«اقىلدى قالا»: تۇركىستاننىڭ جاڭا دامۋ كەزەڭى باستالدى

تۇركىستان. KAZINFORM - كەيىنگى جىلدارى تۇركىستان وبلىسىندا سيفرلىق ترانسفورماتسيا مەن يننوۆاتسيالىق دامۋ باعىتىندا قارقىندى ءارى جۇيەلى جۇمىستار جۇرگىزىلىپ كەلەدى.

مەملەكەت باسشىسىنىڭ تاپسىرماسىنا سايكەس، ايماقتا حالىققا كورسەتىلەتىن قىزمەت ساپاسىن ارتتىرۋ، ينفراقۇرىلىمدى جاڭعىرتۋ جانە قولايلى قالالىق ورتا قالىپتاستىرۋ باعىتىندا تىڭ جوبالار قولعا الىنىپ جاتىر. سونىڭ ىشىندە ەرەكشە ماڭىزعا يە باستامالاردىڭ ءبىرى - «Smart city» تۇجىرىمداماسىنا نەگىزدەلگەن «اقىلدى قالا» جوباسى.

«اقىلدى قالا» جوباسىنىڭ باستى ماقساتى - قالا تۇرعىندارىنىڭ ءومىر ءسۇرۋ ساپاسىن ارتتىرۋ، قوعامدىق قاۋىپسىزدىكتى قامتاماسىز ەتۋ، كولىك قاتىناسىن ءتيىمدى ۇيىمداستىرۋ، كوممۋنالدىق ينفراقۇرىلىمدى وڭتايلاندىرۋ جانە مەملەكەتتىك قىزمەتتەردى قولجەتىمدى ەتۋ. بۇل جوبانىڭ ءتيىمدى جۇزەگە اسىرىلۋى - زاماناۋي سيفرلىق شەشىمدەردىڭ ناقتى ومىردە قولدانىلۋى ارقىلى ولشەنەدى.

2024 -جىلدىڭ قورىتىندىسى بويىنشا، تۇركىستان قالاسى «اقىلدى قالا» جوباسىن ىسكە اسىرۋدا رەسپۋبليكا اراسىندا 74,6 پايىز كورسەتكىشپەن 12-ورىنعا تۇراقتادى. بۇل - وڭ ناتيجە، ءارى قالانىڭ سيفرلاندىرۋ ۇدەرىسىنە بەت بۇرىپ، كوپتەگەن سالالاردا وزىق تاجىريبەلەردى ەنگىزە باستاعانىن كورسەتەدى. دەگەنمەن جوبانىڭ بارلىق باعىتىن تولىققاندى ىسكە اسىرۋ ءۇشىن ءالى دە كەشەندى جۇمىستار اتقارىلۋى ءتيىس.

Фото: Түркістан облысы әкімдігі

بۇگىندە «اقىلدى قالا» جوباسى ەلىمىزدە 19 نەگىزگى باعىتتى قامتيدى. تۇركىستان قالاسىندا سونىڭ 11 باعىتى ىسكە اسىرىلعان. قوعامدىق قاۋىپسىزدىك پەن كولىك قوزعالىسى سالاسىندا ءبىرقاتار وڭ وزگەرىس بولعان. ماسەلەن، كوشەلەر مەن قوعامدىق ورىندارعا بەينەباقىلاۋ كامەرالارى ورناتىلىپ، قۇقىق بۇزۋشىلىقتاردىڭ الدىن الۋعا جانە جول-كولىك وقيعالارىن جەدەل انىقتاۋعا مۇمكىندىك تۋدى. سونىمەن قاتار قوعامدىق كولىكتەردە جولاقىنى ەلەكتروندى تۇردە تولەۋ جۇيەسى ەنگىزىلدى. بۇل - كولىك قوزعالىسىنىڭ اشىقتىعى مەن باقىلاۋىن قامتاماسىز ەتۋگە باعىتتالعان ماڭىزدى قادام.

ءبىلىم بەرۋ سالاسىندا دا ايتارلىقتاي جەتىستىكتەر بار. قالاداعى بارلىق مەكتەپ 100 پايىز بەينەباقىلاۋ جۇيەسىنە قوسىلعان. بۇل - وقۋشىلاردىڭ قاۋىپسىزدىگىن قامتاماسىز ەتۋمەن قاتار، وقۋ ورىندارىنىڭ ىشكى ءتارتىبىن باقىلاۋعا مۇمكىندىك بەرەدى.

حالىقپەن ءتيىمدى كەرى بايلانىس ورناتۋ ماقساتىندا «109» ءبىرىڭعاي بايلانىس ورتالىعى ىسكە قوسىلىپ، تۇرعىنداردىڭ وتىنىشتەرى مەن شاعىمدارى جەدەل قابىلدانىپ، ءتيىستى مەكەمەلەرگە جولدانىپ جاتىر.

مەديتسينالىق مەكەمەلەر تولىعىمەن كومپيۋتەرلىك جۇيەلەرمەن جابدىقتالىپ، «دامۋمەد» مەديتسينالىق اقپاراتتىق جۇيەسى ەنگىزىلدى. بۇل پاتسيەنتتەردىڭ مالىمەتتەرىن جەدەل تىركەپ، دارىگەرلىك قىزمەت ساپاسىن ارتتىرۋعا زور مۇمكىندىك بەرەدى.

قالا بويىنشا شۇعىل جاعدايلار كەزىندە پايدالانۋعا ارنالعان 17 «SOS» باتىرماسى ورناتىلعان. بۇل - توتەنشە جاعدايلاردا جەدەل ارەكەت ەتۋگە مۇمكىندىك بەرەتىن زاماناۋي شەشىمدەردىڭ ءبىرى. سونداي- اق 800-دەن استام كوشەنى قامتيتىن 845 شاقىرىمنان استام جولدىڭ 92 پايىزىنا جارىقتاندىرۋ جۇيەسى ورناتىلىپ، قالا تۇرعىندارى ءۇشىن قاۋىپسىز جانە جايلى ورتا قالىپتاستى.

«اقىلدى قالا» جوباسىنىڭ قالعان 8 باعىتىن جۇزەگە اسىرۋ 2025-2026 -جىلدارعا جوسپارلانعان. بۇل قاتاردا - «اقىلدى ايالدامالار» سالۋ، «اقىلدى جارىقتاندىرۋ» جۇيەسىن ەنگىزۋ، تۇرعىن ءۇي- كوممۋنالدىق شارۋاشىلىق نىساندارىن ينتەللەكتۋالدى ەسەپتەگىشتەرمەن جابدىقتاۋ، كوممۋنالدىق تولەمدەرگە ارنالعان ءبىرىڭعاي جۇيە ەنگىزۋ، بىرەگەي موبيلدى قوسىمشا جاساۋ، قوقىس كونتەينەرلەرىنىڭ ورنالاسۋىن سيفرلاندىرۋ جانە وبلىستىق احۋالدىق ورتالىق قۇرۋ سىندى ماڭىزدى مىندەتتەر تۇر.
اتالعان باعىتتاردى جۇزەگە اسىرۋ ءۇشىن ارنايى جول كارتاسى ازىرلەنىپ، جاۋاپتى باسقارمالار مەن مەردىگەر ۇيىمدارعا ناقتى تاپسىرمالار جۇكتەلگەن. بۇل جۇمىسقا جەرگىلىكتى بيلىكپەن قاتار، سيفرلىق شەشىمدەر ۇسىناتىن ІТ- كومپانيالار دا تارتىلۋدا. قازىرگى تاڭدا كەيبىر جوبالار پيلوتتىق رەجيمدە سىناقتان وتكىزىلىپ، ولاردىڭ تيىمدىلىگى باعالانىپ وتىر.

جالپى، «اقىلدى قالا» - بۇل تەك سيفرلىق جۇيەلەردى ەنگىزۋ عانا ەمەس، قالا ينفراقۇرىلىمىن كەشەندى جاڭعىرتۋ جانە تۇرعىندارعا جايلى ورتا قالىپتاستىرۋعا باعىتتالعان تۇجىرىمداما. تۇركىستان قالاسىندا وسى جوبانى ىسكە اسىرۋ ارقىلى ينۆەستيتسيالىق تارتىمدىلىق ارتىپ كەلەدى. ينفراقۇرىلىمدىق شەشىمدەردىڭ ساپاسى - شەتەلدىك جانە وتاندىق ينۆەستورلار ءۇشىن ماڭىزدى فاكتورلاردىڭ ءبىرى سانالادى.

سونداي-اق مەملەكەتتىك قىزمەتتەردى تسيفرلاندىرۋ ارقىلى تۇرعىندار ۋاقىتىن ۇنەمدەۋگە، ادامي فاكتوردى ازايتۋعا جانە قىزمەت كورسەتۋ ساپاسىن ارتتىرۋعا مۇمكىندىك تۋىپ وتىر. بۇل ءوز كەزەگىندە حالىقتىڭ مەملەكەتتىك جۇيەگە دەگەن سەنىمىن نىعايتىپ، الەۋمەتتىك تۇراقتىلىقتى قامتاماسىز ەتەدى.

تۇركىستان - تاريحي ءھام مادەني مۇراسى باي، رۋحاني استانامىز عانا ەمەس، قازىرگى تاڭدا بولاشاقتىڭ اقىلدى قالاسىنا اينالىپ كەلە جاتقان ءىرى مەگاپوليس. قالانىڭ ينفراقۇرىلىمىن جاڭا دەڭگەيگە كوتەرۋ، زاماناۋي تەحنولوگيالاردى كۇندەلىكتى ومىرگە ەنگىزۋ ارقىلى ءوڭىر دامۋىنىڭ جاڭا باعىتى ايقىندالۋدا. بۇل باعىتتاعى جۇمىستار الداعى ۋاقىتتا دا جالعاسىن تابادى.

«اقىلدى قالا» جوباسىن ىسكە اسىرۋ - تۇركىستاننىڭ جارقىن بولاشاعىنا جول اشاتىن ستراتەگيالىق باستاما. بۇل - تەك تەحنولوگيالىق دامۋ ەمەس، ول - تۇرعىنداردىڭ ءومىر ءسۇرۋ ساپاسىن ارتتىرۋعا ارنالعان ناقتى قادام.

اۆتور

قايرات زاينيشيەۆ