ارحەولوگتار تۇركيانىڭ ەجەلگى ايزانوي قالاسىنان 2000 جىل بۇرىنعى كوز بوياۋى مەن بەتكە جاعاتىن دالاپ تاپتى
ارحەولوگتار تۇركيانىڭ كۇتاحيا پروۆينتسياسىنداعى كونە ايزانوي قالاسىندا جۇرگىزىلگەن قازبا جۇمىستارى كەزىندە 10 ءتۇرلى-ءتۇستى سيرەك كەزدەسەتىن ماكياج ونىمدەرىن، سونداي-اق شاشقا ارنالعان اكسەسسۋارلار مەن زەرگەرلىك بۇيىمداردى تاپتى، دەپ حابارلايدى قازاقپارات Arkeonews سايتىنا سىلتەمە جاساپ.
ايزانوي قالاسى باتىس انادولىدا، كۇتاحيا پروۆينتسياسىنان وڭتۇستىك-باتىسقا قاراي 48 كيلومەتر جەردە ورنالاسقان.
قالانى 1824-جىلى ەۋروپالىق ساياحاتشىلار اشقان جانە 1830-1840-جىلدارى زەرتتەلگەن. ايزانويداعى عىلىمي قازبا جۇمىستارىن 1926-جىلى نەمىس ارحەولوگيالىق ينستيتۋتىنىڭ تاپسىرماسى بويىنشا د. كرەنكەر مەن م. شەدە باستاعان. قازىر قازبا جۇمىستارىن دۋملۋپىنار ۋنيۆەرسيتەتى جۇرگىزىپ جاتىر.
ايزانوي - ريم داۋىرىندەگى ەڭ ماڭىزدى قالالاردىڭ ءبىرى. وندا ءالى كۇنگە دەيىن ساقتالعان زيەۆس عيباداتحاناسى، ستاديون-تەاتر كەشەنى جانە بازار (ماتسەللۋم) بار.
كۇتاحيا پروۆينتسياسىنىڭ بيلىك وكىلدەرى مەن دۋملۋپىنار ۋنيۆەرسيتەتى بىرلەسىپ جۇرگىزگەن قازبا جۇمىستارى زيەۆس عيباداتحاناسىنىڭ شىعىسىنا جۇرگىزىلدى، دەپ حابارلادى دۋملۋپىنار ۋنيۆەرسيتەتىنىڭ ارحەولوگيا فاكۋلتەتىنىڭ جەتەكشىسى پروفەسسور گەكحان دجوشكۋن.
ارحەولوگتار كونە قالانىڭ بازار الاڭىنان 2000-جىلدان استام تاريحى بار دۇكەندەردى قازۋ بارىسىندا كوسمەتيكا جانە زەرگەرلىك بۇيىمدار دۇكەنىنىڭ قالدىقتارىن تاپتى. بەلگىلى بولعانداي، دۇكەندە پارفيۋمەريا، زەرگەرلىك بۇيىمدار مەن كوسمەتيكا ساتىلعان. وقيعا ورنىنان پارفيۋمەرلىك قۇتىلار، زەرگەرلىك بۇيىمدار مەن كوسمەتيكا تابىلدى.
«ەجەلگى ريمدىكتەر وپا- دالاپتاردى ۇلۋ قابىرشىعىندا ساقتاعانى بۇرىننان بەلگىلى، ءبىز قازبا جۇمىستارى جۇرگىزىلگەن دۇكەندەردەن كوپتەگەن ۇلۋ قابىرشىقتارىن تاپتىق»، - دەدى دجوشكۋن.
پروفەسسور ارحەولوگتاردىڭ 10 ءتۇرلى-ءتۇستى ماكياج ونىمدەرىن، سونداي-اق شاشقا ارنالعان اكسەسسۋارلار مەن زەرگەرلىك بۇيىمداردى تاپقانىن ايتتى.
بۇل جەردە قازبا جۇمىستارى 1970-جىلدان بەرى تۇراقتى جالعاسىپ كەلەدى.
