دۋبايعا كەلگەن مىڭداعان شەتەلدىكتەر يسلام ءدىنىن قابىلداعان

 استانا. قازاقپارات - سانمەن ورنەكتەلەگەن ساناققا كوز جۇگىرتەر، بولساق، تەك سوڭعى ايلاردىڭ وزىندە عانا دۋباي امىرلىگىنە كەلگەن مىڭداعان شەتەلدىكتەر يسلام ءدىنىن قابىلداعان.

بۇل تۋرالى muslim.kz سايتى حابارلادى.

دار ۋل- بەر مەملەكەتتىك ۇيىمىنىڭ يسلام اقپاراتتىق ورتالىعىنىڭ ديرەكتورى راشيد ءال- دجۋنابيدىڭ ايتۋىنشا، ارنايى كەلىپ اسىل ءدىنىمىزدى قابىلداعانداردىڭ سانى قاڭتار ايىندا 205 ادام، اقپان ايىندا - 238 ادام، ناۋرىز ايىندا - 237 ادام، ساۋىردە 383 ادامدى قۇراعان. اتالمىش ورتالىققا كۇن سايىن جۇزدەگەن جاندار ءارتۇرلى سۇراقتارعا جاۋاپ ىزدەپ باس سۇعىپ، دارىستەر الىپ قايتاتىن كورىنەدى.

 سونداي- اق، ءارتۇرلى حالىقارالىق كونفەرەنتسيالار مەن ۇيىمدار باسقوسۋى كەزىندە يسلام ءدىنىنىڭ قۇندىلىقتارىنا قانىعىپ، اللا جولىنا تۇسكەندەردىڭ سانى ءبىرشاما ارتاتىنى بايقالعان. مىسالى، مۇسىلمانداردىڭ حالىقارالىق سەزى قارساڭىندا 250 دەن استام ادام مۇسىلمان اتانعان.

 ۇيىمدا تىركەلگەن مالىمەتتەرگە سۇيەنسەك، شەتەلدىكتەر اراسىندا يسلام ءدىنىن قابىلداۋدا فيلييپين ارالدارى مەن قىتاي، ءۇندىستان، تايلاند، كامەرۋن، كەنيا، نيگەريا، ا ق ش، يتاليا، گەرمانيا، بريتانيا، يرلانديا، شري- لانكا، اۆستراليا، ميانما، سيريا، يوردانيادان كەلگەندەردىڭ ۇلەس سالماعى باسىم.

اتالمىش ۇيىمعا كەلىپ يسلام ءدىنىن قابىلداپ، مۇسىلمان اتانعاندار قاتارى 2013 - جىلى - 2115, ال 2012 - جىلى 1907 ادامدى قۇراعان.