پارلامەنت دەپۋتاتتارى كانيكۋلعا كەتتى
استانا. KAZINFORM - بۇگىن پارلامەنت پالاتالارىنىڭ بىرلەسكەن وتىرىسى ءوتىپ، وندا سەگىزىنشى سايلانعان پارلامەنتتىڭ ءۇشىنشى سەسسياسى رەسمي تۇردە جابىلدى.
اتاپ ايتقاندا، دەپۋتاتتار بيىلعى 1-قىركۇيەككە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى.
- بۇگىن سەگىزىنشى سايلاعان پارلامەنتتىڭ ءۇشىنشى سەسسياسىنىڭ جۇمىسىن اياقتاعالى وتىرمىز. ءبىز ءوز وكىلەتتىگىمىزدىڭ تۋرا بەل ورتاسىنا كەلدىك. ءىس جۇزىندە بۇل - بىرلەسە اتقارىپ جاتقان جۇمىسىمىزدىڭ مكاڭىزدى كەزەڭى، مەجەلى بەلەسى. شىن مانىندە، قازىرگى سايلانىم مەملەكەت باسشىسىنىڭ «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» فورمۋلاسىن جۇيەلى دە، دايەكتى تۇردە جۇزەگە اسىرىپ وتىرعان پارلامەنت دەۋگە بولادى. وسى جىلدارى دەپۋتاتتار ۇدايى پرەزيدەنت رەفورمالارىنىڭ العى شەبىنەن كورىندى، - دەدى ءماجىلىس ءتوراعاسى ەرلان قوشانوۆ.
ونىڭ ايتۋىنشا، پارلامەنت دەپۋتاتتارى ءاردايىم مەملەكەت باسشىسىنىڭ جان-جاقتى ويلاستىرىلعان حالىقتىڭ تالاپ- تىلەگىنە، ەلدىڭ مۇددەسىنە نەگىزدەلگەن ستراتەگياسىن باسشىلىققا الىپ كەلەدى. بۇل ۇستانىم باعىت- باعدارىمىزدى ايقىنداپ، كۇش- قۋاتىمىزدى ءبىر ارناعا جۇمىلدىرۋعا جول اشتى.
- پارلامەنتتىڭ كۇندەلىكتى جۇمىسى، ەڭ اۋەلى، وسى رەفورمالار مازمۇنىن ودان ءارى بايىتىپ، ناقتى ىسپەن قولداۋعا باعىتتالعان. سەسسيا باستالاردا مەملەكەت باسشىسى ءوز جولداۋىندا العا قويعان باستى مىندەتتەرى ءبىزدىڭ جۇمىسقا سەرپىن بەرىپ، قارقىن قوستى. ۇلتتىق قۇرىلتايدا ايتىلعان ستراتەگيالىق يدەيالار پارلامەنت نازارىن قوعامنىڭ ەڭ وزەكتى ماسەلەلەرىنە اۋداردى. پرەزيدەنتتىڭ سايلاۋالدى باعدارلاماسى اياسىنداعى زاڭنامالىق باستامالاردىڭ ءبارىن دەرلىك دەپۋتاتتىق كورپۋس وسى سەسسيادا ىسكە اسىردى. ءۇشىنشى سەسسيا بارىسىندا پارلامەنت پالاتالارىنىڭ 3 بىرلەسكەن وتىرىسى، سەنات پەن ءماجىلىستىڭ 39 جالپى وتىرىسى ءوتتى. قوس پالاتانىڭ قاراۋىندا 158 زاڭ جوباسى بولدى، ونىڭ ىشىندە 89 زاڭ قابىلداندى. سەسسيا بارىسىندا ءبىز الەۋمەتتىك ساياسات پەن ازاماتتارىمىزدىڭ مۇددەسى مىزعىماس باسىمدىق ەكەنىن ايقىن كورسەتتىك، - دەدى ءماجىلىس ءتورعاسى.
وسى ورايدا ول بۇل قادامدار ەلىمىزدىڭ نەگىزگى قارجى قۇجاتىندا - ءۇش جىلدىق بيۋدجەتتە كورىنىس تاپقانىن اتاپ ءوتتى. اتاپ ايتقاندا، ونىڭ شىعىس بولىگىنىڭ شامامەن 40 پايىزى الەۋمەتتىك ماسەلەلەردى شەشۋگە باعىتتالعان. ءبىلىم بەرۋ، دەنساۋلىق ساقتاۋ سالالارى مەن الەۋمەتتىك تولەمدەرگە باسا ءمان بەرىلدى.
- بيىلدىڭ باسىنان بازالىق زەينەتاقى 6,5 پايىز، ساباقتاس زەينەتاقى 8,5 پايىز ءوستى. الەۋمەتتىك تولەمدەر كولىمى دە، ونى الۋشىلار سانى دا ارتتى. قىركۇيەك ايىنان باستاپ ستيپەنديا مولشەرىن تاعى دا كوتەرۋ جوسپارلانعان. كەيىنگى 5 جىلدا ستيپەنديا ەكى ەسە دەرلىك وسكەنىن اتاپ وتكەن ءجون. وعان قوسا، عىلىمي اتاق ءۇشىن دە ۇستەمەاقى قاراستىرىلدى. سونىمەن قاتار، حالىقتى ساپالى سۋمەن قامتاماسىز ەتۋگە، اۋىلدى قولداۋعا قوسىمشا قاراجات ءبولىندى. اتالعان شارانىڭ ءبارى ازاماتتارىمىزدىڭ تۇرمىسىن جاقسارتۋعا، وڭىرلەردى دامىتۋ ماسەلەسىن شەشۋگە مۇمكىندىك بەرەدى، - دەدى ەرلان قوشانوۆ.
بۇدان بۇرىن حابارلانعانداي، 25-ماۋسىمدا ءماجىلىس ءتوراعاسى ەرلان قوشانوۆ VIII سايلانعان ق ر پارلامەنتىنىڭ ءۇشىنشى سەسسياسىنداعى پالاتانىڭ جۇمىسىن قورىتىندىلادى.
سونىمەن قاتار، 26-ماۋسىم كۇنى جالپى وتىرىستا سەنات ءتوراعاسى ماۋلەن اشىمبايەۆ ءۇشىنشى سەسسيادا پالاتا 89 زاڭدى قاراعانىن ايتتى.
