شالكيىز جىراۋ تىلەنشى ۇلى

قازاق جىراۋلىق پوەزياسىنىڭ اتاسى شالكيىز تىلەنشى ۇلى جايىقتىڭ شىعىس بەتىندە دۇنيەگە كەلگەن. جىراۋدىڭ اكەسى، سىرا، ساحارا اقسۇيەكتەرىنىڭ ءبىرى بولسا كەرەك، ال شەشەسى كەيىن كىشى ءجۇزدىڭ ۇيىتقىسى بولعان، ورىس دەرەكتەرىندە سىرتقى وردا (زايايسكايا وردا) اتالاتىن ۇلىستىڭ ءامىرى مۇسا ءبيدىڭ قىزى ەكەن

بولاشاق جىراۋ ءۇش ايلىعىندا اناسىنان ايرىلادى دا، ناعاشى اجەسىنىڭ قولىنا بەرىلەدى. ءسويتىپ، داشتى- قىپشاق جەرىن جايلاعان تۇركى رۋلارىنىڭ بىرىنەن ەكىنشىسىنە كوشكەن ءبىر عاسىرعا جۋىق ساپارى جورگەكتەن باستالادى. مۇسىلمانشا جاقسى ءبىلىم، ساحارا سالتىمەن تاماشا تاربيە العان ول قاي اتىراپتا ءوسىپ، ەرجەتتى - بۇل جاعى بەلگىسىز. تەك ايدىندى الامان عانا ەمەس، ارقالى جىراۋ رەتىندە دە داڭقى شىققان شالكيىزدى 1490 - جىلى نوعايلى ءامىرشىسى تەمىر ءبيدىڭ توڭىرەگىنەن كورەمىز. شىعارمالارىنا قاراعاندا، وسى كەزدە جىراۋ بىردە اسكەري جورىقتار ساپىندا،بىردە ءامىرشىسىنىڭ نوكەرى قاتارىندا قىرىم، تەرىستىك كاۆكاز، دون بويىن تەگىس ارالاپ شىعادى. الايدا تاكاپپار جىراۋ تەمىرمەن ۇنەمى جاراستىق تابا بەرمەگەن. تەمىر ولگەننەن سوڭ جىراۋ (ءتارىزى، وسى ۋاقىتقا دەيىن وزىمەن قىرباي بولىپ جۇرگەن) مۇسا ۇرپاقتارىمەن قايتا تابىسادى. ءوز زامانىنداعى ساياسي كۇرەستەردىڭ ەشقايسىسىنان سىرتقارى قالماعان شالكيىز نوعايلىدا XVI عاسىردىڭ 40-جىلدارى باستالعان ءجۇسىپ پەن يسمايىلدىڭ ايگىلى تارتىسى كەزىندە ءجۇسىپتى جاقتايدى. الايدا دۇشپاندارى تاراپىنان قۋعىنعا، دوستارى تاراپىنان كۇندەۋگە ۇشىراعان جىراۋ كوپ ۇزاماي ناعاشىلارىمەن ءبىرجولا ارازداسىپ، قازاق ورداسىنا قايتا وتەدى.