اقتوبەدەگى ۋنيۆەرسيتەتتىڭ 107 ستۋدەنتى ەكىنشى كۋرسقا كوشپەي قالدى
اقتوبە. KAZINFORM - اقتوبەدە Heriot-Watt ۋنيۆەرسيتەتىنىڭ 107 ستۋدەنتى ەكىنشى كۋرسقا كوشپەي قالىپ، اتا-انالار ءوز تالابىن قويدى. ولار بالالارىن ق. جۇبانوۆ وڭىرلىك ۋنيۆەرسيتەتىنىڭ گرانتىنا قابىلداۋدى سۇراپ وتىر.
اقتوبەدە Heriot-Watt ۋنيۆەرسيتەتىنىڭ ەكىنشى كۋرسىنا كوشپەي قالعان ستۋدەنتتەردىڭ اتا-انالارى ءوز تالابىن قويدى. ولار بيىل 23-تامىزدا عانا اتا-انالارعا حابار بەرىلگەنىن، ءبىر جىل ۋاقىتى بوسقا كەتكەنىن ايتىپ شاعىمىن جەتكىزدى.
- بىلتىر «بالاڭىز وقۋعا ءتۇستى، قۇتتىقتايمىز» دەگەن حابارلاما الدىق. ال بيىل 23-تامىز كۇنى ساعات 16:00-17:00 ارالىعىندا 107 بالاعا «ءسىز ەكىنشى كۋرسقا وتپەدىڭىز» دەگەن حابارلاما تۇسكەن. بالالارىمىزدىڭ ءبىلىم ساپاسى جونىندە نەگە ءبىرىنشى كۋرستىڭ ءبىرىنشى سەمەسترىندە ەسكەتپەدى؟ سول كەزدە ەرتەرەك قامدانار ەدىك. باسقا ج و و-عا الىپ كەتۋگە دە ۋاقىت بولار ەدى. وسى وقۋ ورنىنا قابىلدانعان كەزدە 50 بال جيناعان تالاپكەردىڭ ءبارى قابىلداندى. ەكى ديپلوم بەرەدى دەدى. سودان وزگە گرانتتان باس تارتىپ، وسىندا كەلدىك. ق. جۇبانوۆ وڭىرلىك ۋنيۆەرسيتەتىنىڭ رەكتورىمەن كەزدەسكەندە تەك ەكىنشى كۋرستى وسى ۋنيۆەرسيتەتتە تەگىن وقيتىنىن، ءارى قاراي اقىلى ەكەنىن بىلدىك. ءبىراق ءبىز 4 جىل بويى گرانت بولعانىن قالايمىز. بالالارىمىز اۋىلدان كەلدى، اعىلشىن دەڭگەيى بىردەي ەمەس. ءبىرىنشى كۋرستا عانا ءتىلدى مەڭگەردى، ەكىنشى سەمەستردە بارلىق ءپان اعىلشىن تىلىندە ءوتتى. ەگەر ءبىزدىڭ بالالارىمىز ساباقتى الىپ كەتە الماسا، وقىتۋشىلاردىڭ دا ساپاسى ناشار بولعان شىعار، - دەدى ءجاميلا قازماعامبەتوۆا.
ق. جۇبانوۆ اتىنداعى ۋنيۆەرسيتەتتىڭ باسپا ءسوز قىزمەتىنىڭ حابارلاۋىنشا، قازىرگى تاڭدا 107 ستۋدەنتتىڭ 70-تەن استامى ق. جۇبانوۆ ۋنيۆەرسيتەتىنىڭ ەكىنشى كۋرسىنا تەگىن وقۋعا مۇمكىندىك بەرەتىن ءبىلىم بەرۋ باعدارلامالارىنا اۋىسۋعا ءوتىنىش جازدى. بۇل ستۋدەنتتەر Heriot-Watt ۋنيۆەرسيتەتىنىڭ اكادەميالىق ستاندارتتارىنىڭ تالاپتارىنا ساي كەلمەي، كەلەسى كۋرسقا وتپەدى.
- 2023 -جىلى 500-دەن استام ادام مەملەكەتتىك گرانت بايقاۋىنا قاتىسۋعا ءوتىنىش ءبىلدىردى. ونىڭ 300 ى ۇ ب ت-دا جيناعان بالىنىڭ ناتيجەسىندە مەملەكەتتىك گرانتقا يە بولدى. شەكتى بالى - 50. بۇل ەلىمىزدىڭ ءار وڭىرىنەن كەلگەن جانە ءار ءتۇرلى تۇرعىندار ساناتىنا جاتاتىن تالاپكەرلەرگە ءبىلىم گرانتىن الۋعا مۇمكىندىك بەردى. سونىمەن قاتار اعىلشىن ءتىلىن ءبىلۋدىڭ بەلگىلى ءبىر دەڭگەيى قوسىمشا تالاپ ەتىلدى. اعىلشىن تىلىنەن ارنايى ەمتيحاندى Heriot-Watt ۋنيۆەرسيتەتىنىڭ وكىلدەرى جۇرگىزدى. ءبىرىنشى سەمەستر تولىعىمەن اعىلشىن ءتىلىن وقىتۋعا ارنالدى. ەكىنشى سەمەستردە ستۋدەنتتەر اعىلشىن ءتىلىن مەڭگەرۋمەن قاتار ءتيىستى ماماندىقتارعا سايكەس (فيزيكا، ماتەماتيكا، حيميا نەمەسە ينفورماتيكا) بازالىق پاندەردى وقىدى. وقۋ بارىسىندا ستۋدەنتتەر مەن ولاردىڭ اتا-انالارىنا وقۋ ۇلگەرىمى تۋرالى حابارلامالار بىرنەشە رەت تاراتىلدى. ەكىنشى سەمەستردىڭ قورىتىندى باعاسى تامىز ايىنىڭ ءبىرىنشى ونكۇندىگىندە Heriot-Watt پورتالىنا شىقتى. سول ۋاقىتتا ستۋدەنتتەردىڭ باسقا ۋنيۆەرسيتەتكە اۋىسۋىنا مۇمكىندىك بولدى. شەكتى بالعا قول جەتكىزە الماعان ستۋدەنتتەرگە ەمتيحاندى قايتا تاپسىرۋعا مۇمكىندىك بەرىلدى. بارلىق ەمتيحان مۇقيات تەكسەرۋدەن ءوتتى جانە ستۋدەنتتەردىڭ قورىتىندى باعالارى 23 تامىز كۇنى Heriot-Watt ۋنيۆەرسيتىنىڭ سايتىندا جاريالاندى. وسىلايشا ستۋدەنتتەردىڭ اكادەميالىق جاعدايىن تۇزەتۋگە نەمەسە باسقا ءبىلىم بەرۋ باعدارلامالارىنا اۋىسۋىنا مۇمكىندىك بولدى. ءبىرىنشى وقۋ جىلىنىڭ قورىتىندىسى بويىنشا ەدينبۋرگ قالاسىنداعى Heriot-Watt ۋنيۆەرسيتەتىنىڭ عىلىمي كەڭەسى اقتوبە كامپۋسىنداعى 200-گە جۋىق ستۋدەنتتى ەكىنشى كۋرسقا اۋىستىرۋ تۋرالى شەشىم قابىلدادى. بۇل ستۋدەنتتەردىڭ كوپشىلىگى باعدارلامانى مەڭگەرىپ، ءبىلىم دەڭگەيىن راستاي الدى. وقۋ ۇلگەرىمى ناشار ستۋدەنتتەردى وقۋدان شىعارۋ بارلىق جوعارى وقۋ ورىندارىندا قالىپتى ءۇردىس، - دەپ حابارلادى ق. جۇبانوۆ اتىنداعى ۋنيۆەرسيتەتتىڭ باسپا ءسوز قىزمەتى.
ەسكە سالساق، بىلتىر اقتوبەدە الەمنىڭ جەتەكشى ۋنيۆەرسيتەتتەرىنىڭ ءبىرى حەريوت-ۋوتت ۋنيۆەرسيتەتىنىڭ (Heriot-Watt University) فيليالى اشىلدى. جوعارى وقۋ ورنى ءوز جۇمىسىن ق. جۇبانوۆ اتىنداعى اقتوبە وڭىرلىك ۋنيۆەرسيتەتى مەن حەريوت- ۋوتت ۋنيۆەرسيتەتىنىڭ ىنتىماقتاستىعى اياسىندا باستادى.
اۆتور
التىناي ساعىندىقوۆا
