اقورداعا ساياحات جاساعان وقۋشىلار العان اسەرىمەن ءبولىستى
استانا. KAZINFORM - حالىقارالىق بالالاردى قورعاۋ كۇنىندە ەلدىڭ ءار وڭىرىنەن استاناعا شاقىرىلعان 81 وقۋشى پرەزيدەنت رەزيدەنسياسى - اقورداعا ساياحات جاسادى. مەرەكەگە وراي وسىنداي مۇمكىندىككە يە بولعان بالالار Kazinform تىلشىسىنە ساياحاتتان العان اسەرىن ايتتى.
ساياحاتقا كەلگەندەر اراسىندا حالىقارالىق جانە رەسپۋبليكالىق وليمپيادالاردىڭ جەڭىمپازدارى، وقۋ وزاتتارى، شىعارماشىلىق پەن سپورتتا تالانتىمەن تانىلعان بالالار، بەلسەندىلەر مەن ەرىكتىلەر بولدى. بيىل اقورداداعى ساياحاتقا تاسقىننان زارداپ شەككەن وڭىرلەردىڭ بالالارى دا شاقىرىلىپتى.
بالالار اۋەلى اقوردا عيماراتىنىڭ ءبىرىنشى قاباتىنداعى ورتالىق حوللىنا ءوتتى. مۇندا ولارعا قۇرمەت قاراۋىلىنىڭ قاتىسۋىمەن رەسمي قابىلداۋلار وتكىزىلەتىنى ايتىلدى. ودان كەيىن جەتكىنشەكتەر كەلىسسوزدەر مەن كەزدەسۋلەر وتكىزۋگە ارنالعان شىعىس، ءمارمار جانە سالتانات زالدارىن، مەملەكەت باسشىسىنىڭ كىتاپحاناسىن ارالادى. وقۋشىلار اقوردا باعىندا سەرۋەندەۋگە دە مۇمكىندىك الدى.
ساياحات كەزىندە وقۋشىلار پرەزيدەنت رەزيدەنتسياسىمەن بايلانىستى قىزىقتى دەرەكتەر ەستىپ، مەملەكەت باسشىسىنىڭ اتىنان ەستەلىك سىيلىقتار الدى.
اقورداداعى ساپاردان ەرەكشە اسەر العان بالالاردىڭ ىشىندە اقتوبە قالاسىنداعى Smart Bilim مەكتەپ- گيمنازياسىنىڭ 10-سىنىپ وقۋشىسى ءشامشى باقىتجان دا بار. ول ساباقتان تىس ۋاقىتىندا Art Lab مەكتەبىندە اكتەرلىك شەبەرلىك، بەينەلەۋ سياقتى ونەر تۇرلەرىمەن اۋەستەنەتىنىن ايتادى. بىلتىرعى جەلتوقساندا ءوزى وقيتىن مەكتەپكە پرەزيدەنت كەلگەنىن ەرەكشە ەستە ساقتاپتى.
«پرەزيدەنت ءبىزدىڭ مەكتەپكە كەلگەندە ونىمەن تىكەلەي كەزدەسەمىن دەپ ويلاماعانمىن. العاش ەستىگەندە ءازىل دەپ قابىلدادىم. ءبىراق شىن بولىپ شىققاندا قاتتى تاڭعالدىم. پرەزيدەنتپەن كەز كەلگەن ادامنىڭ كەزدەسۋگە مۇمكىندىگى بولا بەرمەيدى عوي. سول كەزدە باسىما اقوردانىڭ سۋرەتىن سالۋ تۋرالى وي كەلدى دە، تۋىندىنى پرەزيدەنتكە سىيلادىق. اقورداعا بارىپ، پرەزيدەنت جۇمىس ىستەيتىن ورىندى كورگىمىز كەلدى»، - دەيدى ءشامشى.
وعان اقورداداعى ساپاردا پرەزيدەنتتىڭ كابينەتىن ارالاعان ءساتى قاتتى ۇناعان كورىنەدى.
«بۇگىن ءبارى تاماشا بولدى. ءبىز پرەزيدەنتتىڭ كابينەتىنە كىردىك، باسقا دا ورىنداردى، باسپا ءسوز ءماسليحاتىن وتكىزەتىن ورىندى ارالادىق. پرەزيدەنت وتىرعان ورىنعا وتىرىپ كوردىم. ماعان بارىنەن كيىز ۇيلەرى بار شىعىس زال ۇنادى. زال تۇگەل قازاق ويۋلارىمەن ادىپتەلىپتى. مەن كۇتكەننەن الدەقايدا جاقسى بولىپ شىقتى. بىزگە اقوردانىڭ شاعىن بولىگىن عانا كورسەتەتىن شىعار دەپ ويلاعانمىن. ال شىن مانىندە مەنىڭ كۇتكەنىمنەن الدەقايدا اسەرلى بولدى. بۇگىن مەنىڭ ۇلكەن ارمانىم ورىندالدى»، - دەيدى وقۋشى.
ال، الماتىلىق ايتىسكەر وقۋشى ءىنجۋ باتىرحان بۇگىن بالا ارماندارىنىڭ ءبىر ورىندالعانىن ايتادى.
«بۇگىن مەنىڭ ارمانىم ورىندالعان كۇن دەسەم بولادى. ەلدىڭ تۇكپىر-تۇكپىرىنەن جينالعان دارىندى بالالارمەن بىرگە اقورداعا ساياحات جاسادىق. ماعان ءبارى ۇنادى، كەرەمەت. سونىڭ ىشىندە شىعىس زال ەرەكشە كوڭىلىمنەن شىقتى. توبەدەگى شاڭىراق، ءىشىنىڭ جارىقتىعى، وتىراتىن ورىندارىنىڭ جايلىلىعى ەستە قالدى»، - دەدى اقىن قىز ءىنجۋ باتىرحان.
ول ءسوزىنىڭ سوڭىن مىنا ولەڭ جولدارىمەن:
«بيىك بوپ ورە تالعامىم،
مەن ونەر جولىن تاڭدادىم.
دومبىرامدى سەرىك قىپ،
جامبىل ىزىنەن قالمادىم.
جەتىگەندى دە ۇيرەنىپ،
ارالاپ ەلدى شارلادىم»، - دەپ تۇيىندەدى.
ارالدان كەلگەن امەليا پاك بۇل ساياحاتتان تۋعان قالاسىنا بولاشاقتا اقوردادا جۇمىس ىستەسەم دەگەن ارمان ارقالاپ بارا جاتقانىن ايتادى.
«بۇگىنگى ساياحاتتان العان اسەرىم وتە كۇشتى. اقورداعا كەلگەنىمەن قۋانىشتىمىن. بۇل ساياحات ماعان ۇلكەن جىگەر بەرەدى. قازىردەن باستاپ جاقسى وقىپ، جاقسى ۋنيۆەرسيتەتكە وقۋعا ءتۇسىپ، پرەزيدەنتپەن بىرگە جۇمىس ىستەسەم دەگەن ماقسات پايدا بولدى. جالپى ءوزىمنىڭ مەنەدجەر بولعىم كەلەدى»، - دەيدى ول.
بۇل ساياحات بالالارعا اقورداداعى اتموسفەرامەن، پرەزيدەنت جۇمىسىمەن جاقىن تانىسۋعا مۇمكىندىك سىيلادى.
