اراب مەملەكەتتەرى حاماس- تان قارۋسىزدانۋدى جانە بيلىكتەن باس تارتۋدى تالاپ ەتتى

استانا. KAZINFORM - اراب مەملەكەتتەرى العاش رەت گازا سەكتورىن باقىلاۋدى پالەستينا اكىمشىلىگىنە بەرۋ تۋرالى ۇستانىمدى جاريا تۇردە ماقۇلدادى.

قاتار، ساۋد ارابياسى، مىسىر، يوردانيا جانە تۇركيا حاماس- تى قارۋسىزداندىرۋعا جانە گازا سەكتورىنداعى بيلىكتەن باس تارتۋعا شاقىراتىن دەكلاراتسياعا قول قويدى.

نيۋ- يورك دەكلاراتسياسى دەپ اتالاتىن قۇجات ب ۇ ۇ- نىڭ شتاب- پاتەرىندە يزرايل مەن پالەستينا قاقتىعىسى ماسەلەسىنە ارنالعان كونفەرەنسيانىڭ قورىتىندىسى بويىنشا قابىلداندى.

مالىمدەمەنى 17 ەل، سونداي-اق ەۋروپا وداعى مەن پەن اراب مەملەكەتتەرى ليگاسى قولدادى.

- گازاداعى سوعىستى اياقتاۋ تۇرعىسىندا حاماس بيلىكتەن باس تارتىپ، حالىقارالىق قولداۋمەن پالەستينا اكىمشىلىگىنە قارۋدى تاپسىرۋى كەرەك، - دەلىنگەن دەكلاراتسيا ماتىنىندە.

بۇل مالىمدەمە - اراب مەملەكەتتەرى ليگاسى مۇشەلەرىنىڭ حاماس- تى العاش رەت بىرلەسىپ ايىپتاۋى.

سوعىستى توقتاتۋعا ارنالعان ۇندەۋ

دەكلاراتسيادا يزرايلدىڭ گازاداعى بەيبىت تۇرعىندار مەن ينفراقۇرىلىمعا جاساعان سوققىسى، گۋمانيتارلىق كومەككە شەكتەۋ قويۋى، باتىس جاعالاۋدا ەلدى مەكەن سالۋى جانە قونىستانعاندار تاراپىنان بولعان زورلىق-زومبىلىق ايىپتالعان. قۇجاتتا يزرايلدى پالەستينالىقتاردىڭ تاۋەلسىز مەملەكەت قۇرۋ قۇقىعىن تانۋعا جانە اراب اۋماعىن، سونىڭ ىشىندە شىعىس يەرۋساليمدى باسىپ الۋىن توقتاتۋعا شاقىرادى.

- سوعىستى توقتاتۋ، كەپىلگە الىنعانداردى بوساتۋ جانە تاۋەلسىز ءارى دەموكراتيالىق پالەستينا مەملەكەتىن قۇرۋدى جۇزەگە اسىرۋ ارقىلى عانا وسى وڭىردەگى قارىم-قاتىناستى قالىپقا كەلتىرۋگە قول جەتكىزە الامىز، - دەپ اتالىپ وتكەن قۇجاتتا.

حالىقارالىق ميسسيا جانە ەكونوميكا

كونفەرەنسياعا قاتىسقان ەلدەردىڭ وكىلدەرى ب ۇ ۇ قاۋىپسىزدىك كەڭەسىنىڭ مانداتى بويىنشا گازا سەكتورىندا ۋاقىتشا حالىقارالىق تۇراقتاندىرۋ ميسسياسىن قۇرۋ، سونداي-اق پالەستينا ەكونوميكاسى مەن ءبىلىم بەرۋ جۇيەسىن قالپىنا كەلتىرۋ يدەياسىن قولدادى.

پالەستينا جانە يزرايل وقۋلىقتارىنداعى وشپەندىلىككە الىپ كەلەتىن ماتەريالداردى جويۋ قاجەتتىلىگى ەرەكشە اتاپ وتكەن.

ساياسي بەلگى مەن پەرسپەكتيۆالار

كونفەرەنسيانىڭ تەڭ ءتوراعالارى فرانسيا مەن ساۋد ارابياسى بۇل دەكلاراتسيانى تاريحي ماڭىزى بار قۇجات دەپ اتادى.

كونفەرەنسياعا قاتىسقان فرانسيا مەن باسقا دا 14 ەلدىڭ سىرتقى ىستەر مينيسترلەرى الەم ەلدەرىن پالەستينا مەملەكەتىن مويىنداۋعا شاقىراتىن «نيۋ- يورك ۇندەۋى» اتتى باستاما كوتەردى. بۇل تۋرالى فرانسيا سىرتقى ىستەر ءمينيسترى جان-نوەل باررو ءمالىم ەتتى.

- ءبىز پالەستينا مەملەكەتتىلىگىن وڭىردەگى تۇراقتى بەيبىتشىلىك جولىنداعى قاجەت قادام رەتىندە تانۋدى ىلگەرىلەتۋ ءۇشىن كۇش-جىگەرىمىزدى بىرىكتىرەمىز، - دەدى باررو.

مالىمدەمەگە اندوررا، اۋستراليا، كانادا، فينليانديا، فرانسيا، يسلانديا، يرلانديا، ليۋكسەمبۋرگ، مالتا، جاڭا زەلانديا، نورۆەگيا، پورتۋگاليا، سان-مارينو، سلوۆەنيا جانە يسپانيانىڭ سىرتقى ىستەر مينيسترلەرى قول قويدى.

سونداي- اق ول اراب ەلدەرىنىڭ ءبىرتۇتاس ۇستانىمىنا توقتالدى:

- اراب ەلدەرى العاش رەت حاماس- تى قارۋسىزداندىرۋعا، ونى گازا سەكتورىن باسقارۋدان شىعارۋعا شاقىردى جانە يزرايلمەن قارىم- قاتىناستى قالىپقا كەلتىرۋگە دايىن ەكەندىكتەرىن مالىمدەدى، — دەدى مينيستر.

دەگەنمەن، يزرايلدىڭ ءوزى جانە ونىڭ نەگىزگى وداقتاسى ا ق ش كونفەرەنسياعا قاتىسپادى. يزرايلدىڭ شەنەۋنىكتەرى دەكلاراتسيانىڭ مازمۇنىن سىناپ، قازىرگى جاعدايدا پالەستينا مەملەكەتىن قۇرۋ مۇمكىندىگىن جوققا شىعاردى.

ال ۇلى بريتانيا مەن فرانسيا قىركۇيەكتە پالەستينا مەملەكەتىن مويىنداۋ نيەتتەرىن جاريالادى.

وتكەن اپتادا فرانسيا پرەزيدەنتى ەممانۋەل ماكرون قىركۇيەكتە ب ۇ ۇ باس اسسامبلەياسىندا پالەستينانى مويىندايتىنىن جاريالادى.

جاقىندا بۇل باستاماعا ۇلى بريتانيا ۇكىمەتىنىڭ باسشىسى دا قوسىلدى. ۇلى بريتانيا پرەمەر-ءمينيسترى كير ستارمەر ەگەر يزرايل الداعى سەگىز اپتا ىشىندە اتىستى توقتاتۋعا جانە ۇزاق مەرزىمدى بىتىمگەرشىلىك پروتسەسىنە كەلىسپەسە، ۇلى بريتانيا قىركۇيەكتەگى كەزدەسۋگە دەيىن پالەستينا مەملەكەتىن مويىندايتىنىن ايتتى.

بۇدان بۇرىن حابارلانعانداي، گازانىڭ قورشاۋداعى سەكتورىنداعى بۇكىل حالىق وتكىر ازىق-تۇلىك تاپشىلىعىن باستان كەشىرىپ وتىر. بۇل تۋرالى ب ۇ ۇ جاريالاعان «2025 -جىلعى جاھاندىق ازىق-تۇلىك قاۋىپسىزدىگى مەن تاماقتانۋ» اتتى باياندامادا ايتىلعان.

وسىعان دەيىن گازا سەكتورىندا اشتىقتان قايتىس بولعاندار سانى 127 ادامعا جەتكەنى ءمالىم بولدى.

اۆتور

رۋسلان عابباسوۆ