ءتورت ميلليون قازاق ەلدەن تىس جەردە تۇرىپ جاتىر
بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىندە وتكەن بريفينگ بارىسىندا كوشى-قون كوميتەتى ءتوراعاسىنىڭ ورىنباسارى اسلان قارجاۋبايەۆ ءمالىم ەتتى، دەپ حابارلايدى BNews.kz ءتىلشىسى.
«بولجام جاساۋ قيىن، ءبىراق ايتارىم، بىلتىر كۆوتا الىنىپ تاستالعاننىڭ وزىندە قازاقستانعا 30 مىڭنان اسا قازاق تاريحي وتانىنا ورالعان.
بۇعان دەيىن 18 مىڭ قازاق دەپ حابارلانعان ەدى، وسىعان وراي ءتۇرلى سۇراقتار تۋىنداۋى مۇمكىن. وعان سەبەپ، ەلگە ەنگەندەردىڭ رەسمي سانى تۋرالى ستاتيستيكالىق مالىمەتكە تەك تۇراقتى مەكەندەۋ ءۇشىن رۇقسات قاعازىن العاندار عانا ىلىگەدى. سوندىقتان بۇل سان ۇنەمى قۇبىلىپ تۇرادى، جىلدىڭ باسىندا كەلگەندەر قۇجات الىپ ۇلگەرىپ، سوڭىندا كەلگەندەر ءسال كەشىرەكتەۋ الادى»، - دەپ اتاپ ءوتتى اسلان قارجاۋبايەۆ.
سونداي-اق، ونىڭ ايتۋىنشا، 3,5-4 ميلليون قازاق قازاقستاننان تىس جەردە تۇرىپ جاتقان كورىنەدى.
«ەتنيكالىق كوشى-قون راسىمدەرى وڭتايلاندىرىلعاننان كەيىن ەلدەردىڭ قازاقستانعا كوشىپ كەلۋگە دەگەن نيەتتەرى جيىلەپ جاتىر. بيىل كوشىپ كەلۋشىلەردىڭ سانى جوعارى بولادى دەپ بولجاي المايمىن، سەبەبى زاڭ كەلەسى جىلى عانا كۇشىنە ەنەدى دەپ كۇتىلۋدە. ءبىر جىلدارى ورالعان قازاقتاردىڭ سانى 50 مىڭنان اسىپ جىعىلعان بولاتىن. نەگىزىنەن، ەتنيكالىق قازاقتار وزبەكستاندا، قىتايدا، رەسەي مەن موڭعوليادا تۇرىپ جاتىر»، - دەپ قوستى ا. قارجاۋبايەۆ.
