اكىمدىكتەر جۇمىسىن باعالاۋ رەيتينگىسىندە استانا قالاسىنىڭ اكىمدىگى كوش باستادى
زەرتتەۋ بارىسىندا اكىمدىكتەردىڭ جۇمىس ساپاسىن باعالاۋ ءۇشىن 11 نەگىزگى سانات باسشىلىققا الىنعان. باعالاۋ دا 11 بالدىق جۇيە بويىنشا جۇزەگە اسىرىلدى.
اتاپ ايتقاندا، اكىمدەردىڭ جۇمىستارىنىڭ باستى كورسەتكىشتەرى رەتىندە ساياسي جانە الەۋمەتتىك تۇراقتىلىقتى قامتاماسىز ەتۋ مەن ايماقتاردىڭ ەكونوميكالىق دامۋ دارەجەلەرى الىنعان. وسىعان سايكەس اعىمداعى جىلدىڭ العاشقى توقسانىنداعى وبلىستىق اكىمدىكتەردىڭ جۇمىس ساپاسىن باعالاۋ بارىسىندا كوش باسىنان كورىنگەن اكىمدىكتەر انىقتالدى.
وندا العاشقى ورىندى استانا قالاسىنىڭ اكىمدىگى (اكىم يمانعالي تاسماعامبەتوۆ - 4,10 بال) يەلەنسە، ەكىنشى ورىندا شىعىس قازاقستان وبلىسىنىڭ اكىمدىگى (اكىمى بەردىبەك ساپاربايەۆ - 4,02 بال) ، ءۇشىنشى ورىندا قىزىلوردا وبلىسىنىڭ اكىمدىگى (اكىمى قىرىمبەك كوشەربايەۆ - 4,01 بال) ، ال ودان كەيىنگى ورىندى پاۆلودار وبلىسىنىڭ اكىمى قانات بوزىمبايەۆتىڭ اكىمدىگى (3,80 بال) يەلەنگەن.
ايتا كەتەيىك، استانا قالاسىنىڭ اكىمدىگى بۇل بيىككە «ايماقتىڭ ەكونوميكالىق دامۋىنىڭ تابىستىلىعى» جانە «ايماقتىق الەۋمەتتىك باعدارلامالاردى جۇزەگە اسىرۋ» كورسەتكىشتەرى بويىنشا قول جەتكىزدى.
سونداي- اق زەرتتەۋ بارىسىندا جۇمىسى ۇزدىك ءارى ءتيىمدى قالالىق اكىمدىكتەر دە انىقتالدى. ونىڭ قورتىندىسى بويىنشا كوشباسشىلار توبىن الماتى قالاسىنىڭ اكىمدىگى (اكىمى احمەتجان ەسىموۆ - 3,97 بال) باستاعان. ودان سوڭ وسكەمەن (اكىمى تەمىربەك قاسىمجانوۆ - 3,59 بال) ، اتىراۋ (اكىم سەرىك ايداربەكوۆ - 3,58 بال) ، قىزىلوردا (اكىمى نۇرلىبەك نالىبايەۆ - 3,55 بال) ، اقتاۋ (اكىمى ەدىل جاڭبىرشين - 3,54 بال) جانە ورال (اكىمى التاي كولگىنوۆ - 3,54 بال) قالاسىنىڭ اكىمدىكتەرى قۇراعان.
