ارانداتۋشىلىق پيعىلداعى كەز كەلگەن ارەكەتكە قاتاڭ تىيىم سالىنادى - مەملەكەت باسشىسى

алаяқтық
Фото: polisia.kz

استانا. KAZINFORM - ەل تۇرعىندارى بارلىق جەردە، سونىڭ ىشىندە الەۋمەتتىك جەلىدە دە زاڭدى مۇلتىكسىز ساقتاۋى كەرەك. زاڭعا قايشى كەلەتىن، قوعامعا ىرىتكى سالاتىن جانە ارانداتۋشىلىق پيعىلداعى كەز كەلگەن ارەكەتكە قاتاڭ تىيىم سالىنادى.

بۇل تۋرالى قاسىم-جومارت توقايەۆ ۇلتتىق قۇرىلتايدىڭ ءۇشىنشى وتىرىسىندا ايتتى، دەپ حابارلايدى اقوردانىڭ باسپا ءسوز قىزمەتى.

«تاعى ءبىر ماڭىزدى قۇندىلىق بۇل - زاڭ جانە ءتارتىپ. زاڭ الدىندا - ءبارى بىردەي. بۇل - بارشاعا ورتاق مىزعىماس قاعيدا. مەملەكەت جۇگەنسىزدىككە، تارتىپسىزدىككە جانە بەيبەرەكەتتىككە ەشقاشان جول بەرمەيدى. مۇنى ءاربىر ازامات جەتە تۇسىنۋگە ءتيىس. بارشا ازاماتتار، بارلىق جەردە، سونىڭ ىشىندە الەۋمەتتىك جەلىدە دە زاڭدى مۇلتىكسىز ساقتاۋى كەرەك. زاڭعا قايشى كەلەتىن، قوعامعا ىرىتكى سالاتىن جانە ارانداتۋشىلىق پيعىلداعى كەز كەلگەن ارەكەتكە قاتاڭ تىيىم سالىنادى.

ءبىز «جاسامپاز ءپليۋراليزمدى تولىق قولدايمىز، ەلگە ىرىتكى سالاتىن راديكاليزمگە تۇبەگەيلى قارسىمىز» دەگەن قاعيداتتى بەرىك ۇستانامىز. ەل ىشىندەگى تارتىپكە ءارقايسىمىز جاۋاپتىمىز. الەمدى شىنىمەن وزگەرتكىڭ كەلسە، وزگەرىستى قاراپايىم نارسەدەن باستا دەپ بەكەر ايتىلماعان. ياعني، وتباسىڭدا بەرەكە بولۋىن ويلا، جۇمىس ورنىڭدى، ءۇي-جايىڭدى، اۋلاڭدى رەتكە كەلتىر، قوعامدىق ورىندا ادەپ ساقتا.

قۇقىقتىق مادەنيەتتىڭ دەڭگەيىن اڭعارتاتىن ايقىن كورسەتكىشتىڭ ءبىرى - ازاماتتارىمىزدىڭ كولىك جۇرگىزۋ مانەرى. جول ءجۇرۋ ەرەجەسىن جاپپاي بۇزۋدىڭ جانە جول ۇستىندەگى دورەكىلىكتىڭ زارداپتارى اسا اۋىر بوپ تۇر. جىل سايىن مىڭداعان ادام مەن بالا كولىك اپاتىنان قازا تابادى. بۇل - سولاردىڭ جاقىن- جۋىقتارى ءۇشىن عانا ەمەس، تۇتاس ەلىمىز ءۇشىن قايعىلى جاعداي. زاڭ بار جەردە، ءتارتىپ بار. كوبىنەسە قيىن ساتتەردە ازاماتتاردىڭ تارتىپكە باعىنۋى ولاردىڭ قاۋىپسىزدىگىنە كەپىل بولادى. جاقىندا الماتى قالاسىندا جەر سىلكىنگەندە كەيبىر بالاباقشالار مەن مەكتەپتەردەگى بالالار ۇيىمشىلدىقتىڭ وزىق ۇلگىسىن كورسەتتى. وسىدان-اق بالانى بالاباقشادان جانە باستاۋىش سىنىپتان باستاپ تارتىپكە باۋلۋدىڭ قانشالىقتى ماڭىزدى ەكەنىن ايقىن كورۋگە بولادى»، - دەدى پرەزيدەنت.

سوڭعى جاڭالىقتار