اقىلى اۆتوتۇراقتا تەگىن تۇرۋ ۋاقىتى كەمى 30 مينۋتقا جەتكىزىلە مە - رومان سكلياردىڭ جاۋابى
استانا. KAZINFORM - پرەمەر- ءمينيستردىڭ ءبىرىنشى ورىنباسارى رومان سكليار ءماجىلىس دەپۋتاتتارىنىڭ اقىلى اۆتوتۇراقتا تەگىن تۇرۋ ۋاقىتىن كەمى 30 مينۋتقا جەتكىزۋ ۇسىنىسىنا جاۋاپ بەردى.
«بۇگىنگى تاڭدا كوممۋنالدىق اقىلى اۆتوتۇراقتار الماتى جانە استانا قالالارىنىڭ اۋماعىندا ۇيىمداستىرىلعان. ولاردىڭ وپەراتورلارى - «الماتى پاركينگ» شارۋاشىلىق جۇرگىزۋ قۇقىعىنداعى مەملەكەتتىك كوممۋنالدىق كاسىپورنى جانە «استانا تۇراق كەڭىستىگى» ج ش س (مەملەكەتتىك جەكەشەلىك ارىپتەستىك شارتى اياسىندا). استانا قالاسىنىڭ اكىمدىگى مەن «استانا تۇراق كەڭىستىگى» ج ش س اراسىندا جاسالعان م ج ا شارتىنىڭ تالاپتارىنا سۇيەنسەك، اقىلى اۆتوتۇراقتاردان تۇسەتىن تۇسىمدەردەن جەرگىلىكتى بيۋدجەتتىڭ ۇلەسى 2022 -جىلعى جەلتوقسانعا دەيىن 5 پايىز، ودان ءارى 2023 -جىلدان باستاپ، جوبا اياقتالعانعا دەيىن 25 پايىزدى قۇرايدى. كىرىستىڭ ارا قاتىناسى وزگەرەتىن بولسا، جوبا بويىنشا (2 ميلليارد تەڭگەدەن استام)، ونىڭ ىشىندە تەحنيكالىق جابدىق ساتىپ الۋ بويىنشا جەكە ارىپتەس شەككەن شىعىستاردى ەسكەرسەك، مەملەكەتتىك- جەكەشەلىك ارىپتەستىك جوباسى وعان ءتيىمسىز بولادى. بۇدان باسقا، م ج ا شارتى مەرزىمىنەن بۇرىن بۇزىلسا، وندا مۇنداي بۇزۋعا باستاماشى بولعان تاراپ بارلىق شىعىستاردى، ونىڭ ىشىندە الىنباي قالعان پايدانى ەكىنشى تاراپقا وتەۋگە مىندەتتى»، - دەدى ۇكىمەت باسشىسىنىڭ ءبىرىنشى ورىنباسارى.
وسى ورايدا رومان سكليار دەپۋتاتتاردىڭ اقىلى اۆتوتۇراقتا تەگىن تۇرۋ ۋاقىتىن كەمى 30 مينۋتقا جەتكىزۋ، بەينەباقىلاۋ كامەرالارى ارقىلى سالىناتىن ايىپپۇلداردى كەمى 2 ەسە ازايتۋ ۇسىنىستارىن ەسكەرە وتىرىپ، نورماتيۆتىك- قۇقىقتىق اكتىلەر تۇرعىدا:
- جەكەشە ارىپتەستىكتىڭ كوممۋنالدىق اۆتوتۇراقتاردىڭ اۋماعىن كۇتىپ- ۇستاۋ جانە جوندەۋ بويىنشا مىندەتتەرىن؛
- اقىلى اۆتوتۇراقتار (پاركينگتەر) ورنالاستىرىلاتىن جەرلەرگە جانە مينيمالدى تەگىن تۇرۋ ۋاقىتىنا قويىلاتىن تالاپتاردى؛
- كوممۋنالدىق اۆتوتۇراقتاردى باسقارۋ بويىنشا ۇلگىلىك شارتتى بەكىتۋ بويىنشا ۋاكىلەتتى ورگاننىڭ قۇزىرەتىن بەكىتۋ ءجون ەكەندىگىن ايتادى.
«باستاما جاسالىپ وتىرعان ۇسىنىستار قازاقستان رەسپۋبليكاسى ۇكىمەتىنىڭ زاڭ جوبالاۋ جۇمىسى اياسىندا پىسىقتالاتىن بولادى»، - دەدى ول.
بۇعان دەيىن اكىمدەرگە اۆتوتۇراقتاردى ۇيىمداستىرۋ جانە ولاردىڭ ساناتتارىن ايقىنداۋ قاعيدالارىن بەكىتۋ قۇزىرەتى بەرىلەتىندىگىن جازعان ەدىك.
