ارالدىڭ اۋىلدارىندا شەگىرتكە قاپتادى - ا ش م جاۋاپ بەردى
قىزىلوردا. KAZINFORM - الەۋمەتتىك جەلىدە قىزىلوردا وبلىسى ارال اۋدانىنىڭ ەلدى مەكەندەرىندە شەگىرتكە قاپتاپ كەتكەنى تۋرالى ۆيدەو تارادى.
Instagram الەۋمەتتىك جەلىسىنىڭ Zello aralsk پاراقشاسىندا جاريالانعان بەينەجازبادا ارال اۋدانى شيجاعا اۋىلىنىڭ قىزەكە، دوبال، ايتجانتابان، كوكوشاق سەكىلدى اۋماقتارىندا توتەنشە ەكولوگيالىق جاعداي قالىپتاسقانى كەلتىرىلگەن.
- سوڭعى بىرنەشە كۇندە اۋىل ماڭىنداعى جايىلىمدىق جانە شابىندىق جەرلەردى جاپپاي شەگىرتكە باسىپ، مال شارۋاشىلىعىنا ايتارلىقتاي زيان كەلتىردى. جاقىندا جۇرگىزىلگەن دەزينفەكتسيالىق جۇمىستاردان ەش ناتيجە كورمەي وتىرمىز.
سونىڭ كەسىرىنەن ءتورت تۇلىككە ارنالعان تابيعي ازىق - ءشوپ، جوڭىشقا مەن جايىلىم وتى كۇرت ازايىپ كەتتى. بۇل جاعداي مالدىڭ كۇيىنە، ءسۇت ونىمدىلىگىنە جانە جالپى مال شارۋاشىلىعىنىڭ تۇراقتىلىعىنا تىكەلەي اسەر ەتىپ وتىر. اۋىل تۇرعىندارى ءوز كۇشىمەن كۇرەسىپ كورگەن. ءبىراق جاندىككە قارسى ءتيىمدى شارا قولدانۋ مۇمكىن بولماي تۇر. ءبىز، اۋىل حالقى، ءتيىستى ورگانداردان، اۋىل شارۋاشىلىعى مينيسترلىگىنەن، توتەنشە جاعدايلار قىزمەتىنەن شۇعىل كومەك كورسەتۋدى، ارنايى دەزينسەكتسيالىق وڭدەۋ جۇمىسىن جۇرگىزۋدى سۇرايمىز، - دەلىنگەن جازبادا.
وسىعان ۇقساس جازبانى جۋرناليست گۇلميرا ءابىقاي Facebook الەۋمەتتىك جەلىسىندەگى پاراقشاسىندا جاريالادى. ۆيدەودان ارال اۋدانىنىڭ قاراقۇم اۋىلىندا وسىمدىك زيانكەسى قاپتاعانىن كورۋگە بولادى.
قىزىلوردا وبلىسىنىڭ سولتۇستىك اۋدانىندا قالىپتاسقان جاعدايعا بايلانىستى اۋىل شارۋاشىلىعى مينيسترلىگى رەسمي جاۋاپ بەردى. وندا قىزىلوردا وبلىسىندا شەگىرتكەگە قارسى 10 مىڭ گەكتاردان استام اۋىل شارۋاشىلىعى جەرى وڭدەلگەنى، كوكتەمگى ماۋسىمدىق قورعاۋ شارالارى اياسىندا ءۇيىرلى شەگىرتكەلەرگە قارسى بەلسەندى كۇرەس جۇمىسى جالعاسىپ جاتقانى جازىلعان.
- بۇگىنگى كۇنى وڭىردە جوسپارلانعان 17,132 مىڭ گەكتار اۋىل شارۋاشىلىعى القابىنىڭ 10,524 مىڭ گەكتارى وڭدەلدى. شەگىرتكەگە قارسى كۇرەس شارالارى ارال اۋدانىنا قاراستى قاراقۇم، سازدى، اققۇم، قوسامان جانە جىڭىشكەقۇم اۋىلدىق وكرۋگتەرىنىڭ اۋماعىندا جۇرگىزىلدى. جۇمىسقا 2 جەڭىل اۆياتسيا كەمەسى، 2 اسا جەڭىل ۇشاق، 12 جەرۇستى تەحنيكاسى، 5 درون، ارقاعا اسىلاتىن 45 بۇرىككىش جۇمىلدىرىلدى. مونيتورينگ جۇمىسىنا 48 مامان تارتىلعان. وبلىس بويىنشا شەگىرتكە زيانكەستەرىنە قارسى كۇرەس شارالارىن جۇرگىزۋ ءۇشىن بولجانعان جالپى اۋماق — 60,024 مىڭ گەكتار. جوسپارلانعان اۋماقتىڭ بارلىعى بويىنشا مەردىگەرلەرمەن كەلىسىمشارتتار جاسالعان، - دەلىنگەن جاۋاپتا.
مينيسترلىكتىڭ حابارلاۋىنشا، وڭىردە وبلىس اكىمىنىڭ ورىنباسارى باسقاراتىن جەدەل شتاب قۇرىلدى، وسىنداي شتابتار اۋدان دەڭگەيىندە دە جۇمىس ىستەيدى. جەرگىلىكتى جەرلەردە مونيتورينگ جۇرگىزۋ جانە ءىس- قيمىلدى ۇيلەستىرۋ ءۇشىن 279 ادام تارتىلعان.
- ءۇيىرلى شەگىرتكەلەردىڭ دەرناسىلدەرىن انىقتاۋ ماقساتىندا 445,8 مىڭ گەكتار جەرگە زەرتتەۋ جۇرگىزىلدى. كۇرەس شارالارى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ باقىلاۋىندا. ەگىن القاپتارىنىڭ زاقىمدانۋ جاعدايى تىركەلگەن جوق. وڭدەۋ جۇمىسىنىڭ بارىسىن اۋىل شارۋاشىلىعى مينيسترلىگىنىڭ اگروونەركاسىپتىك كەشەندەگى مەملەكەتتىك ينسپەكتسيا كوميتەتى ءتوراعاسىنىڭ ورىنباسارى سايات ساقمولدين قاداعالاپ وتىر.
ال قىزىلوردا مەن اقتوبە وبلىستارىنىڭ شەكاراسىنداعى جاعداي اۋىل شارۋاشىلىعى ۆيتسە- ءمينيسترى ەرمەك كەنجەحان ۇلىنىڭ باقىلاۋىندا.
وڭىرلەردە مونيتورينگ جانە كۇرەس جۇمىستارى جالعاسىپ جاتىر، - دەلىنگەن ۆەدومستۆو حابارلاماسىندا.
الەۋمەتتىك جەلىدەگى تۇرعىندار شاعىمىنا ارال اۋدانىنىڭ اكىمدىگى جاۋاپ بەردى.
- 2025 -جىلعى ءساۋىر ايىنىڭ سوڭىندا اۋدان اۋماعىندا زيانكەستەردىڭ (شەگىرتكە) جەر بەتىنە شىعۋى تىركەلىپ، بۇل باعىتتا بەلسەندى جۇمىس جۇرگىزىلىپ جاتىر. 27-28 - ءساۋىر كۇندەرى قاراقۇم جانە سازدى اۋىلدىق وكرۋگىنە قاراستى اۋماقتا يتاليالىق پرۋس دەرناسىلدەرى انىقتالدى. 2-5 - مامىر كۇندەرى اققۇم، قوسامان، جىڭىشكەقۇم اۋىلدىق وكرۋگتەرىندەگى وڭىرلەردە زيانكەستەردىڭ بەلسەندىلىگى بايقالدى. اۋدان بويىنشا (قاراقۇم، سازدى، جىڭىشكەقۇم، اققۇم، قوسامان، ساپاق اۋىلدىق وكرۋگتەرى) ەرەكشە قاۋىپتى زياندى ورگانيزمدەرگە قارسى حيميالىق وڭدەۋ جۇمىستارى جۇرگىزىلىپ جاتىر، - دەلىنگەن اۋدان اكىمدىگىنىڭ جاۋابىندا.
وسى كەزگە دەيىن 10242 گەكتار جەر وڭدەلگەن.
ماسەلەگە وراي وبلىستىق اۋىل شارۋاشىلىعى باسقارماسى دا ءۇن قاتتى. باسقارما اتقارىلعان جۇمىستى جوعارىداعى سارىندا بايانداعان.
- سونىمەن قاتار ارالقۇم، ساپاق، جىڭىشكەقۇم، بەكباۋىل اۋىلدىق وكرۋگتەرىنە قاراستى شارۋا قوجالىقتارى مەن مەملەكەتتىك جەر قورىندا زيانكەستەردەن زالالدانۋ دەرەكتەرى تىركەلدى. وسىعان بايلانىستى ساپاق اۋىلدىق وكرۋگىنىڭ كوكتەم ەلدى مەكەنىندە ورنالاسقان شارۋا قوجالىعىنىڭ جەرىندە 157 گەكتار اۋماق ارنايى تەحنيكامەن وڭدەلدى. اۋدان بويىنشا تىركەلگەن تاعى ءبىر ەرەكشە جاعداي - قاراقۇم اۋىلدىق وكرۋگىندەگى كوكاشا ەلدى مەكەنىندە زيانكەستەردىڭ تۇرعىن ۇيلەر اۋلاسىنا دەيىن كىرىپ كەتكەنى. بۇل ەلدى مەكەندە 4 ءۇي ورنالاسقان. قازىرگى ۋاقىتتا بۇل ايماق تولىقتاي باقىلاۋعا الىنىپ، قاجەتتى شارالار اتقارىلىپ جاتىر. قالعان اۋىلدىق وكرۋگ ورتالىقتارىندا زيانكەستەردىڭ باسىپ كىرۋ دەرەكتەرى تىركەلمەگەن، - دەلىنگەن باسقارما جاۋابىندا.
بۇعان دەيىن ءبىز قىزىلوردا وبلىسىندا بيىل شەگىرتكەلەر جىلداعىدان ەكى اپتا ەرتە ويانعانىن جازعانبىز.
