كوشى- قون زاڭناماسىنىڭ جاڭا تۇجىرىمداماسىندا نەگىزگى ءۇش باعىت قاراستىرىلعان - ەڭبەك مينيسترلىگى

استانا. قازاقپارات - بۇگىن ق ر ەڭبەك جانە حالىقتى الەۋمەتتىك قورعاۋ مينيسترلىگىندە ق ر كوشى- قون زاڭناماسى تۇجىرىمداماسىنىڭ جوباسى تانىستىرىلدى.

كوشى- قون كوميتەتى ءتوراعاسىنىڭ ورىنباسارى اسلان قارجاۋبايەۆتىڭ ايتۋىنشا، تۇجىرىمداما نەگىزگى ءۇش باعىتتى قامتيدى.

«ءبىرىنشىسى، ىشكى كوشى- قون بويىنشا. «جول كارتاسى 2020» باعدارلاماسىنىڭ اياسىندا مەملەكەت تاراپىنان كورسەتىلەتىن الەۋمەتتىك پاكەت كەڭەيتىلەدى: مەملەكەت جۇمىس كۇشى مول ايماقتاردان حالقىنىڭ سانى تاپشى وڭىرلەرگە كوشىپ بارعان ازاماتتاردى جۇمىسقا ورنالاستىرۋ جانە باسپانامەن (قىزمەتتىك پاتەر نەمەسە جاتاقحانا) قامتاماسىز ەتۋ ءۇشىن قولداۋ كورسەتەدى. سونىمەن قاتار، ءبىر رەتتىك كومەك اقشا تولەنەدى (بەس ادامدىق وتباسىعا 190 ايلىق ەسەپتىك كورسەتكىش كولەمىندە) » ، - دەپ ءتۇسىندىردى ا. قارجاۋبايەۆ.

(ءبىر ايلىق ەسەپتىك كورسەتكىش 1800 تەڭگە شاماسىندا)

ونىڭ ايتۋىنشا، ەكىنشى باسىم باعىت ەتنيكالىق كوشى- قونعا ارنالعان.

«تۇجىرىمداما جوباسىنا سايكەس ەتنيكالىق قازاقتاردىڭ قازاقستان رەسپۋبليكاسىنا كەلۋ جاعدايى ءبىرىزدەندىرىلەدى جانە جەڭىلدەتىلەدى. مىندەتتى تۇردە تۇرۋعا ىحتيارحات العان كەزدە ەتنيكالىق قازاقتارعا قونىستانعان وڭىرلەرىنە قاراماستان ورالمان مارتەبەسىن بەرۋ قاراستىرىلعان. شەتەل ازاماتتارىنا قاراعاندا، ەتنيكالىق قازاقتار تۇرۋعا ىقتيارحاتتى كوشى- قون پوليتسياسىنا جۇگىنىپ، تولەم قابىلەتتىلىگىن راستاماي الادى. ورالمانداردىڭ ق ر ازاماتتىعىن الۋ مەرزىمىن ءبىر جىلعا دەيىن قىسقارتۋ كوزدەلەدى» ، - دەپ اتاپ ءوتتى ءتوراعا ورىنباسارى.

ا. قارجاۋبايەۆتىڭ ايتۋىنشا، تۇجىرىمداماداعى ءۇشىنشى ماڭىزدى باعىت سىرتقى كوشى- قونعا ارنالعان.

«تۇجىرىمداما قازاقستاندا جوعارى بىلىكتى مامانداردىڭ اشىق نارىعىن قالىپتاستىرۋدىڭ ءبىرقاتار مەحانيزمدەرىن ۇسىنادى. بىرىنشىدەن، وڭدەۋ ونەركاسىبى، اگرارلىق- ونەركاسىپتىك كەشەن جانە گەولوگيالىق بارلاۋ كاسىپورىندارىنا كاپيتال سالاتىن ترانس ۇلتتىق كومپانيالار ءۇشىن ەرىكتى ورىن اۋىستىرۋ پرينتسيپى قاراستىرىلعان. سونىمەن بىرگە قازاقستاندىق مامانداردى جۇمىسقا الۋ جانە وقىتۋ جونىندەگى شەتەلدىك ينۆەستورلارعا قويىلاتىن تالاپ ساقتالادى.

 ەكىنشىدەن، جەتىسپەي جاتقان ماماندار ءتىزىمىن، ولارعا قاتىستى بىلىكتىلىك تالاپتارىمەن قاتار الەۋەتتى جۇمىسشىلاردى بالدىق سىناۋ جۇيەسىن ەنگىزۋ ۇسىنىلادى. ۇشىنشىدەن، قازاقستاننىڭ جوعارى وقۋ ورىندارىندا دارىندى شەتەلدىك ستۋدەنتتەر ءۇشىن وقۋ گرانتى جۇيەسىن ەنگىزۋ (سينگاپۋر، مالايزيا، ۇلى بريتانيا تاجىريبەسىنە سايكەس) جانە ولاردىڭ جۇمىسقا ورنالاستىرىلۋى قاراستىرىلعان» ، - دەپ اتاپ ءوتتى ا. قارجاۋبايەۆ.

اۆتور: ءابۋ- اسقار مەكەش ۇلى