەن يۋلدۋزعا ەكى-ءۇش كۇزەتشىسى جان بالاسىن جولاتقان جوق. كونسەرت اياقتالعان سوڭ ءانشى كىرگەن بولمەگە جاقىنداۋ تىپتەن مۇمكىن بولمادى. سىيلانباي قالعان گۇلدەر قۇشاق-قۇشاق بولىپ قايتىپ جاتتى. كورەرمەننىڭ كوڭىلىن قالدىرماعان دا دۇرىس-اۋ. وسى جاعى عانا بولماسا، باسقا ايتار ناز جوق...
اۆتور: باقجان شايدۋللا
«الاش ايناسى»
