ۇكىمەت يندۋستريالاندىرۋ باعدارلاماسىنىڭ ەكىنشى بەسجىلدىعىن ماقۇلدادى
بۇل تۋرالى كةشة ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە پرەمەر- ءمينيستردىڭ ورىنباسارى - يندۋستريا جانە جاڭا تەحنولوگيالار ءمينيسترى اسەت يسەكەشيەۆ ءمالىم ەتتى.
«بۇگىن ۇكىمەت يندۋستريالىق- يننوۆاتسيالىق دامۋ مەملەكەتتىك باعدارلاماسىن ماقۇلدادى. مەملەكەت باسشىسى ونى بەكىتكەننەن كەيىن ۇكىمەت شارالاردىڭ تىڭعىلىقتى جوسپارىن قابىلدايتىن بولادى» ، دەدى ول.
ونىڭ اتاپ وتۋىنشە، ەكىنشى بەسجىلدىق ءتورت باعىت بويىنشا دامىتىلاتىن بولادى.
ءبىرىنشىسى، ماكرو ەكونوميكالىق تۇراقتىلىقتى جانە قارجىلىق بازانىڭ ءوسىمىن قامتاماسىز ەتۋى ءتيىستى شيكىزاتتىق سەكتور. ەكىنشىسى، ءوسىم ساپاسىن قامتاماسىز ەتەتىن وڭدەۋ ونەركاسىبى. ءۇشىنشىسى، بولاشاقتا باسەكەلەستىكتى قامتاماسىز ەتەتىن يننوۆاتسيالىق سەكتور. ءتورتىنشىسى، ادامداردى جۇمىسپەن قامتيتىن سەكتور.
«وسى بەسجىلدىقتا بيزنەستىڭ بارىنشا بەلسەندى قاتىسۋىن اتاپ وتۋگە بولادى. اتاپ ايتقاندا، ۇلتتىق كاسىپكەرلەر پالاتاسى باعدارلامانى ازىرلەۋگە دە، ونى جۇزەگە اسىرۋعا دا اتسالىساتىن بولادى» ، - دەدى ءا. يسەكەشيەۆ.
يندۋستريالاندىرۋ باعدارلاماسىنىڭ ەكىنشى بەسجىلدىعىنا 6,6 ترليون تەڭگە قاجەت. بۇل تۋرالى بريفينگتە «بايتەرەك» ۇ ب ح» ا ق باسقارماسىنىڭ ءتوراعاسى قۋاندىق بيشىمبايەۆ ءمالىم ەتتى.
ونىڭ سوزىنە قاراعاندا، «بايتەرەك» حولدينگى مەملەكەتتىك باعدارلامانى جۇزەگە اسىرۋدا نەگىزگى قارجى اگەنتى رەتىندە ايقىندالعان. ءوز كەزەگىندە حولدينگ ەكىنشى بەسجىلدىقتىڭ قارجىلىق كولەمىن وتكەن جىلدىڭ كۇزىندە ناقتىلاپ قويعان.
«سول ۋاقىتتا ءۇ ي ي د مەملەكەتتىك باعدارلاماسىن جۇزەگە اسىرۋدى جالپى باعالاۋ الداعى بەسجىلدىققا 7 ترليون تەڭگە دەڭگەيىندە بەلگىلەنگەن ەدى. بۇگىن ءتۇرلى تالقىلاۋلاردان كەيىنگى ستراتەگيادا قارجىلىق رەسۋرستىڭ قاجەتتى دەڭگەيى شامامەن 6,6 ترليون تەڭگە كولەمىندە بەلگىلەندى» ، - دەدى باسقارما ءتوراعاسى.
ونىڭ اتاپ وتۋىنشە، بۇل قارجىنىڭ بارلىعى بىردەي مەملەكەتتىك بيۋدجەتتەن الىنبايدى. «مەملەكەتتىك قولداۋعا بەرىلگەن ءبىر تەڭگەمەن مەملەكەتتىك ينۆەستيتسيانىڭ ارقاسىندا ءبىز 3-3,3 تەڭگە دەڭگەيىندە جەكە، سونىمەن بىرگە شەتەلدىك قارجى تارتا الامىز دەپ ويلايمىن» ، دەدى ق. بيشىمبايەۆ.
