ارمەنيادا بيلىكتى باسىپ العىس كەلگەن 14 ادام قاماۋعا الىندى -پاشينيان

استانا. KAZINFORM - ارمەنيا پرەمەر-ءمينيسترى نيكول پاشينياننىڭ ايتۋىنشا، ەلدە بيلىكتى كۇشپەن باسىپ الۋ ارەكەتى جولى كەسىلدى، دەپ جازدى DW.

ونىڭ سوزىنشە، بۇل ارەكەتتى «قىلمىستىق- وليگارحيالىق ءدىني توپتار» ۇيىمداستىرعان. بۇل ءىس بويىنشا ارمەنيادا 14 ادام، ونىڭ ىشىندە ارحيەپيسكوپ تا ۇستالعان.
پاشينيان 25-ماۋسىم، سارسەنبى كۇنى Telegram-ارناسىندا جاريالاعان جازباسىندا:
- پوليتسيا قىزمەتكەرلەرى ارمەنيا رەسپۋبليكاسىنداعى جاعدايدى تۇراقسىزداندىرۋ جانە بيلىكتى باسىپ الۋ جونىندەگى قىلمىستىق-وليگارحيالىق ءدىني توپتاردىڭ اۋقىمدى ءارى زۇلىم جوسپارىن جۇزەگە اسىرتپاي، دەر كەزىندە توقتاتتى، - دەپ مالىمدەدى.
بيلىكتى كۇشپەن باسىپ الۋ ارەكەتى بويىنشا 14 ادام قاماۋعا الىنعان. ولاردىڭ قاتارىندا ارميان اپوستول شىركەۋىنىڭ ارحيەپيسكوپى باگرات (گالستانيان) دا بار. ارحيەپيسكوپ ۇكىمەتكە باعىتتالعان وتكىر سىنىمەن تانىمال.
قۇقىق قورعاۋ ورگاندارى 90 نان استام ءتىنتۋ جۇمىستارىن جۇرگىزدى. وپپوزيتسيا بۇل ارەكەتتەردى ساياسي استارى بار قۋدالاۋ دەپ اتادى.
تاڭەرتەڭنەن بەرى «قاسيەتتى كۇرەس» قوزعالىسى مۇشەلەرى مەن جاقتاستارىنىڭ ۇيلەرىندە تىنتۋلەر جۇرگىزىلگەن. ۇيىم ليدەرى ارحيەپيسكوپ باگراتپەن بىرگە تەرگەۋگە ارمەنيا وپپوزيتسيالىق «ارمەنيا» بلوگىنىڭ دەپۋتاتى ارتۋر ساركيسيان، ەلدەگى ەڭ كونە پارتيا -«داشناكتسۋتيۋن» مۇشەسى يگور ساركيسيان، مويىندالماعان تاۋلى قاراباق پارلامەنتىنىڭ بۇرىنعى دەپۋتاتى داۆيد گالستيان جەتكىزىلگەن.
ارمەنيا تەرگەۋ كوميتەتى عيماراتىنىڭ الدىندا ۇستالعانداردىڭ جاقتاستارى جينالىپ، ىشكى اسكەرلەر دە سوندا شوعىرلاندى.