قازاقستاننىڭ سولتۇستىك وڭىرلەرىندەگى حالىق سانى ميلليون ادامعا قىسقارۋى مۇمكىن - م. ءابىلقاسىموۆا
باسقوسۋدا قازاقستاننىڭ ىشكى جانە سىرتقى كوشى- قون پروبلەمالارى تالقىلانعان بولاتىن.
ۆيتسە- ءمينيستردىڭ سوزىنە قاراعاندا، اتالمىش ۇدەرىس نەگىزىنەن ىشكى جانە سىرتقى كوشى- قون پروبلەمالارىندا قوردالانعان ماسەلەلەرگە بايلانىستى ورىن الۋى مۇمكىن.
«رەسپۋبليكامىزدىڭ قوستاناي، پاۆلودار، سولتۇستىك قازاقستان، شىعىس قازاقستان سەكىلدى وبلىستارىندا قالىپتاسقان دەموگرافيالىق قۇلدىراۋ ۇدەرىسى ساقتالاتىن بولسا، ونىڭ سالدارىنان كەلەشەكتە جۇمىسشى كادرلار تاپشىلىعى ورىن الۋى ىقتيمال. ال 2050 - جىلعا قاراي وسىنداي جاعدايعا سايكەس، سولتۇستىك وبلىستارداعى حالىق سانى ميلليون ادامعا دەيىن ازاياتىنىن بولجاۋعا بولادى. بۇل رەتتە ەلىمىزدىڭ وڭتۇستىك وڭىرلەرىندەگى حالىق سانى كەرىسىنشە 5,2 ميلليون ادامعا ارتۋى مۇمكىن» ، - دەدى م. ءابىلقاسىموۆا.
ونىڭ پايىمداۋىنشا، بۇنداي جاعىمسىز ۇدەرىستىڭ ساقتالۋى جۇمىس ورىندارىنا قاتىستى ۇسىنىستىڭ سايكەسسىزدىگى، وڭىرلىك جالپى ىشكى ءونىم ءوسىمىنىڭ كەمۋى، ەڭبەك كۇشىنىڭ جەتىسپەۋشىلىگى سەكىلدى پروبلەمالاردى تۋدىرادى. سوندىقتان دا، ۆيتسە- ءمينيستردىڭ ويىنشا، جۇمىس كۇشى جەتكىلىكسىز وڭىرلەرگە ەڭبەك ميگرانتتارىن كوشىرۋدى ىنتالاندىرۋدىڭ تىڭ تەتىكتەرىن ىسكە قوسۋ قاجەت.
«جالپى، وسىعان بايلانىستى ايتا كەتەرلىگى، ورالمانداردى ورنالاستىرۋ ساياساتىندا بۇعان دەيىن ءبىرقاتار قاتەلىكتەر ورىن الدى، قونىستاندىرۋ جۇمىسى تەپە- تەڭدىكتى ساقتاپ جۇزەگە اسپادى، ونداعى وڭىرلەردىڭ الەۋمەتتىك- ەكونوميكالىق سۇرانىستارى ەسكەرىلمەدى. ماسەلەن، ستاتيستيكالىق مالىمەتتەرگە سۇيەنسەك، ورالمانداردىڭ 50 پايىزدان استامى وڭتۇستىك قازاقستان، الماتى، ماڭعىستاۋ، جامبىل وبلىستارىنا شوعىرلانعان. ال اتالعان وڭىرلەر الەۋمەتتىك ينفراقۇرىلىمدار مەن جۇمىس ورىندارىنا قاتىستى ونسىز دا ايتارلىقتاي دەموگرافيالىق قىسىمعا ۇشىراپ وتىرعان بولاتىن» ، - دەيدى م. ءابىلقاسىموۆا.
اۆتور: قانات مامەتقازى ۇلى
