«ارسەلورميتتال تەمىرتاۋ» ا ق مەملەكەت مەنشىگىنە قايتارىلادى - ۇكىمەت

Фото: Kazinform
Фото: Kazinform

ۇكىمەتتىڭ «ارسەلورميتتال تەمىرتاۋ» ا ق اكتسيونەرلەرىمەن كاسىپورىننىڭ مەنشىك قۇقىعىن قازاقستان رەسپۋبليكاسىنىڭ پايداسىنا بەرۋ تۋرالى كەلىسىمشارتتى راسىمدەۋى اياقتالۋعا جاقىن، دەپ حابارلايدى Kazinform.

«ۇكىمەت «ارسەلورميتتال تەمىرتاۋ» اق اكتسيونەرلەرىمەن الدىن الا ۋاعدالاستىققا قول جەتكىزگەنىن جانە كاسىپورىننىڭ مەنشىك قۇقىعىن قازاقستان رەسپۋبليكاسىنىڭ پايداسىنا بەرۋ تۋرالى كەلىسىمشارتتى راسىمدەۋ اياقتالۋ ۇستىندە ەكەندىگىن حابارلايمىز» دەلىنگەن ق ر ۇكىمەتىنىڭ باسپا ءسوز قىزمەتى تاراتقان حابارلامادا

مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن قاراعاندى وبلىسىندا «ارسەلورميتتال تەمىرتاۋ» ا ق- نىڭ كوستەنكو اتىنداعى شاحتاسىندا ورىن العان اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.

ءاليحان سمايىلوۆ كوستەنكو شاحتاسىنداعى اپاتتىڭ سەبەپتەرىن تەرگەۋ جونىندەگى ۇكىمەتتىك كوميسسيانى باسقاراتىن بولادى.

شاحتاداعى ءورتتىڭ سالدارىنان توپتىق جازاتايىم جاعدايدىڭ سەبەپتەرىنە جان-جاقتى تەرگەۋ جۇرگىزىلەتىن بولادى. سونىمەن قاتار كەلتىرىلگەن زالالدى باعالاۋ، زارداپ شەككەندەرگە جانە قازا تاپقانداردىڭ وتباسىلارىنا العاشقى كومەك كورسەتۋ جونىندە شارالار قابىلدانادى.

سوڭعى جاڭالىقتار