اقوردادا ۆلاديمير پۋتيندى سالتاناتتى قارسى الۋ ءراسىمى ءوتتى
مەملەكەت باسشىسى قاسىم-جومارت توقايەۆ رەسمي ساپارمەن كەلگەن رەسەي فەدەراتسياسىنىڭ پرەزيدەنتى ۆلاديمير پۋتيندى اقوردادا قارسى الدى، دەپ حابارلايدى Kazinform.
مارتەبەلى مەيماننىڭ ساپارىنا وراي سالتاناتتى راسىمدەر زالىندا قۇرمەت قاراۋىلى ساپ تۇزەپ، ونىڭ باستىعى مەملەكەت باسشىلارىنا سالەمدىك بايانات بەردى. وسىدان كەيىن پرەزيدەنتتىك وركەستر ەكى ەلدىڭ مەملەكەتتىك ءانۇراندارىن ورىندادى. ءانۇرانداردى تىڭداپ بولعاننان كەيىن ۆلاديمير پۋتين پەن قاسىم-جومارت توقايەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى. ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. رەسەي باسشىسى قۇرمەتتى قاراۋىل باستىعىمەن قوشتاسىپ، قازاقستان پرەزيدەنتىمەن شاعىن قۇرامداعى كەزدەسۋگە ءوتتى.
بۇعان دەيىن مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن رەسەي پرەزيدەنتى ۆلاديمير پۋتيندى ەلوردا اۋەجايىندا قارسى العانىن جازعان ەدىك.
ەكى ەل باسشىلارى كەلىسسوز جۇرگىزىپ، قازاقستان مەن رەسەي اراسىنداعى ستراتەگيالىق سەرىكتەستىكتىڭ وزەكتى ماسەلەلەرىن تالقىلايدى دەپ جوسپارلانعان. بۇدان بولەك، پرەزيدەنتتەر قوستانايدا وتەتىن قازاقستان مەن رەسەيدىڭ XIX ءوڭىرارالىق ىنتىماقتاستىق فورۋمىنا بەينەبايلانىس رەجيمىندە قاتىسادى.
اۆتور
مارلان جيەمباي
