اراب ەلدەرى يرلانديا، نورۆەگيا جانە يسپانيانىڭ پالەستينانى مويىنداۋىن قالاي قابىلدادى

استانا. KAZINFORM - يرلانديا، نورۆەگيا جانە يسپانيا 28-مامىردان باستاپ پالەستينا مەملەكەتىن مويىندايتىندىقتارىن مالىمدەدى. اراب ەلدەرى ەۋروپالىق مەملەكەتتەردىڭ پالەستينانى مويىنداۋىنا قالاي قارايتىنى جايلى Kazinform-نان وقىڭىزدار.

پالەستينا، ساۋد ارابياسى، مىسىر جانە يوردانيا ەۋروپانىڭ ءۇش مەملەكەتىنىڭ شەشىمىن جوعارى باعالادى

پالەستينا باسشىسى ماحمۋد ابباس كەڭسەسى نورۆەگيا، يسپانيا جانە يرلانديانىڭ پالەستينا مەملەكەتىن مويىندايتىندىنى تۋرالى مالىمدەمەلەرىن قۇپتادى. پرەزيدەنت اكىمشىلىگى جاريا ەتكەن ءۇش بولەك مالىمدەمەدە سوڭعى جىلدارى ءۇش ەلدىڭ پالەستينا حالقىنىڭ قۇقىقتارىنا كورسەتكەن قولداۋىن، سونداي-اق حالىقارالىق فورۋمداردا «پالەستيندىكتەردىڭ ءوز جەرىندە ءوزىن-ءوزى انىقتاۋى» پايداسىنا ولاردىڭ داۋىس بەرۋلەرىن جوعارى باعالانعان.

اتالعان ەلدى ازات ەتۋ ۇيىمى دا نورۆەگيا، يسپانيا جانە يرلانديا شەشىمىن قولداپ، مالىمدەمە جاسادى.

«پالەستينا حالقى باستان وتكىزگەن ونداعان جىلدار بويعى پالەستيندىك ۇلتتىق كۇرەستەن، ازاپتان، وككۋپاتسيادان، ناسىلشىلدىكتەن، ادام ولتىرۋدەن، ەزگىدەن، زورلىق-زومبىلىقتان جانە قيراتۋلاردان كەيىن ازات الەم شىندىق پەن ادىلەتتىلىك جولىندا جەڭىسكە جەتكەن تاريحي ساتكە كۋا بولدى. ءبىز پالەستينا تاۋەلسىز مەملەكەتىن مويىنداعان جانە مويىندايتىن الەم ەلدەرىنە العىس ايتامىز. ءبىز بۇل ايماقتاعى تۇراقتىلىققا، قاۋىپسىزدىككە جانە بەيبىتشىلىككە اپاراتىن جول ەكەنىن راستايمىز»، - دەپ مالىمدەدى پالەستينانى ازات ەتۋ ۇيىمى اتقارۋشى كوميتەتىنىڭ باس حاتشىسى حۋسەين اش-شەيح.

حاماس ساياسي بيۋروسىنىڭ جوعارى لاۋازىمدى مۇشەسى باسەم نايم ءۇش ەۋروپالىق ەلدىڭ اتالعان ەلدىڭ مەملەكەتتىگىن مويىنداۋعا يتەرمەلەگەن جايت پالەستينا حالقىنىڭ «باتىل قارسىلىعى» بولعانىن ءمالىم ەتتى.

«بۇل دايەكتى مويىنداۋلار پالەستينا حالقىنىڭ باتىل قارسىلىعى مەن اڭىزعا اينالعان توزىمدىلىگىنىڭ تىكەلەي ناتيجەسى سانالادى… ءبىز بۇل پالەستينا ماسەلەسى بويىنشا حالىقارالىق ۇستانىمنىڭ بەتبۇرىستى كەزەڭى بولادى دەپ سانايمىز»، - دەدى نايم.

ساۋد ارابياسى پالەستينا مەملەكەتىن ءۇش ەۋروپالىق ەلدىڭ مويىنداۋىن قۇپتادى جانە جوعارى باعالادى.

«سىرتقى ىستەر مينيسترلىگى ساۋد ارابياسى كورولدىگى باۋىرلاس پالەستينا مەملەكەتىن نورۆەگيا كورولدىگى، يسپانيا كورولدىگى جانە يرلانديا رەسپۋبليكاسىنىڭ مويىنداۋىن قولداۋ، ريزاشىلىعىن بىلدىرەدى»، - دەلىنگەن ۆەدومستۆو مالىمدەمەسىندە.

يوردانيا دۋبلين، وسلو جانە ءمادريدتىڭ ۇيلەسىمدى ارەكەتىن «پالەستينا مەملەكەتتىلىگىنە ماڭىزدى جانە ايتارلىقتاي قادام» رەتىندە قولداۋ ءبىلدىردى.

«ءبىز دوستاس ەۋروپالىق ەلدەردىڭ بۇگىن پالەستينا مەملەكەتىن مويىنداۋ تۋرالى شەشىم قابىلداۋىن قۇپتايمىز»، - دەدى يوردانيانىڭ سىرتقى ىستەر ءمينيسترى ايمان سافادي امماندا وتكەن باسپا ءسوز ءماسليحاتىندا.

«ءبىز بۇل شەشىمدى باعالايمىز جانە ونى 1967-جىلدىڭ شىلدەسىندەگى شەكارا بويىمەن تاۋەلسىز، ەگەمەن پالەستينا مەملەكەتىن قامتيتىن ەكى مەملەكەت قۇرۋ تۋرالى شەشىمنىڭ ماڭىزدى قادامى دەپ سانايمىز»، - دەدى سافادي.

مىسىر دا ەۋروپانىڭ ءۇش ەلىنىڭ پالەستينانى مويىنداۋ تۋرالى شەشىمىن قۇپتايدى جانە باسقا مەملەكەتتەردى دە ۇلگى الۋعا شاقىرادى.

«مىسىر اراب رەسپۋبليكاسى مۇنداي قادامعا ءالى بارا قويماعان ەلدەردى پالەستينا مەملەكەتىن مويىنداۋعا قاراي ىلگەرى جىلجۋعا ۇندەيدى»، - دەلىنگەن اراب رەسپۋبليكاسى سىرتقى ىستەر مينيسترلىگىنىڭ مالىمدەمەسىندە.

اراب مەملەكەتتەرى ليگاسىنىڭ باس حاتشىسى احمەد ابۋل گەيت تە پالەستينانىڭ مويىندالۋىن قۇپتاپ، ونى باتىل قادام دەپ سانايتىنىن جەتكىزدى.

«مەن بۇل ەلدەردى وسىناۋ قاقتىعىستا تاريحتىڭ دۇرىس جاعىنا قاراي قادام جاساعانى ءۇشىن قۇتتىقتايمىن جانە العىس ايتامىن. مۇنداي قادام ءالى جاساماعان ەلدەردى العاشقى باتىل قادامىن جاساعان ءۇش مەملەكەتتىڭ جولىن ۇستانۋعا شاقىرامىن»، - دەدى اراب مەملەكەتتەرى ليگاسىنىڭ باس حاتشى.

پالەستينانىڭ مويىندالۋ جىلناماسى

2024-جىل

وسى ايدا بۇۇ باس اسسامبلەياسىنىڭ 193 مۇشەسىنىڭ 143 ءى پالەستينانىڭ ب ۇ ۇ- عا كىرۋىن قولداپ داۋىس بەردى. تاياۋ شىعىستىڭ، افريكا مەن ازيانىڭ باسىم بولىگى پالەسينانىڭ مەملەكەتتىلىگىن مويىندايدى. دەگەنمەن، اقش، كانادا، اۆستراليا، جاپونيا، وڭتۇستىك كورەيا جانە باتىس ەۋروپانىڭ كوپتەگەن مەملەكەتى پالەستيندىكتەردىڭ مەملەكەتتىلىگىن مويىنداۋعا اسىعار ەمەس.

بيىل پالەستينانى باگام ارالدارى، ترينيداد پەن توباگو، يامايكا جانە باربادوس مويىندادى.

2011-2023-جىلدارى

AlJazeera اگەنتتىگىنىڭ حابارلاۋىنشا، 2011-جىلى پالەستينا ب ۇ ۇ- عا تولىققاندى مۇشە رەتىندە قوسىلا الماعانىمەن يۋنەسكو پالەستيندىكتەرگە ب ۇ ۇ- نىڭ مادەنيەت جونىندەگى اگەنتتىگىنە تولىققاندى مۇشە جولىنا مۇمكىندىك بەردى. وسىدان كەيىن ا ق ش اتالعان ورگاندى قارجىلاندىرۋدان باس تارتقان بولاتىن.

2012-جىلى باس اسسامبلەياسى پالەستينا مارتەبەسىن „مۇشە سانالمايتىن باقىلاۋشى مەملەكەتكە» وزگەرتۋ ءۇشىن داۋىس بەردى. ال 2015-جىلى حالىقارالىق قىلمىستىق سوت پالەستينا مۇددەسىنە وڭ شەشىم شىعاردى.

2023-جىل: مەكسيكا

2019-جىل: سەنت-كيتس پەن نيەۆيس

2018-جىل: كولۋمبيا

2015-جىل: سەنت-ليۋسيا

2014 جىل: شۆەتسيا

2013-جىل: گۆاتەمالا، گايتي، ۆاتيكان

2012-جىل: تايلاند

2011-جىل: چيلي، گايانا، پەرۋ، سۋرينام، ۋرۋگۆاي، لەسوتو، وڭتۇستىك سۋدان، سيريا، ليبەريا، سالۆادور، گوندۋراس، سەنت-ۆينسەنت پەن گرەنادينى، بەليز، دومينيكا، انتيگۋا جانە باربۋدا، گرەنادا، يسلانديا.

2000-2010-جىلدارى

1999-جىلدىڭ 4-مامىرىنداعى وسلو كەلىسىمىنە سايكەس، پالەستينا تاۋەلسىز مەملەكەت بولۋى ءتيىس ەدى. الايدا، جاڭا مىڭجىلدىقتا ەكىنشى حالىق كوتەرىلىسىنىڭ باستالۋىمەن ەرەكشەلەندى.

2010 جىل: برازيليا، ارگەنتينا، بوليۆيا، ەكۆادور

2009 جىل: ۆەنەسۋەلا، دومينيكان رەسپۋبليكاسى

2008 جىل: كوستا- ريكا، ليۆان، كوت- د’يۆۋار

2006 جىل: چەرنوگوريا

2005 جىل: پاراگۆاي

2004 جىل: شىعىس تيمور

1989-1999 جىلدارى

العاشقى كەلىسىمگە 1993-جىلدىڭ 13-قىركۇيەگىندە وسلودا قول قويىلدى. يزرايلدىك جانە پالەستيندىك كوشباسشىلار اراسىنداعى كەلىسىمدە ءار تاراپ العاش رەت ءبىر-ءبىرىن مويىندادى. ەكى تاراپتا ۇزاق جىلدارعا سوزىلعان جانجالدى دوعارۋعا ۋادە بەردى. ەكىنشى كەلىسىم 1995-جىلدىڭ قىركۇيەگىندە جاسالدى. وسلو كەلىسىمى پالەستيندىكتەردىڭ يزرايل جانىنداعى پالەستيندىك مەملەكەتتىك فورمانى وزدەرى تاڭداۋىنا جول اشۋى ءتيىس ەدى.

1998-جىل: مالاۆي

1995-جىل: و ا ر، قىرعىزستان

1994-جىل: تاجىكستان، وزبەكستان، پاپۋا-جاڭا گۆينەيا

1992-جىل: قازاقستان، ازەربايجان، تۇرىكمەنستان، گرۋزيا، بوسنيا مەن گەرتسەگوۆينا.

1991-جىل: سۆازيلەند كورولدىگى

1989-جىل: رۋاندا، ەفيوپيا، يران، بەنين، كەنيا، ەكۆاتوريالدى گۆينەيا، ۆانۋاتۋ، فيليپپين.

1988-جىل

1988-جىلدىڭ 15-قاراشاسىندا پالەستينانى ازات ەتۋ ۇيىمىنىڭ ءتوراعاسى ياسير ارافات استاناسى يەرۋساليم بولاتىن پالەستينا تاۋەلسىز مەملەكەتىن جاريا ەتتى. ول مۇنداي مالىمدەمەنى الجيردە جاسادى. الجير دە پالەستينا تاۋەلسىزدىگىن ءبىرىنشى بولىپ مويىندادى. سودان كەيىن پالەستينا تاۋەلسىزدىگىن مويىنداعان ەلدەر مىنالار: باحرەين، يندونەزيا، يراك، كۋۆەيت، ليۆيا، مالايزيا، ماۆريتانيا، ماروككو، سومالي، تۋنيس، تۇركيا، يەمەن، اۋعانستان، بانگلادەش، كۋبا، يوردانيا، ماداگاسكار، مالتا، نيكاراگۋا، پاكىستان، قاتار، ساۋد ارابياسى، اراب امىرلىكتەرى، سەربيا، زامبيا، البانيا، برۋنەي، دجيبۋتي، ماۆريكي، سۋدان، كيپر، چەحيا، سلوۆاكيا، مىسىر، گامبيا، ءۇندىستان، نيگەريا، سەيشەل ارالدارى، شري-لانكا، ناميبيا، رەسەي، بەلارۋس، ۋكراينا، ۆەتنام، قىتاي، بۋركينا-فاسو، كومور ارالدارى، گۆينەيا، گۆينەيا- بيساۋ، كامبودجا، مالي، موڭعوليا، سەنەگال، ۆەنگريا، كابو-ۆەردە، سولتۇستىك كورەيا، نيگەر، رۋمىنيا، تانزانيا، بولگاريا، مالديۆ، گانا، توگو، زيمبابۆە، چاد، لاوس، سەررا-لەونە، ۋگاندا، كونگو رەسپۋبليكاسى، انگولا، موزامبيك، سان-تومە جانە پرينسيپي، گابون، ومان، پولشا، كونگو دەموكراتيالىق رەسپۋبليكاسى، بوتسۆانا، نەپال، بۋرۋندي، ورتالىقافريكالىق رەسپۋبليكا، بۋتان، باتىس ساحارا.