15:37, 27 - جەلتوقسان 2010 | GMT +6
اسانقايعى ءسابيت ۇلى
«قوي ۇستىنە بوزتورعاي جۇمىرتقالايتىن» زاماندى ارمانداپ، قازاققا جايلى قونىس - جەرۇيىق ىزدەگەن اسانقايعى ءسابيت ۇلى ەدىل بويىندا دۇنيەگە كەلگەن. تاريحي اڭىزداردا اكەسى ساياتشى ەكەن دەيدى
اسانقايعى ءسابيت ۇلى التىن وردا حانى ۇلۇع مۇحامەدتىڭ ىقپالدى بيلەرىنىڭ ءبىرى بولادى. XV عاسىردىڭ 20-جىلدارىندا ۇلۇع مۇحامەد وردادان قۋىلعاندا، اقىن ءوز امىرشىسىمەن بىرگە كەتەدى. كوپ ۇزاماي قازاندا بيلىك قۇرعان ۇلۇع مۇحامەدتىڭ اقىلگويلەرى قاتارىندا بولعان اقىن، حان ولگەن سوڭ، داشتى-قىپشاققا قايتىپ ورالادى. 1456- جىلى شۋ القابىندا قازاق ورداسى قۇرىلعان كەزدە، اسانقايعى جاڭا مەملەكەتتىڭ ۇرانشىسىنا اينالادى. ءسىرا، ول قازاقتاردىڭ بۇرىنعى كوك وردا جەرىندەگى ۇكىمى ارتىپ، قازىرگى قازاقستاننىڭ ورتالىق جانە سولتۇستىك-باتىس القابىن قايتادان يەلەنگەن ۋاقىتى - 1465 -جىلى ءالى ءتىرى بولسا كەرەك. اڭىزدىڭ ايتۋىنشا، اقىن سارى ارقادا - ۇلىتاۋدا دۇنيە سالىپتى.
