اقىلى جولداردا كىم تەگىن جۇرە الادى

استانا. KAZINFORM - اۆتوموبيل جولدارى تۋرالى زاڭنىڭ 5-2- بابىنا سايكەس كەي ساناتتار اقىلى اۆتوموبيل جولىن پايدالانعانى ءۇشىن اقى تولەۋدەن بوساتىلادى.

قىزمەتتىك مىندەتتەرىن ورىنداعان كەزدە:

جەدەل مەديتسينالىق جاردەم ۇيىمدارىنىڭ؛

اۆاريالىق-قۇتقارۋ قىزمەتتەرىنىڭ؛

قۇقىق قورعاۋ ورگاندارىنىڭ؛

كولىكتىك باقىلاۋ ورگاندارىنىڭ؛

ارناۋلى مەملەكەتتىك ورگانداردىڭ؛

قارۋلى كۇشتەرىنىڭ، باسقا دا اسكەرلەر مەن اسكەري قۇرالىمداردىڭ؛

جالپىعا ورتاق پايدالانىلاتىن حالىقارالىق جانە رەسپۋبليكالىق ماڭىزى بار اقىلى اۆتوموبيل جولدارىن كۇتىپ ۇستاۋ جانە ولارعا تەحنيكالىق قىزمەت كورسەتۋدى تىكەلەي جۇزەگە اسىراتىن ۇلتتىق وپەراتوردىڭ؛

قازاقستان زاڭناماسىنا سايكەس ايقىندالعان، ءتيىستى اقىلى اۆتوموبيل جولىندا (ۋچاسكەسىندە) كۇتىپ- ۇستاۋدى جانە تەحنيكالىق قىزمەت كورسەتۋدى تىكەلەي جۇزەگە اسىراتىن كونسەسسيونەردىڭ ارناۋلى اۆتوكولىك قۇرالدارى.

قالا ماڭىنداعى قاتىناستا جانە اقىلى اۆتوموبيل جولىنا ىرگەلەس ەلدى مەكەندەردە:

- كەنتتەردى، اۋىلداردى اۋدان نەمەسە وبلىس ورتالىقتارىمەن، استانامەن نەمەسە رەسپۋبليكالىق ماڭىزى بار قالالارمەن قوساتىن قاتىناستاردا جولاۋشىلار مەن باگاجدى تۇراقتى تاسىمالدايتىن اۆتوبۋستار؛

- اقىلى اۆتوموبيل جولىنا ىرگەلەس اۋدانداردىڭ اتالعان اكىمشىلىك- اۋماقتىق بىرلىك اۋماعىندا بەلگىلەنگەن تارتىپپەن تىركەلگەن اۆتوبۋستارى ءبىر اۋدان شەگىندە ءجۇرىپ-تۇرۋ ءۇشىن؛

- جۇك اۆتوكولىك قۇرالدارى، وزدىگىنەن جۇرەتىن دوڭعالاقتى اۋىلشارۋاشىلىق، مەليوراتسيالىق ماشينالار تاياۋ كولىككە ارنالعان ايرىقتارى اراسىنداعى جول كەسىندىلەرى شەگىندە سۋ توسقاۋىلدارى مەن تەمىر جولداردى كەسىپ ءوتۋ ءۇشىن؛

- اقىلى اۆتوموبيل جولىنا ىرگەلەس اۋدانداردىڭ جەكە جانە زاڭدى تۇلعالارىنىڭ اتالعان اكىمشىلىك- اۋماقتىق بىرلىك اۋماعىندا بەلگىلەنگەن تارتىپپەن تىركەلگەن جەڭىل اۆتوموبيلدەرى ءبىر اۋدان شەگىندە ءجۇرىپ- تۇرۋ ءۇشىن؛

سونداي-اق ەكىنشى دۇنيەجۇزى سوعىسى ارداگەرلەرىنىڭ جەڭىل اۆتوموبيلدەرى بوساتىلادى.

كورسەتىلگەن كولىكتەردىڭ مەملەكەتتىك ءنومىرى جوعارىدا كورسەتىلگەن ساناتتارعا سايكەس مامانداندىرىلعان توپتارعا ەنگىزىلەدى.

اقىلى جولداعى جول قوزعالىسى اركالارداعى كامەرالارعا جازىلىپ، جۇيەدە جول اقىسى الىنبايدى.

بۇل جەڭىلدىكتى الۋ ءۇشىن جوعارىدا اتالعان سانات وكىلدەرى قازاۆتوجولعا كولىك مەملەكەتتىك نومىرلەرىن، سونداي-اق اۆتوبۋستاردىڭ مارشرۋت پاراقتارىن قوسىپ، رەسمي ءوتىنىم جىبەرۋ كەرەك.

قازاقستاندا جالپى ۇزىندىعى 3221 شاقىرىم بولاتىن 17 اقىلى ۋچاسكە بار.

ونىڭ 11 ۋچاسكەسى 1 -تەحنيكالىق ساناتتا (2161 شاقىرىم)، ال 6 ۋچاسكە (1060 شاقىرىم) Ⅱجانە Ⅲتەحنيكالىق ساناتقا جاتادى.

اۆتور

جانات قاپالبايەۆا