پارا العان شەنەۋنىك سوتتالىپ، باستىعى جۇمىستان قۋىلدى
پاۆلودار. KAZINFORM - ت ج م ونەركاسىپتىك قاۋىپسىزدىك كوميتەتىنىڭ پاۆلودار وبلىسى بويىنشا دەپارتامەنتىنىڭ ءبولىم باسشىسى سوتتالدى.
17-ماۋسىمدا پاۆلودار قالاسىنىڭ № 2-سوتىنىڭ ۇكىمىمەن توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتى وبلىستىق دەپارتامەنتىنىڭ ءبولىم باسشىسى ق. تەمىرحانوۆ 3 جىلعا باس بوستاندىعىنان ايىرىلدى.
ول ونەركاسىپتىك قاۋىپسىزدىك سالاسىندا جىل سايىن تەكسەرۋ جۇرگىزۋ كەزىندە جالپى قامقورلىعى ءۇشىن كاسىپورىن باسشىسىنان 1,3 ميلليون تەڭگە سوماسىندا پارا الدى دەپ ايىپتالدى.
مەملەكەتتىك قىزمەت تۋرالى زاڭنىڭ 10-بابىنا سايكەس مەمورگان باسشىلارى باعىنىستى مەملەكەتتىك قىزمەتشىلەر تاراپىنان سىبايلاس جەمقورلىقتىڭ الدىن الۋعا ءتيىس.
وسىعان بايلانىستى قىلمىستىق-پروتسەستىك كودەكستىڭ 200-بابى تارتىبىندە ەنگىزىلگەن پاۆلودار وبلىسىنىڭ سىبايلاس جەمقورلىققا قارسى قىزمەتىنىڭ ۇسىنىسى بويىنشا ءوزىنىڭ لاۋازىمدىق مىندەتتەرىن تيىسىنشە ورىنداماعانى ءۇشىن جوعارىدا اتالعان دەپارتامەنتتىڭ باسشىسى مەن ونىڭ ورىنباسارى لاۋازىمىنان بوساتىلدى.
سوت ۇكىمى زاڭدى كۇشىنە ەنگەن جوق.
