قازاق پوەزياسىنىڭ الىبى وتەجان نۇرعاليەۆ دۇنيەدەن وزدى

الماتى. 6- قاڭتار. قازاقپارات /ءنازيرا ەلەۋحان/ -الماتىدا بەلگىلى اقىن، «قۇرمەت» وردەنىنىڭ يەگەرى، قازاق پوەزياسىنىڭ الىبى، شىندىقتىڭ بەتىنە قايمىقپاي قارايتىن اقيقاتشىل اقىن وتەجان نۇرعاليەۆ دۇنيەدەن وزدى. 

اقىنمەن قوشتاسۋ ەرتەڭ، 7- قاڭتار كۇنى، جازۋشىلار وداعىندا ساعات 11 دە بولادى.

قازاق ادەبيەتىنىڭ كلاسسيگى وتەجان نۇرعاليەۆ 1938- جىلى 15- تامىزدا اقتوبە وبلىسى، بايعانين اۋدانىنىڭ «اقجار» ۇجىمشارىندا دۇنيەگە كەلگەن. 1964- جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن ول «قازاقستان پيونەرى»، «قازاق ادەبيەتى» گازەتتەرىندە، «جالىن» باسپاسىندا قىزمەت اتقارا ءجۇرىپ، «مەنىڭ ماحابباتىم»، «اق نوسەر»، «نوسەردەن كەيىن»، «اي استىندا اقبوز ءۇي»، «قايىڭدى توعاي» ت.ب. ولەڭ جيناقتارى مەن «سوعىستىڭ سوڭعى جازى» باللادالارىن جازعان.

اقىننىڭ 1962- جىلى، قازاق مەملەكەتتىك ۋنيۆەرسيتەتىنىڭ 3-كۋرسىندا وقىپ جۇرگەندە جارىق كورگەن العاشقى «مەنىڭ ماحابباتىم» جىر جيناعى ادەبيەتكە ەرەكشە تالانتتى، توسىن ءۇندى، جاساندىلىقتان ادا جاڭا اقىن كەلگەنىن ءپاش ەتكەن ەدى. ال 1976- جىلى ۇسىنىلعان «تاڭدامالىسى» تالعامنىڭ ءمىنسىز تارازىسىنا اينالدى. جەتپىسىنشى جىلداردىڭ ەكىنشى جارتىسىندا وتەجان نۇرعاليەۆ ادەبيەتىمىزگە تاعى ءبىر تىڭ لەپ اكەلدى. سول كەزدە قولعا العان، كەيىن «سوعىستىڭ سوڭعى جازى» دەگەن ورتاق اتاۋمەن ءتورت كىتاپ بولىپ تۇزىلگەن باللادالار جارالى جىلداردىڭ وشپەيتىن سيامەن جازىلعان بوياماسىز شىندىعى ەدى. بىرىنە-ءبىرى كورىنبەيتىن جىپپەن بايلانىسىپ تۇرعان بۇل باللادالار قازاق ءسوز ونەرىنە تىڭ قۇبىلىس بولىپ ەندى.