اراب «شەنگەنى» جاقىن ارادا ىسكە قوسىلادى

استانا. KAZINFORM - ب ا ءا ەكونوميكا ءمينيسترى ابداللا بەن تۋكا ءال-ءمارريدىڭ مالىمدەۋىنشە، پارسى شىعاناعى ەلدەرىنە ورتاق ءبىرىڭعاي تۋريستىك ۆيزا ماقۇلدانىپ، جاقىن ارادا ەنگىزىلمەك.

AZƏRTAC شەتەلدىك ب ا ق- قا سىلتەمە جاساپ حابارلاعانداي، بۇل ءبىر رەتتىك ءبىرىڭعاي ۆيزا شەتەلدىك تۋريستەرگە پارسى شىعاناعى اراب مەملەكەتتەرى ىنتىماقتاستىعى كەڭەسىنە (پ ش ا م ى ك) مۇشە بارلىق التى ەلگە - ب ا ءا، ساۋد ارابياسى، باحرەين، كاتار، ومان جانە كۋۆەيتكە - ءبىر عانا قۇجاتپەن كىرۋگە مۇمكىندىك بەرەدى. بۇل جاڭالىق ءوڭىردىڭ تۋريزم سالاسى ءۇشىن ۇلكەن ىلگەرىلەۋ رەتىندە باعالانىپ وتىر. ساراپشىلاردىڭ پىكىرىنشە، ول جاڭا جۇمىس ورىندارىن اشىپ، ج ءى ءو- ءنىڭ وسۋىنە ايتارلىقتاي ۇلەس قوسا الادى.

ءبىرىڭعاي ۆيزانىڭ ەنگىزىلۋىمەن ىسكەرلىك جانە دەمالىس ساپارلارىن بىرىكتىرەتىن ارالاس ساياحاتتاردىڭ تانىمالدىعى ارتادى دەپ كۇتىلۋدە. تۋريستەر ەندى تەك ىسكەرلىك ماسەلەلەردى شەشىپ قانا قويماي، كورشىلەس ەلدەردى دە ارالاپ، ساپارلارىن مازمۇندى ءارى قىزىقتى ەتە الادى.

پارسى شىعاناعى اراب مەملەكەتتەرى ىنتىماقتاستىعى كەڭەسىنىڭ ستاتيستيكالىق ورتالىعىنىڭ دەرەكتەرى بويىنشا، 2023 -جىلى وڭىرگە 68,1 ميلليون قوناق كەلگەن. تۋريزمنەن تۇسكەن تابىس 10,4 ميلليارد دوللار بولىپ، پاندەمياعا دەيىنگى 2019 -جىلمەن سالىستىرعاندا %42,8- عا ارتقان.

دۇنيەجۇزىلىك ساياحات جانە تۋريزم كەڭەسىنىڭ (WTTC) دەرەكتەرىنە سايكەس، ب ا ءا- دە تۋريزم سەكتورىنىڭ ەكونوميكاعا قوسقان ۇلەسى ارتىپ كەلەدى. بۇل سالادا 2023 -جىلى 833 مىڭ ادام جۇمىس ىستەگەن. 2030 -جىلعا قاراي بۇل كورسەتكىش 1 ميلليوننان اسادى دەپ جوسپارلانىپ وتىر. وسىلايشا، ەلدەگى ءار توعىزىنشى ادام قوناقۇي جانە تۋريزم سالاسىندا ەڭبەك ەتەتىن بولادى.

ءوڭىردىڭ باستى تۋريستىك ورتالىعى سانالاتىن دۋباي 2025 -جىلدىڭ العاشقى ءتورت ايىندا 7,15 ميلليون تۋريست قابىلدادى. بۇل 2024 -جىلدىڭ وسىنداي كەزەڭىمەن سالىستىرعاندا %7- عا كوپ.

ايتا كەتەلىك ماروككو 7,2 ميلليون تۋريست قابىلداپ، جاڭا رەكورد ورناتتى.

اۆتور

نازىم بولەسوۆا